၂၂-၆၈. သနိဒဿနတ္တိက-ဥပါဒိန္နဒုကံ

၁၂၄. အနိဒဿနအပ္ပဋိဃံ ဥပါဒိန္နံ ဓမ္မံ ပဋိစ္စ နအနိဒဿနအပ္ပဋိဃော နဥပါဒိန္နော ဓမ္မော ဥပ္ပဇ္ဇတိ ဟေတုပစ္စယာ. အနိဒဿနအပ္ပဋိဃံ ဥပါဒိန္နံ ဓမ္မံ ပဋိစ္စ နသနိဒဿနသပ္ပဋိဃော နဥပါဒိန္နော ဓမ္မော ဥပ္ပဇ္ဇတိ ဟေတုပစ္စယာ။ပေ။ အနိဒဿနအပ္ပဋိဃံ ဥပါဒိန္နံ ဓမ္မံ ပဋိစ္စ နသနိဒဿနသပ္ပဋိဃော နဥပါဒိန္နော စ နအနိဒဿနသပ္ပဋိဃော နဥပါဒိန္နော စ ဓမ္မာ ဥပ္ပဇ္ဇန္တိ ဟေတုပစ္စယာ။ ဟေတုယာ ဆ.

၁၂၅. သနိဒဿနသပ္ပဋိဃော အနုပါဒိန္နော ဓမ္မော နသနိဒဿနသပ္ပဋိဃဿ နအနုပါဒိန္နဿ ဓမ္မဿ အာရမ္မဏပစ္စယေန ပစ္စယော. (သံခိတ္တံ.) အာရမ္မဏေ နဝ.