၂-၁. ဝေဒနာတ္တိက-ဟေတုဒုကံ

၆၅. သုခါယ ဝေဒနာယ သမ္ပယုတ္တံ ဟေတုံ ဓမ္မံ ပဋိစ္စ နသုခါယ ဝေဒနာယ သမ္ပယုတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ. သုခါယ ဝေဒနာယ သမ္ပယုတ္တံ ဟေတုံ ဓမ္မံ ပဋိစ္စ နဒုက္ခာယ ဝေဒနာယ သမ္ပယုတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ. သုခါယ ဝေဒနာယ သမ္ပယုတ္တံ ဟေတုံ ဓမ္မံ ပဋိစ္စ နအဒုက္ခမသုခါယ ဝေဒနာယ သမ္ပယုတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ။ပေ။ သတ္တ ပဉှာ.

ဒုက္ခာယ ဝေဒနာယ သမ္ပယုတ္တံ ဟေတုံ ဓမ္မံ ပဋိစ္စ နဒုက္ခာယ ဝေဒနာယ သမ္ပယုတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ။ သတ္တ ပဉှာ.

အဒုက္ခမသုခါယ ဝေဒနာယ သမ္ပယုတ္တံ ဟေတုံ ဓမ္မံ ပဋိစ္စ နအဒုက္ခမသုခါယ ဝေဒနာယ သမ္ပယုတ္တော နဟေတု ဓမ္မော ဥပ္ပဇ္ဇတိ ဟေတုပစ္စယာ။ သတ္တ ပဉှာ. ဟေတုယာ ဧကဝီသ။ပေ။ အဝိဂတေ ဧကဝီသ. (သဗ္ဗတ္ထ ဧကဝီသ.)

၆၆. သုခါယ ဝေဒနာယ သမ္ပယုတ္တံ နဟေတုံ ဓမ္မံ ပဋိစ္စ နဒုက္ခာယ ဝေဒနာယ သမ္ပယုတ္တော နနဟေတု ဓမ္မော ဥပ္ပဇ္ဇတိ ဟေတုပစ္စယာ. သုခါယ ဝေဒနာယ သမ္ပယုတ္တံ နဟေတုံ ဓမ္မံ ပဋိစ္စ နအဒုက္ခမသုခါယ ဝေဒနာယ သမ္ပယုတ္တော နနဟေတု ဓမ္မော ဥပ္ပဇ္ဇတိ ဟေတုပစ္စယာ. သုခါယ ဝေဒနာယ သမ္ပယုတ္တံ နဟေတုံ ဓမ္မံ ပဋိစ္စ နဒုက္ခာယ ဝေဒနာယ သမ္ပယုတ္တော နနဟေတု စ နအဒုက္ခမသုခါယ ဝေဒနာယ သမ္ပယုတ္တော နနဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. တီဏိ.

ဒုက္ခာယ ဝေဒနာယ သမ္ပယုတ္တံ နဟေတုံ ဓမ္မံ ပဋိစ္စ နသုခါယ ဝေဒနာယ သမ္ပယုတ္တော နနဟေတု ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဒုက္ခမသုခါယ ဝေဒနာယ သမ္ပယုတ္တံ နဟေတုံ ဓမ္မံ ပဋိစ္စ နသုခါယ ဝေဒနာယ သမ္ပယုတ္တော နနဟေတု ဓမ္မော ဥပ္ပဇ္ဇတိ ဟေတုပစ္စယာ။ တီဏိ။ ဟေတုယာ နဝ.