ဓမ္မာနုလောမပစ္စနီယေ ဒုကတိကပဋ္ဌာနံ
၁-၁. ဟေတုဒုက-ကုသလတ္တိကံ
၁. ကုသလပဒံ
၁-၇. ပဋိစ္စဝါရာဒိ
၁. ဟေတုံ ကုသလံ ဓမ္မံ ပဋိစ္စ နဟေတု နကုသလော ဓမ္မော ဥပ္ပဇ္ဇတိ ဟေတုပစ္စယာ. နဟေတုံ ကုသလံ ဓမ္မံ ပဋိစ္စ နနဟေတု နကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုံ ကုသလဉ္စ နဟေတုံ ကုသလဉ္စ ဓမ္မံ ပဋိစ္စ နဟေတု နကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (စိတ္တသမုဋ္ဌာနမေဝ၊ အာရမ္မဏံ နတ္ထိ).
ဟေတုယာ တီဏိ၊ အဓိပတိယာ တီဏိ။ပေ။ အဝိဂတေ တီဏိ.
(သဟဇာတဝါရမ္ပိ။ပေ။ နိဿယဝါရမ္ပိ ပဋိစ္စဝါရသဒိသံ.)
၂. ဟေတု ကုသလော ဓမ္မော နဟေတုဿ နကုသလဿ ဓမ္မဿ ဟေတုပစ္စယေန ပစ္စယော. (၁)
ဟေတု ကုသလော ဓမ္မော နဟေတုဿ နကုသလဿ ဓမ္မဿ အာရမ္မဏပစ္စယေန ပစ္စယော။ တီဏိ.
နဟေတု ကုသလော ဓမ္မော နနဟေတုဿ နကုသလဿ ဓမ္မဿ အာရမ္မဏပစ္စယေန ပစ္စယော။ တီဏိ.
ဟေတု ကုသလော စ နဟေတု ကုသလော စ ဓမ္မာ နဟေတုဿ နကုသလဿ ဓမ္မဿ အာရမ္မဏပစ္စယေန ပစ္စယော။ တီဏိ. (သံခိတ္တံ.)
၃. ဟေတုယာ ဧကံ၊ အာရမ္မဏေ နဝ၊ အဓိပတိယာ နဝ။ပေ။ အဝိဂတေ တီဏိ. (ပဉှာဝါရမ္ပိ ဝိတ္ထာရေတဗ္ဗံ.)
၂. အကုသလပဒံ
၁-၇. ပဋိစ္စဝါရာဒိ
၄. ဟေတုံ အကုသလံ ဓမ္မံ ပဋိစ္စ နဟေတု နအကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)
နဟေတုံ အကုသလံ ဓမ္မံ ပဋိစ္စ နဟေတု နအကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)
ဟေတုံ အကုသလဉ္စ နဟေတုံ အကုသလဉ္စ ဓမ္မံ ပဋိစ္စ နဟေတု နအကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.) ဟေတုယာ တီဏိ၊ အဓိပတိယာ တီဏိ။ပေ။ အဝိဂတေ တီဏိ.
(သဟဇာတဝါရမ္ပိ။ပေ။ နိဿယဝါရမ္ပိ ပဋိစ္စဝါရသဒိသံ.)
၅. ဟေတု အကုသလော ဓမ္မော နဟေတုဿ နအကုသလဿ ဓမ္မဿ ဟေတုပစ္စယေန ပစ္စယော. (၁)
ဟေတု အကုသလော ဓမ္မော နဟေတုဿ နအကုသလဿ ဓမ္မဿ အာရမ္မဏပစ္စယေန ပစ္စယော။ တီဏိ.
နဟေတု အကုသလော ဓမ္မော နနဟေတုဿ နအကုသလဿ ဓမ္မဿ အာရမ္မဏပစ္စယေန ပစ္စယော။ တီဏိ.
ဟေတု အကုသလော စ နဟေတု အကုသလော စ ဓမ္မာ နဟေတုဿ နအကုသလဿ ဓမ္မဿ အာရမ္မဏပစ္စယေန ပစ္စယော။ တီဏိ. (သံခိတ္တံ.)
၆. ဟေတုယာ ဧကံ၊ အာရမ္မဏေ နဝ၊ အဓိပတိယာ ဧကံ။ပေ။ အဝိဂတေ တီဏိ.
