၁-၁၄-၁၉. ကုသလတ္တိက-အာသဝဂေါစ္ဆကံ

၂၄. အကုသလံ အာသဝံ ဓမ္မံ ပဋိစ္စ နအကုသလော နအာသဝေါ ဓမ္မော။ပေ။ နကုသလော နအာသဝေါ ဓမ္မော။ပေ။ နအဗျာကတော နအာသဝေါ ဓမ္မော။ပေ။ နကုသလော နအာသဝေါ စ နအဗျာကတော နအာသဝေါ စ ဓမ္မာ။ပေ။ နကုသလော နအာသဝေါ စ နအကုသလော နအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ ပဉ္စ၊ အာရမ္မဏေ တီဏိ။ပေ။ အဝိဂတေ ပဉ္စ.

အကုသလံ နောအာသဝံ ဓမ္မံ ပဋိစ္စ နကုသလော နနောအာသဝေါ ဓမ္မော ဥပ္ပဇ္ဇတိ ဟေတုပစ္စယာ. အကုသလံ နောအာသဝံ ဓမ္မံ ပဋိစ္စ နအဗျာကတော နနောအာသဝေါ ဓမ္မော။ပေ။ နကုသလော နနောအာသဝေါ စ နအဗျာကတော နနောအာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ တီဏိ။ပေ။ အဝိဂတေ တီဏိ.

၂၅. အဗျာကတံ သာသဝံ ဓမ္မံ ပဋိစ္စ။ပေ။ (လောကိယဒုကသဒိသံ).

၂၆. အကုသလံ အာသဝသမ္ပယုတ္တံ ဓမ္မံ ပဋိစ္စ နအကုသလော နအာသဝသမ္ပယုတ္တော ဓမ္မော ။ပေ။ နကုသလော နအာသဝသမ္ပယုတ္တော ဓမ္မော။ပေ။ နအဗျာကတော နအာသဝသမ္ပယုတ္တော ဓမ္မော။ပေ။ နကုသလော နအာသဝသမ္ပယုတ္တော စ နအဗျာကတော နအာသဝသမ္ပယုတ္တော စ ဓမ္မာ။ပေ။ နကုသလော နအာသဝသမ္ပယုတ္တော စ နအကုသလော နအာသဝသမ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ ပဉ္စ.

အကုသလံ အာသဝဝိပ္ပယုတ္တံ ဓမ္မံ ပဋိစ္စ နကုသလော နအာသဝဝိပ္ပယုတ္တော ဓမ္မော။ပေ။ နအဗျာကတော နအာသဝဝိပ္ပယုတ္တော ဓမ္မော။ပေ။ နကုသလော နအာသဝဝိပ္ပယုတ္တော စ နအဗျာကတော နအာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ တီဏိ.

၂၇. အကုသလံ အာသဝဉ္စေဝ သာသဝဉ္စ ဓမ္မံ ပဋိစ္စ နအကုသလော နအာသဝေါ စေဝ နအနာသဝေါ စ ဓမ္မော။ပေ။ နကုသလော နအာသဝေါ စေဝ နအနာသဝေါ စ ဓမ္မော။ပေ။ နအဗျာကတော နအာသဝေါ စေဝ နအနာသဝေါ စ ဓမ္မော။ပေ။ နကုသလော နအာသဝေါ စေဝ နအနာသဝေါ စ နအဗျာကတော နအာသဝေါ စေဝ နအနာသဝေါ စ ဓမ္မာ။ပေ။ နကုသလော နအာသဝေါ စေဝ နအနာသဝေါ စ နအကုသလော နအာသဝေါ စေဝ နအနာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ ပဉ္စ.

အကုသလံ သာသဝဉ္စေဝ နော စ အာသဝံ ဓမ္မံ ပဋိစ္စ နအကုသလော နအနာသဝေါ စေဝ နနော စ အာသဝေါ ဓမ္မော။ပေ။ နအဗျာကတော နအနာသဝေါ စေဝ နနော စ အာသဝေါ ဓမ္မော။ပေ။ နကုသလော နအနာသဝေါ စေဝ နနော စ အာသဝေါ နအဗျာကတော နအနာသဝေါ စေဝ နနော အာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ တီဏိ.

၂၈. အကုသလံ အာသဝဉ္စေဝ အာသဝသမ္ပယုတ္တဉ္စ ဓမ္မံ ပဋိစ္စ နကုသလော နအာသဝေါ စေဝ နအာသဝဝိပ္ပယုတ္တော စ ဓမ္မော။ပေ။ နအဗျာကတော နအာသဝေါ စေဝ နအာသဝဝိပ္ပယုတ္တော စ ဓမ္မော။ပေ။ နကုသလော နအာသဝေါ စေဝ နအာသဝဝိပ္ပယုတ္တော စ နအဗျာကတော နအာသဝေါ စေဝ နအာသဝဝိပ္ပယုတ္တော စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ တီဏိ.

အကုသလံ အာသဝသမ္ပယုတ္တဉ္စေဝ နော စ အာသဝံ ဓမ္မံ ပဋိစ္စ နကုသလော နအာသဝဝိပ္ပယုတ္တော စေဝ နနော စ အာသဝေါ ဓမ္မော။ပေ။ နအဗျာကတော နအာသဝဝိပ္ပယုတ္တော စေဝ နနော စ အာသဝေါ ဓမ္မော ။ပေ။ နကုသလော နအာသဝဝိပ္ပယုတ္တော စေဝ နနောအာသဝေါ စ နအဗျာကတော နအာသဝဝိပ္ပယုတ္တော စေဝ နနော စ အာသဝေါ စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ တီဏိ.

၂၉. အဗျာကတံ အာသဝဝိပ္ပယုတ္တံ သာသဝံ ဓမ္မံ ပဋိစ္စ။ပေ။ (လောကိယဒုကသဒိသံ).