၁. ရူပက္ခန္ဓော

၃၃. တတ္ထ ကတမော ရူပက္ခန္ဓော? ဧကဝိဓေန ရူပက္ခန္ဓော – သဗ္ဗံ ရူပံ န ဟေတု၊ အဟေတုကံ၊ ဟေတုဝိပ္ပယုတ္တံ၊ သပ္ပစ္စယံ၊ သင်္ခတံ၊ ရူပံ၊ လောကိယံ၊ သာသဝံ၊ သံယောဇနိယံ၊ ဂန္ထနိယံ၊ ဩဃနိယံ၊ ယောဂနိယံ၊ နီဝရဏိယံ၊ ပရာမဋ္ဌံ၊ ဥပါဒါနိယံ၊ သံကိလေသိကံ၊ အဗျာကတံ၊ အနာရမ္မဏံ၊ အစေတသိကံ၊ စိတ္တဝိပ္ပယုတ္တံ၊ နေဝဝိပါကနဝိပါကဓမ္မဓမ္မံ၊ အသံကိလိဋ္ဌသံကိလေသိကံ၊ န သဝိတက္ကသဝိစာရံ၊ န အဝိတက္ကဝိစာရမတ္တံ၊ အဝိတက္ကအဝိစာရံ၊ န ပီတိသဟဂတံ၊ န သုခသဟဂတံ၊ န ဥပေက္ခာသဟဂတံ၊ နေဝ ဒဿနေန န ဘာဝနာယ ပဟာတဗ္ဗံ၊ နေဝ ဒဿနေန န ဘာဝနာယ ပဟာတဗ္ဗဟေတုကံ၊ နေဝါစယဂါမိနာပစယဂါမီ၊ နေဝသေက္ခနာသေက္ခံ၊ ပရိတ္တံ၊ ကာမာဝစရံ၊ န ရူပါဝစရံ၊ န အရူပါဝစရံ၊ ပရိယာပန္နံ၊ နော အပရိယာပန္နံ၊ အနိယတံ၊ အနိယျာနိကံ၊ ဥပ္ပန္နံ၊ ဆဟိ ဝိညာဏေဟိ ဝိညေယျံ၊ အနိစ္စံ၊ ဇရာဘိဘူတံ. ဧဝံ ဧကဝိဓေန ရူပက္ခန္ဓော.

ဒုဝိဓေန ရူပက္ခန္ဓော – အတ္ထိ ရူပံ ဥပါဒါ၊ အတ္ထိ ရူပံ နော ဥပါဒါ [နုပါဒါ (သီ. က.)]. အတ္ထိ ရူပံ ဥပါဒိန္နံ၊ အတ္ထိ ရူပံ အနုပါဒိန္နံ. အတ္ထိ ရူပံ ဥပါဒိန္နုပါဒါနိယံ၊ အတ္ထိ ရူပံ အနုပါဒိန္နုပါဒါနိယံ. အတ္ထိ ရူပံ သနိဒဿနံ၊ အတ္ထိ ရူပံ အနိဒဿနံ. အတ္ထိ ရူပံ သပ္ပဋိဃံ၊ အတ္ထိ ရူပံ အပ္ပဋိဃံ. အတ္ထိ ရူပံ ဣန္ဒြိယံ၊ အတ္ထိ ရူပံ န ဣန္ဒြိယံ. အတ္ထိ ရူပံ မဟာဘူတံ၊ အတ္ထိ ရူပံ န မဟာဘူတံ. အတ္ထိ ရူပံ ဝိညတ္တိ၊ အတ္ထိ ရူပံ န ဝိညတ္တိ. အတ္ထိ ရူပံ စိတ္တသမုဋ္ဌာနံ၊ အတ္ထိ ရူပံ န စိတ္တသမုဋ္ဌာနံ. အတ္ထိ ရူပံ စိတ္တသဟဘု၊ အတ္ထိ ရူပံ န စိတ္တသဟဘု. အတ္ထိ ရူပံ စိတ္တာနုပရိဝတ္တိ၊ အတ္ထိ ရူပံ န စိတ္တာနုပရိဝတ္တိ. အတ္ထိ ရူပံ အဇ္ဈတ္တိကံ၊ အတ္ထိ ရူပံ ဗာဟိရံ. အတ္ထိ ရူပံ ဩဠာရိကံ၊ အတ္ထိ ရူပံ သုခုမံ. အတ္ထိ ရူပံ ဒူရေ၊ အတ္ထိ ရူပံ သန္တိကေ။ပေ။ အတ္ထိ ရူပံ ကဗဠီကာရော အာဟာရော၊ အတ္ထိ ရူပံ န ကဗဠီကာရော အာဟာရော. ဧဝံ ဒုဝိဓေန ရူပက္ခန္ဓော.