၃. အဗျာကတပဒံ
၃. ပစ္စယဝါရော
၇. နဟေတုံ အဗျာကတံ ဓမ္မံ ပစ္စယာ နနဟေတု နအဗျာကတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ. (နိဿယဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)
၁-၂. ဟေတုဒုက-ဝေဒနာတ္တိကံ
၈. ဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ နဟေတု နသုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. (၁)
နဟေတုံ သုခါယ ဝေဒနာယ သမ္ပယုတ္တံ ဓမ္မံ ပဋိစ္စ နဟေတု နသုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. (၁)
ဟေတုံ သုခါယ ဝေဒနာယ သမ္ပယုတ္တဉ္စ နဟေတုံ သုခါယ ဝေဒနာယ သမ္ပယုတ္တဉ္စ ဓမ္မံ ပဋိစ္စ နဟေတု နသုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.) ဟေတုယာ တီဏိ၊ အာရမ္မဏေ တီဏိ။ပေ။ အဝိဂတေ တီဏိ.
(သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)
၉. ဟေတုံ ဒုက္ခာယ ဝေဒနာယ သမ္ပယုတ္တံ ဓမ္မံ ပဋိစ္စ နဟေတု နဒုက္ခာယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.) ဟေတုယာ တီဏိ. (သဗ္ဗတ္ထ ဝိတ္ထာရော.)
၁၀. ဟေတုံ အဒုက္ခမသုခါယ ဝေဒနာယ သမ္ပယုတ္တံ ဓမ္မံ ပဋိစ္စ နဟေတု နအဒုက္ခမသုခါယ ဝေဒနာယ သမ္ပယုတ္တော ဓမ္မော ဥပ္ပဇ္ဇတိ ဟေတုပစ္စယာ. (သံခိတ္တံ.) ဟေတုယာ တီဏိ. (သဗ္ဗတ္ထ ဝိတ္ထာရော.)
၁-၃. ဟေတုဒုက-ဝိပါကတ္တိကံ
၁၁. ဟေတုံ ဝိပါကံ ဓမ္မံ ပဋိစ္စ နဟေတု နဝိပါကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ ဝိပါကဓမ္မဓမ္မံ ပဋိစ္စ နဟေတု နဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
နဟေတုံ နေဝဝိပါကနဝိပါကဓမ္မဓမ္မံ ပဋိစ္စ နနဟေတု နနေဝဝိပါကနဝိပါကဓမ္မဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၄. ဟေတုဒုက-ဥပါဒိန္နတ္တိကံ
၁၂. ဟေတုံ ဥပါဒိန္နုပါဒါနိယံ ဓမ္မံ ပဋိစ္စ နဟေတု နဥပါဒိန္နုပါဒါနိယော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
နဟေတုံ အနုပါဒိန္နအနုပါဒါနိယံ ဓမ္မံ ပဋိစ္စ နနဟေတု နအနုပါဒိန္နအနုပါဒါနိယော ဓမ္မော ဥပ္ပဇ္ဇတိ ဟေတုပစ္စယာ.
