၁-၁၁. ကုသလတ္တိက-ရူပီဒုကံ

၂၀. အဗျာကတံ ရူပိံ ဓမ္မံ ပဋိစ္စ နကုသလော နရူပီ ဓမ္မော ဥပ္ပဇ္ဇတိ ဟေတုပစ္စယာ. အဗျာကတံ ရူပိံ ဓမ္မံ ပဋိစ္စ နအကုသလော နရူပီ ဓမ္မော ဥပ္ပဇ္ဇတိ ဟေတုပစ္စယာ. အဗျာကတံ ရူပိံ ဓမ္မံ ပဋိစ္စ နကုသလော နရူပီ စ နအကုသလော နရူပီ စ ဓမ္မာ ဥပ္ပဇ္ဇန္တိ ဟေတုပစ္စယာ. ဟေတုယာ တီဏိ.

ကုသလံ အရူပိံ ဓမ္မံ ပဋိစ္စ တီဏိ. အကုသလံ အရူပိံ ဓမ္မံ ပဋိစ္စ တီဏိ. အဗျာကတံ အရူပိံ ဓမ္မံ ပဋိစ္စ တီဏိ. ဟေတုယာ နဝ.