၆၆-၁. အဇ္ဈတ္တိကဒုက-ကုသလတ္တိကံ

၅၈. အဇ္ဈတ္တိကံ ကုသလံ ဓမ္မံ ပဋိစ္စ နအဇ္ဈတ္တိကော နကုသလော ဓမ္မော ဥပ္ပဇ္ဇတိ ဟေတုပစ္စယာ. ဗာဟိရံ ကုသလံ ဓမ္မံ ပဋိစ္စ နအဇ္ဈတ္တိကော နကုသလော ဓမ္မော ဥပ္ပဇ္ဇတိ ဟေတုပစ္စယာ. အဇ္ဈတ္တိကံ ကုသလဉ္စ ဗာဟိရံ ကုသလဉ္စ ဓမ္မံ ပဋိစ္စ နအဇ္ဈတ္တိကော နကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ တီဏိ.

အဇ္ဈတ္တိကံ အကုသလံ ဓမ္မံ ပဋိစ္စ နအဇ္ဈတ္တိကော နအကုသလော ဓမ္မော ဥပ္ပဇ္ဇတိ ဟေတုပစ္စယာ. ဗာဟိရံ အကုသလံ ဓမ္မံ ပဋိစ္စ နအဇ္ဈတ္တိကော နအကုသလော ဓမ္မော ဥပ္ပဇ္ဇတိ ဟေတုပစ္စယာ. အဇ္ဈတ္တိကံ အကုသလဉ္စ ဗာဟိရံ အကုသလဉ္စ ဓမ္မံ ပဋိစ္စ နအဇ္ဈတ္တိကော နအကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ တီဏိ. (အဗျာကတမူလံ တီဏိယေဝ.)