ပစ္စနီယံ

နအဓိပတိပစ္စယော

၅. ဟေတုံ သဟေတုကံ ဓမ္မံ ပဋိစ္စ ဟေတု သဟေတုကော ဓမ္မော ဥပ္ပဇ္ဇတိ နအဓိပတိပစ္စယာ. (သံခိတ္တံ.)

နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နကမ္မေ တီဏိ၊ နဝိပါကေ နဝ၊ နဝိပ္ပယုတ္တေ နဝ. (သံခိတ္တံ.)

ဟေတုပစ္စယာ နအဓိပတိယာ နဝ. (သံခိတ္တံ.)

နအဓိပတိပစ္စယာ ဟေတုယာ နဝ. (သံခိတ္တံ.)

(သဟဇာတဝါရမ္ပိ ပစ္စယဝါရမ္ပိ နိဿယဝါရမ္ပိ သံသဋ္ဌဝါရမ္ပိ သမ္ပယုတ္တဝါရမ္ပိ ပဋိစ္စဝါရသဒိသံ.)

ဟေတု-အာရမ္မဏပစ္စယာ

၆. ဟေတု သဟေတုကော ဓမ္မော ဟေတုဿ သဟေတုကဿ ဓမ္မဿ ဟေတုပစ္စယေန ပစ္စယော. ဟေတု သဟေတုကော ဓမ္မော နဟေတုဿ သဟေတုကဿ ဓမ္မဿ ဟေတုပစ္စယေန ပစ္စယော. ဟေတု သဟေတုကော ဓမ္မော ဟေတုဿ သဟေတုကဿ စ နဟေတုဿ သဟေတုကဿ စ ဓမ္မဿ ဟေတုပစ္စယေန ပစ္စယော. (၃)

၇. ဟေတု သဟေတုကော ဓမ္မော ဟေတုဿ သဟေတုကဿ ဓမ္မဿ အာရမ္မဏပစ္စယေန ပစ္စယော. ဟေတု သဟေတုကော ဓမ္မော နဟေတုဿ သဟေတုကဿ ဓမ္မဿ အာရမ္မဏပစ္စယေန ပစ္စယော. ဟေတု သဟေတုကော ဓမ္မော ဟေတုဿ သဟေတုကဿ စ နဟေတုဿ သဟေတုကဿ စ ဓမ္မဿ အာရမ္မဏပစ္စယေန ပစ္စယော. (၃)

နဟေတု သဟေတုကော ဓမ္မော နဟေတုဿ သဟေတုကဿ ဓမ္မဿ အာရမ္မဏပစ္စယေန ပစ္စယော. နဟေတု သဟေတုကော ဓမ္မော ဟေတုဿ သဟေတုကဿ ဓမ္မဿ အာရမ္မဏပစ္စယေန ပစ္စယော. နဟေတု သဟေတုကော ဓမ္မော ဟေတုဿ သဟေတုကဿ စ နဟေတုဿ သဟေတုကဿ စ ဓမ္မဿ အာရမ္မဏပစ္စယေန ပစ္စယော. (၃)

ဟေတု သဟေတုကော စ နဟေတု သဟေတုကော စ ဓမ္မာ ဟေတုဿ သဟေတုကဿ ဓမ္မဿ အာရမ္မဏပစ္စယေန ပစ္စယော. ဟေတု သဟေတုကော စ နဟေတု သဟေတုကော စ ဓမ္မာ နဟေတုဿ သဟေတုကဿ ဓမ္မဿ အာရမ္မဏပစ္စယေန ပစ္စယော. ဟေတု သဟေတုကော စ နဟေတု သဟေတုကော စ ဓမ္မာ ဟေတုဿ သဟေတုကဿ စ နဟေတုဿ သဟေတုကဿ စ ဓမ္မဿ အာရမ္မဏပစ္စယေန ပစ္စယော. (၃) (သံခိတ္တံ.)

၈. ဟေတုယာ တီဏိ၊ အာရမ္မဏေ နဝ။ပေ။ ဥပနိဿယေ နဝ အဝိဂတေ နဝ. (သံခိတ္တံ.)

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)