ဟေတုံ အနုပါဒိန္နအနုပါဒါနိယံ ဓမ္မံ ပဋိစ္စ နဟေတု နအနုပါဒိန္နအနုပါဒါနိယော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၅. ဟေတုဒုက-သံကိလိဋ္ဌတ္တိကံ
၁၃. ဟေတုံ သံကိလိဋ္ဌသံကိလေသိကံ ဓမ္မံ ပဋိစ္စ နဟေတု နသံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
နဟေတုံ အသံကိလိဋ္ဌသံကိလေသိကံ ဓမ္မံ ပဋိစ္စ နနဟေတု နအသံကိလိဋ္ဌသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ အသံကိလိဋ္ဌအသံကိလေသိကံ ဓမ္မံ ပဋိစ္စ နဟေတု နအသံကိလိဋ္ဌအသံကိလေသိကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၆. ဟေတုဒုက-ဝိတက္ကတ္တိကံ
၁၄. ဟေတုံ သဝိတက္ကသဝိစာရံ ဓမ္မံ ပဋိစ္စ နဟေတု နသဝိတက္ကသဝိစာရော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ အဝိတက္ကဝိစာရမတ္တံ ဓမ္မံ ပဋိစ္စ နဟေတု နအဝိတက္ကဝိစာရမတ္တော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
နဟေတုံ အဝိတက္ကအဝိစာရံ ဓမ္မံ ပဋိစ္စ နနဟေတု နအဝိတက္ကအဝိစာရော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၇. ဟေတုဒုက-ပီတိတ္တိကံ
၁၅. ဟေတုံ ပီတိသဟဂတံ ဓမ္မံ ပဋိစ္စ နဟေတု နပီတိသဟဂတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ သုခသဟဂတံ ဓမ္မံ ပဋိစ္စ နဟေတု နသုခသဟဂတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ ဥပေက္ခာသဟဂတံ ဓမ္မံ ပဋိစ္စ နဟေတု နဥပေက္ခာသဟဂတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၈. ဟေတုဒုက-ဒဿနတ္တိကံ
၁၆. ဟေတုံ ဒဿနေန ပဟာတဗ္ဗံ ဓမ္မံ ပဋိစ္စ နဟေတု နဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ ဘာဝနာယ ပဟာတဗ္ဗံ ဓမ္မံ ပဋိစ္စ နဟေတု နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
နဟေတုံ နေဝဒဿနေန နဘာဝနာယ ပဟာတဗ္ဗံ ဓမ္မံ ပစ္စယာ နနဟေတု နနေဝဒဿနေန နဘာဝနာယ ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၉. ဟေတုဒုက-ဒဿနဟေတုတ္တိကံ
၁၇. ဟေတုံ ဒဿနေန ပဟာတဗ္ဗဟေတုကံ ဓမ္မံ ပဋိစ္စ နဟေတု နဒဿနေန ပဟာတဗ္ဗဟေတုကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ ဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နဟေတု နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ နေဝဒဿနေန နဘာဝနာယ ပဟာတဗ္ဗဟေတုကံ ဓမ္မံ ပဋိစ္စ နဟေတု နနေဝဒဿနေန နဘာဝနာယ ပဟာတဗ္ဗဟေတုကော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
၁-၁၀. ဟေတုဒုက-အာစယဂါမိတ္တိကံ
၁၈. ဟေတုံ အာစယဂါမိံ ဓမ္မံ ပဋိစ္စ နဟေတု နအာစယဂါမီ ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ အပစယဂါမိံ ဓမ္မံ ပဋိစ္စ နဟေတု နအပစယဂါမီ ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
နဟေတုံ နေဝါစယဂါမိနာပစယဂါမိံ ဓမ္မံ ပစ္စယာ နနဟေတု နနေဝါစယဂါမိနာပစယဂါမီ ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၁၁. ဟေတုဒုက-သေက္ခတ္တိကံ
၁၉. ဟေတုံ သေက္ခံ ဓမ္မံ ပဋိစ္စ နဟေတု နသေက္ခော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ အသေက္ခံ ဓမ္မံ ပဋိစ္စ နဟေတု နအသေက္ခော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
နဟေတုံ နေဝသေက္ခနာသေက္ခံ ဓမ္မံ ပစ္စယာ နနဟေတု နနေဝသေက္ခနာသေက္ခော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၁၂. ဟေတုဒုက-ပရိတ္တတ္တိကံ
၂၀. နဟေတုံ ပရိတ္တံ ဓမ္မံ ပဋိစ္စ နနဟေတု နပရိတ္တော ဓမ္မော ဥပ္ပဇ္ဇတိ ဟေတုပစ္စယာ။ (တီဏိ).
ဟေတုံ မဟဂ္ဂတံ ဓမ္မံ ပဋိစ္စ နဟေတု နမဟဂ္ဂတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ အပ္ပမာဏံ ဓမ္မံ ပဋိစ္စ နဟေတု နအပ္ပမာဏော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၁၃. ဟေတုဒုက-ပရိတ္တာရမ္မဏတ္တိကံ
၂၁. ဟေတုံ ပရိတ္တာရမ္မဏံ ဓမ္မံ ပဋိစ္စ နဟေတု နပရိတ္တာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ (တီဏိ).
ဟေတုံ မဟဂ္ဂတာရမ္မဏံ ဓမ္မံ ပဋိစ္စ နဟေတု နမဟဂ္ဂတာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ (တီဏိ).