(ယထာ ရူပကဏ္ဍေ ဝိဘတ္တံ၊ တထာ ဣဓ ဝိဘဇိတဗ္ဗံ.)

တိဝိဓေန ရူပက္ခန္ဓော – ယံ တံ ရူပံ အဇ္ဈတ္တိကံ တံ ဥပါဒါ၊ ယံ တံ ရူပံ ဗာဟိရံ တံ အတ္ထိ ဥပါဒါ၊ အတ္ထိ နော ဥပါဒါ. ယံ တံ ရူပံ အဇ္ဈတ္တိကံ တံ ဥပါဒိန္နံ၊ ယံ တံ ရူပံ ဗာဟိရံ တံ အတ္ထိ ဥပါဒိန္နံ၊ အတ္ထိ အနုပါဒိန္နံ. ယံ တံ ရူပံ အဇ္ဈတ္တိကံ တံ ဥပါဒိန္နုပါဒါနိယံ၊ ယံ တံ ရူပံ ဗာဟိရံ တံ အတ္ထိ ဥပါဒိန္နုပါဒါနိယံ၊ အတ္ထိ အနုပါဒိန္နုပါဒါနိယံ။ပေ။ ယံ တံ ရူပံ အဇ္ဈတ္တိကံ တံ န ကဗဠီကာရော အာဟာရော၊ ယံ တံ ရူပံ ဗာဟိရံ တံ အတ္ထိ ကဗဠီကာရော အာဟာရော၊ အတ္ထိ န ကဗဠီကာရော အာဟာရော. ဧဝံ တိဝိဓေန ရူပက္ခန္ဓော.

စတုဗ္ဗိဓေန ရူပက္ခန္ဓော – ယံ တံ ရူပံ ဥပါဒါ တံ အတ္ထိ ဥပါဒိန္နံ၊ အတ္ထိ အနုပါဒိန္နံ၊ ယံ တံ ရူပံ နော ဥပါဒါ တံ အတ္ထိ ဥပါဒိန္နံ၊ အတ္ထိ အနုပါဒိန္နံ. ယံ တံ ရူပံ ဥပါဒါ တံ အတ္ထိ ဥပါဒိန္နုပါဒါနိယံ၊ အတ္ထိ အနုပါဒိန္နုပါဒါနိယံ၊ ယံ တံ ရူပံ နော ဥပါဒါ တံ အတ္ထိ ဥပါဒိန္နုပါဒါနိယံ၊ အတ္ထိ အနုပါဒိန္နုပါဒါနိယံ. ယံ တံ ရူပံ ဥပါဒါ တံ အတ္ထိ သပ္ပဋိဃံ၊ အတ္ထိ အပ္ပဋိဃံ၊ ယံ တံ ရူပံ နော ဥပါဒါ တံ အတ္ထိ သပ္ပဋိဃံ၊ အတ္ထိ အပ္ပဋိဃံ. ယံ တံ ရူပံ ဥပါဒါ တံ အတ္ထိ ဩဠာရိကံ၊ အတ္ထိ သုခုမံ၊ ယံ တံ ရူပံ နော ဥပါဒါ တံ အတ္ထိ ဩဠာရိကံ၊ အတ္ထိ သုခုမံ. ယံ တံ ရူပံ ဥပါဒါ တံ အတ္ထိ ဒူရေ၊ အတ္ထိ သန္တိကေ၊ ယံ တံ ရူပံ နော ဥပါဒါ တံ အတ္ထိ ဒူရေ၊ အတ္ထိ သန္တိကေ။ပေ။ ဒိဋ္ဌံ၊ သုတံ၊ မုတံ၊ ဝိညာတံ ရူပံ. ဧဝံ စတုဗ္ဗိဓေန ရူပက္ခန္ဓော.

