၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁. ကုသလံ ဟေတုံ ဓမ္မံ ပဋိစ္စ နကုသလော နဟေတု ဓမ္မော ဥပ္ပဇ္ဇတိ ဟေတုပစ္စယာ. ကုသလံ ဟေတုံ ဓမ္မံ ပဋိစ္စ နအကုသလော နဟေတု ဓမ္မော ဥပ္ပဇ္ဇတိ ဟေတုပစ္စယာ. ကုသလံ ဟေတုံ ဓမ္မံ ပဋိစ္စ နအဗျာကတော နဟေတု ဓမ္မော ဥပ္ပဇ္ဇတိ ဟေတုပစ္စယာ. ကုသလံ ဟေတုံ ဓမ္မံ ပဋိစ္စ နအကုသလော နဟေတု စ နအဗျာကတော နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. ကုသလံ ဟေတုံ ဓမ္မံ ပဋိစ္စ နကုသလော နဟေတု စ နအကုသလော နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. (၅)

အကုသလံ ဟေတုံ ဓမ္မံ ပဋိစ္စ နအကုသလော နဟေတု ဓမ္မော ဥပ္ပဇ္ဇတိ ဟေတုပစ္စယာ. အကုသလံ ဟေတုံ ဓမ္မံ ပဋိစ္စ နကုသလော နဟေတု ဓမ္မော ဥပ္ပဇ္ဇတိ ဟေတုပစ္စယာ. အကုသလံ ဟေတုံ ဓမ္မံ ပဋိစ္စ နအဗျာကတော နဟေတု ဓမ္မော ဥပ္ပဇ္ဇတိ ဟေတုပစ္စယာ. အကုသလံ ဟေတုံ ဓမ္မံ ပဋိစ္စ နကုသလော နဟေတု စ နအဗျာကတော နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. အကုသလံ ဟေတုံ ဓမ္မံ ပဋိစ္စ နကုသလော နဟေတု စ နအကုသလော နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. (၅)

အဗျာကတံ ဟေတုံ ဓမ္မံ ပဋိစ္စ နကုသလော နဟေတု ဓမ္မော ဥပ္ပဇ္ဇတိ ဟေတုပစ္စယာ. အဗျာကတံ ဟေတုံ ဓမ္မံ ပဋိစ္စ နအကုသလော နဟေတု ဓမ္မော ဥပ္ပဇ္ဇတိ ဟေတုပစ္စယာ. အဗျာကတံ ဟေတုံ ဓမ္မံ ပဋိစ္စ နကုသလော နဟေတု စ နအကုသလော နဟေတု စ ဓမ္မာ ဥပ္ပဇ္ဇန္တိ ဟေတုပစ္စယာ. (၃) (သံခိတ္တံ.)

ဟေတုယာ တေရသ၊ အာရမ္မဏေ နဝ။ပေ။ အဝိဂတေ တေရသ.

ပစ္စနီယံ

နအာရမ္မဏပစ္စယော

၂. ကုသလံ ဟေတုံ ဓမ္မံ ပဋိစ္စ နကုသလော နဟေတု ဓမ္မော ဥပ္ပဇ္ဇတိ နအာရမ္မဏပစ္စယာ. (သံခိတ္တံ.)

နအာရမ္မဏေ နဝ၊ နအဓိပတိယာ တေရသ။ပေ။ နဝိပ္ပယုတ္တေ နဝ.

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ ဝိတ္ထာရေတဗ္ဗံ.)

ဟေတု-အာရမ္မဏပစ္စယာ

၃. ကုသလော ဟေတု ဓမ္မော နကုသလဿ နဟေတုဿ ဓမ္မဿ ဟေတုပစ္စယေန ပစ္စယော. ကုသလော ဟေတု ဓမ္မော နအကုသလဿ နဟေတုဿ ဓမ္မဿ ဟေတုပစ္စယေန ပစ္စယော. ကုသလော ဟေတု ဓမ္မော နအဗျာကတဿ နဟေတုဿ ဓမ္မဿ ဟေတုပစ္စယေန ပစ္စယော. ကုသလော ဟေတု ဓမ္မော နအကုသလဿ နဟေတုဿ စ နအဗျာကတဿ နဟေတုဿ စ ဓမ္မဿ ဟေတုပစ္စယေန ပစ္စယော. ကုသလော ဟေတု ဓမ္မော နကုသလဿ နဟေတုဿ စ နအကုသလဿ နဟေတုဿ စ ဓမ္မဿ ဟေတုပစ္စယေန ပစ္စယော. (၅)

အကုသလော ဟေတု ဓမ္မော နအကုသလဿ နဟေတုဿ ဓမ္မဿ ဟေတုပစ္စယေန ပစ္စယော။ ပဉ္စ.

အဗျာကတော ဟေတု ဓမ္မော နကုသလဿ နဟေတုဿ ဓမ္မဿ ဟေတုပစ္စယေန ပစ္စယော။ တီဏိ.

ကုသလော ဟေတု ဓမ္မော နကုသလဿ နဟေတုဿ ဓမ္မဿ အာရမ္မဏပစ္စယေန ပစ္စယော. (သံခိတ္တံ.)

၄. ဟေတုယာ တေရသ၊ အာရမ္မဏေ အဋ္ဌာရသ။ပေ။ အဝိဂတေ တေရသ. (ပဉှာဝါရံ ဝိတ္ထာရေတဗ္ဗံ.)

၅. ကုသလံ နဟေတုံ ဓမ္မံ ပဋိစ္စ နအကုသလော နနဟေတု ဓမ္မော ဥပ္ပဇ္ဇတိ ဟေတုပစ္စယာ. ကုသလံ နဟေတုံ ဓမ္မံ ပဋိစ္စ နအဗျာကတော နနဟေတု ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.)

ဟေတုယာ နဝ၊ အာရမ္မဏေ နဝ။ပေ။ အဝိဂတေ နဝ. (သဗ္ဗတ္ထ နဝ.)