ဟေတုံ အပ္ပမာဏာရမ္မဏံ ဓမ္မံ ပဋိစ္စ နဟေတု နအပ္ပမာဏာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၁၄. ဟေတုဒုက-ဟီနတ္တိကံ
၂၂. ဟေတုံ ဟီနံ ဓမ္မံ ပဋိစ္စ နဟေတု နဟီနော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
နဟေတုံ မဇ္ဈိမံ ဓမ္မံ ပစ္စယာ နနဟေတု နမဇ္ဈိမော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ ပဏီတံ ဓမ္မံ ပဋိစ္စ နဟေတု နပဏီတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၁၅. ဟေတုဒုက-မိစ္ဆတ္တနိယတတ္တိကံ
၂၃. ဟေတုံ မိစ္ဆတ္တနိယတံ ဓမ္မံ ပဋိစ္စ နဟေတု နမိစ္ဆတ္တနိယတော ဓမ္မော ဥပ္ပဇ္ဇတိ ဟေတုပစ္စယာ။ (တီဏိ).
ဟေတုံ သမ္မတ္တနိယတံ ဓမ္မံ ပဋိစ္စ နဟေတု နသမ္မတ္တနိယတော ဓမ္မော ဥပ္ပဇ္ဇတိ ဟေတုပစ္စယာ ။ (တီဏိ).
နဟေတုံ အနိယတံ ဓမ္မံ ပစ္စယာ နနဟေတု နအနိယတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၁၆. ဟေတုဒုက-မဂ္ဂါရမ္မဏတ္တိကံ
၂၄. ဟေတုံ မဂ္ဂါရမ္မဏံ ဓမ္မံ ပဋိစ္စ နဟေတု နမဂ္ဂါရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ (တီဏိ).
ဟေတုံ မဂ္ဂဟေတုကံ ဓမ္မံ ပဋိစ္စ နဟေတု နမဂ္ဂဟေတုကော ဓမ္မော ဥပ္ပဇ္ဇတိ ဟေတုပစ္စယာ။ (တီဏိ).
ဟေတုံ မဂ္ဂါဓိပတိံ ဓမ္မံ ပဋိစ္စ နဟေတု နမဂ္ဂါဓိပတိ ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၁၇. ဟေတုဒုက-ဥပ္ပန္နတ္တိကံ
၂၅. ဟေတု အနုပ္ပန္နော ဓမ္မော နဟေတုဿ နအနုပ္ပန္နဿ ဓမ္မဿ အာရမ္မဏပစ္စယေန ပစ္စယော။ အာရမ္မဏေ နဝ၊ အဓိပတိယာ ဥပနိဿယေ နဝ.
ဟေတု ဥပ္ပါဒီ ဓမ္မော နဟေတုဿ နဥပ္ပါဒိဿ ဓမ္မဿ အာရမ္မဏပစ္စယေန ပစ္စယော။ အာရမ္မဏေ နဝ.
၁-၁၈. ဟေတုဒုက-အတီတတ္တိကံ
၂၆. ဟေတု အတီတော ဓမ္မော နဟေတုဿ နအတီတဿ ဓမ္မဿ အာရမ္မဏပစ္စယေန ပစ္စယော။ အာရမ္မဏေ နဝ.
ဟေတု အနာဂတော ဓမ္မော နဟေတုဿ နအနာဂတဿ ဓမ္မဿ အာရမ္မဏပစ္စယေန ပစ္စယော။ အာရမ္မဏေ နဝ.
၁-၁၉. ဟေတုဒုက-အတီတာရမ္မဏတ္တိကံ
၂၇. ဟေတုံ အတီတာရမ္မဏံ ဓမ္မံ ပဋိစ္စ နဟေတု နအတီတာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ အနာဂတာရမ္မဏံ ဓမ္မံ ပဋိစ္စ နဟေတု နအနာဂတာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုံ ပစ္စုပ္ပန္နာရမ္မဏံ ဓမ္မံ ပဋိစ္စ နဟေတု နပစ္စုပ္ပန္နာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၂၀. ဟေတုဒုက-အဇ္ဈတ္တာရမ္မဏတ္တိကံ
၂၈. ဟေတုံ အဇ္ဈတ္တာရမ္မဏံ ဓမ္မံ ပဋိစ္စ နဟေတု နအဇ္ဈတ္တာရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ (တီဏိ).