ပဉ္စဝိဓေန ရူပက္ခန္ဓော – ပထဝီဓာတု၊ အာပေါဓာတု၊ တေဇောဓာတု၊ ဝါယောဓာတု၊ ယဉ္စ ရူပံ ဥပါဒါ. ဧဝံ ပဉ္စဝိဓေန ရူပက္ခန္ဓော.

ဆဗ္ဗိဓေန ရူပက္ခန္ဓော – စက္ခုဝိညေယျံ ရူပံ၊ သောတဝိညေယျံ ရူပံ၊ ဃာနဝိညေယျံ ရူပံ၊ ဇိဝှါဝိညေယျံ ရူပံ၊ ကာယဝိညေယျံ ရူပံ၊ မနောဝိညေယျံ ရူပံ. ဧဝံ ဆဗ္ဗိဓေန ရူပက္ခန္ဓော.

သတ္တဝိဓေန ရူပက္ခန္ဓော – စက္ခုဝိညေယျံ ရူပံ၊ သောတဝိညေယျံ ရူပံ၊ ဃာနဝိညေယျံ ရူပံ၊ ဇိဝှါဝိညေယျံ ရူပံ၊ ကာယဝိညေယျံ ရူပံ၊ မနောဓာတုဝိညေယျံ ရူပံ၊ မနောဝိညာဏဓာတုဝိညေယျံ ရူပံ. ဧဝံ သတ္တဝိဓေန ရူပက္ခန္ဓော.

အဋ္ဌဝိဓေန ရူပက္ခန္ဓော – စက္ခုဝိညေယျံ ရူပံ၊ သောတဝိညေယျံ ရူပံ၊ ဃာနဝိညေယျံ ရူပံ၊ ဇိဝှါဝိညေယျံ ရူပံ၊ ကာယဝိညေယျံ ရူပံ အတ္ထိ သုခသမ္ဖဿံ၊ အတ္ထိ ဒုက္ခသမ္ဖဿံ၊ မနောဓာတုဝိညေယျံ ရူပံ၊ မနောဝိညာဏဓာတုဝိညေယျံ ရူပံ. ဧဝံ အဋ္ဌဝိဓေန ရူပက္ခန္ဓော.

နဝဝိဓေန ရူပက္ခန္ဓော – စက္ခုန္ဒြိယံ၊ သောတိန္ဒြိယံ၊ ဃာနိန္ဒြိယံ၊ ဇိဝှိန္ဒြိယံ၊ ကာယိန္ဒြိယံ၊ ဣတ္ထိန္ဒြိယံ၊ ပုရိသိန္ဒြိယံ၊ ဇီဝိတိန္ဒြိယံ၊ ယဉ္စ ရူပံ န ဣန္ဒြိယံ. ဧဝံ နဝဝိဓေန ရူပက္ခန္ဓော.

ဒသဝိဓေန ရူပက္ခန္ဓော – စက္ခုန္ဒြိယံ၊ သောတိန္ဒြိယံ၊ ဃာနိန္ဒြိယံ၊ ဇိဝှိန္ဒြိယံ၊ ကာယိန္ဒြိယံ၊ ဣတ္ထိန္ဒြိယံ၊ ပုရိသိန္ဒြိယံ၊ ဇီဝိတိန္ဒြိယံ၊ န ဣန္ဒြိယံ ရူပံ အတ္ထိ သပ္ပဋိဃံ၊ အတ္ထိ အပ္ပဋိဃံ. ဧဝံ ဒသဝိဓေန ရူပက္ခန္ဓော.

ဧကာဒသဝိဓေန ရူပက္ခန္ဓော – စက္ခာယတနံ၊ သောတာယတနံ၊ ဃာနာယတနံ၊ ဇိဝှါယတနံ၊ ကာယာယတနံ၊ ရူပါယတနံ၊ သဒ္ဒါယတနံ၊ ဂန္ဓာယတနံ၊ ရသာယတနံ၊ ဖောဋ္ဌဗ္ဗာယတနံ၊ ယဉ္စ ရူပံ အနိဒဿနအပ္ပဋိဃံ ဓမ္မာယတနပရိယာပန္နံ. ဧဝံ ဧကာဒသဝိဓေန ရူပက္ခန္ဓော.

အယံ ဝုစ္စတိ ရူပက္ခန္ဓော.