၅. အရူပါဝစရဝိပါကာ

၆၃၂. ဣဓ ဘိက္ခု ယသ္မိံ သမယေ အရူပူပပတ္တိယာ မဂ္ဂံ ဘာဝေတိ သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဖဿော ဟောတိ။ပေ။ အဝိက္ခေပေါ ဟောတိ. ဣမေ ဓမ္မာ ကုသလာ. တဿေဝ အရူပါဝစရဿ ကုသလဿ ကမ္မဿ ကတတ္တာ ဥပစိတတ္တာ ဝိပါကံ သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနသညာသဟဂတံ သုခဿ စ ပဟာနာ။ပေ။ စတုတ္ထံ ဈာနံ ဥပသမ္ပဇ္ဇ ဝိဟရတိ၊ တသ္မိံ သမယေ ဒုဝင်္ဂိကံ ဈာနံ ဟောတိ – ဥပေက္ခာ၊ စိတ္တဿေကဂ္ဂတာ. ဣဒံ ဝုစ္စတိ ‘‘စတုတ္ထံ ဈာနံ’’. အဝသေသာ ဓမ္မာ ဈာနသမ္ပယုတ္တာ.