ဟေတုံ ဗဟိဒ္ဓါရမ္မဏံ ဓမ္မံ ပဋိစ္စ နဟေတု နဗဟိဒ္ဓါရမ္မဏော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
၁-၂၁. ဟေတုဒုက-သနိဒဿနတ္တိကံ
၂၉. နဟေတု သနိဒဿနသပ္ပဋိဃော ဓမ္မော နနဟေတုဿ နသနိဒဿနသပ္ပဋိဃဿ ဓမ္မဿ အာရမ္မဏပစ္စယေန ပစ္စယော။ပေ။ နဟေတု သနိဒဿနသပ္ပဋိဃော ဓမ္မော နဟေတုဿ နသနိဒဿနသပ္ပဋိဃဿ စ နနဟေတုဿ နသနိဒဿနသပ္ပဋိဃဿ စ ဓမ္မဿ အာရမ္မဏပစ္စယေန ပစ္စယော. အာရမ္မဏေ တီဏိ၊ အဓိပတိယာ ဥပနိဿယေ ပုရေဇာတေ အတ္ထိယာ အဝိဂတေ တီဏိ.
နဟေတုံ အနိဒဿနသပ္ပဋိဃံ ဓမ္မံ ပဋိစ္စ နဟေတု နအနိဒဿနသပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ။ပေ။ အဝိဂတေ ဧကံ.
ဟေတုံ အနိဒဿနအပ္ပဋိဃံ ဓမ္မံ ပဋိစ္စ နဟေတု နအနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. နဟေတုံ အနိဒဿနအပ္ပဋိဃံ ဓမ္မံ ပဋိစ္စ နဟေတု နအနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. ဟေတုံ အနိဒဿနအပ္ပဋိဃဉ္စ နဟေတုံ အနိဒဿနအပ္ပဋိဃဉ္စ ဓမ္မံ ပဋိစ္စ နဟေတု နအနိဒဿနအပ္ပဋိဃော ဓမ္မော ဥပ္ပဇ္ဇတိ ဟေတုပစ္စယာ. (၃) ဟေတုယာ တီဏိ.
၂-၁. သဟေတုကဒုက-ကုသလတ္တိကံ
၃၀. သဟေတုကံ ကုသလံ ဓမ္မံ ပဋိစ္စ နသဟေတုကော နကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
သဟေတုကံ အကုသလံ ဓမ္မံ ပဋိစ္စ နသဟေတုကော နအကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
အဟေတုကံ အဗျာကတံ ဓမ္မံ ပစ္စယာ နအဟေတုကော နအဗျာကတော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
၃-၁. ဟေတုသမ္ပယုတ္တဒုက-ကုသလတ္တိကံ
၃၁. ဟေတုသမ္ပယုတ္တံ ကုသလံ ဓမ္မံ ပဋိစ္စ နဟေတုသမ္ပယုတ္တော နကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
ဟေတုသမ္ပယုတ္တံ အကုသလံ ဓမ္မံ ပဋိစ္စ နဟေတုသမ္ပယုတ္တော နအကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
ဟေတုဝိပ္ပယုတ္တံ အဗျာကတံ ဓမ္မံ ပစ္စယာ နဟေတုဝိပ္ပယုတ္တော နအဗျာကတော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
၄-၅-၁. ဟေတုသဟေတုကာဒိဒုကာနိ-ကုသလတ္တိကံ
၃၂. ဟေတု စေဝ သဟေတုကော စ ကုသလော ဓမ္မော နဟေတုဿ စေဝ နအဟေတုကဿ စ နကုသလဿ ဓမ္မဿ အာရမ္မဏပစ္စယေန ပစ္စယော. ဟေတု စေဝ သဟေတုကော စ ကုသလော ဓမ္မော နအဟေတုကဿ စေဝ နန စ ဟေတုဿ နကုသလဿ ဓမ္မဿ အာရမ္မဏပစ္စယေန ပစ္စယော. ဟေတု စေဝ သဟေတုကော စ ကုသလော ဓမ္မော နဟေတုဿ စေဝ နအဟေတုကဿ စ နကုသလဿ စ နအဟေတုကဿ စေဝ နန စ ဟေတုဿ နကုသလဿ စ ဓမ္မဿ အာရမ္မဏပစ္စယေန ပစ္စယော. (၃)
