၂၂-၁၀. သနိဒဿနတ္တိက-သပ္ပဋိဃဒုကံ

၉၇. အနိဒဿနသပ္ပဋိဃံ သပ္ပဋိဃံ ဓမ္မံ ပဋိစ္စ နအနိဒဿနသပ္ပဋိဃော နသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. အနိဒဿနသပ္ပဋိဃံ သပ္ပဋိဃံ ဓမ္မံ ပဋိစ္စ နသနိဒဿနသပ္ပဋိဃော နသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. အနိဒဿနသပ္ပဋိဃံ သပ္ပဋိဃံ ဓမ္မံ ပဋိစ္စ နသနိဒဿနသပ္ပဋိဃော နသပ္ပဋိဃော စ နအနိဒဿနသပ္ပဋိဃော နသပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ တီဏိ.

အနိဒဿနအပ္ပဋိဃံ အပ္ပဋိဃံ ဓမ္မံ ပဋိစ္စ နအနိဒဿနအပ္ပဋိဃော နအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. အနိဒဿနအပ္ပဋိဃံ အပ္ပဋိဃံ ဓမ္မံ ပဋိစ္စ နသနိဒဿနသပ္ပဋိဃော နအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ။ပေ။ အနိဒဿနအပ္ပဋိဃံ အပ္ပဋိဃံ ဓမ္မံ ပဋိစ္စ နအနိဒဿနသပ္ပဋိဃော နအပ္ပဋိဃော စ နအနိဒဿနအပ္ပဋိဃော နအပ္ပဋိဃော စ ဓမ္မာ ဥပ္ပဇ္ဇန္တိ ဟေတုပစ္စယာ။ ဟေတုယာ ပဉ္စ.