သဟေတုကော စေဝ န စ ဟေတု ကုသလော ဓမ္မော နအဟေတုကဿ စေဝ နန စ ဟေတုဿ နကုသလဿ ဓမ္မဿ အာရမ္မဏပစ္စယေန ပစ္စယော. သဟေတုကော စေဝ န စ ဟေတု ကုသလော ဓမ္မော နဟေတုဿ စေဝ နအဟေတုကဿ စ နကုသလဿ ဓမ္မဿ အာရမ္မဏပစ္စယေန ပစ္စယော. သဟေတုကော စေဝ န စ ဟေတု ကုသလော ဓမ္မော နဟေတုဿ စေဝ နအဟေတုကဿ စ နကုသလဿ စ နအဟေတုကဿ စေဝ နန စ ဟေတုဿ နကုသလဿ စ ဓမ္မဿ အာရမ္မဏပစ္စယေန ပစ္စယော. (၃)
ဟေတု စေဝ သဟေတုကော ကုသလော စ သဟေတုကော စေဝ န စ ဟေတု ကုသလော စ ဓမ္မာ နဟေတုဿ စေဝ နအဟေတုကဿ နကုသလဿ ဓမ္မဿ အာရမ္မဏပစ္စယေန ပစ္စယော. ဟေတု စေဝ သဟေတုကော ကုသလော စ သဟေတုကော စေဝ န စ ဟေတု ကုသလော စ ဓမ္မာ နအဟေတုကဿ စေဝ နန စ ဟေတုဿ နကုသလဿ ဓမ္မဿ အာရမ္မဏပစ္စယေန ပစ္စယော. ဟေတု စေဝ သဟေတုကော ကုသလော စ သဟေတုကော စေဝ န စ ဟေတု ကုသလော စ ဓမ္မာ နဟေတုဿ စေဝ နအဟေတုကဿ နကုသလဿ စ နအဟေတုကဿ စေဝ နန ဟေတုဿ နကုသလဿ စ ဓမ္မဿ အာရမ္မဏပစ္စယေန ပစ္စယော. (၃)
အာရမ္မဏေ နဝ.
၃၃. ဟေတု စေဝ သဟေတုကော စ အကုသလော ဓမ္မော နဟေတုဿ စေဝ နအဟေတုကဿ နအကုသလဿ စ ဓမ္မဿ အာရမ္မဏပစ္စယေန ပစ္စယော. (ဧတေန ဥပါယေန နဝ ပဉှာ ကာတဗ္ဗာ.)
၃၄. ဟေတု စေဝ သဟေတုကော စ အဗျာကတော ဓမ္မော နဟေတုဿ စေဝ နအဟေတုကဿ စ နအဗျာကတဿ ဓမ္မဿ အာရမ္မဏပစ္စယေန ပစ္စယော. (နဝ ပဉှာ ကာတဗ္ဗာ.) (သံခိတ္တံ၊ ဟေတုဟေတုသမ္ပယုတ္တဒုကံ ဟေတုသဟေတုကဒုကသဒိသံ. သံခိတ္တံ. နဝ ပဉှာ.)
၆-၁. နဟေတုသဟေတုကဒုက-ကုသလတ္တိကံ
၃၅. နဟေတုံ သဟေတုကံ ကုသလံ ဓမ္မံ ပဋိစ္စ နဟေတု နသဟေတုကော နကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
နဟေတုံ သဟေတုကံ အကုသလံ ဓမ္မံ ပဋိစ္စ နဟေတု နသဟေတုကော နအကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
နဟေတုံ အဟေတုကံ အဗျာကတံ ဓမ္မံ ပစ္စယာ နဟေတု နအဟေတုကော နအဗျာကတော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
ဟေတုဂေါစ္ဆကံ နိဋ္ဌိတံ.
၇-၈-၁. သပ္ပစ္စယာဒိဒုကာနိ-ကုသလတ္တိကံ
၃၆. သပ္ပစ္စယံ ကုသလံ ဓမ္မံ ပဋိစ္စ နအပ္ပစ္စယော နကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
သပ္ပစ္စယံ အကုသလံ ဓမ္မံ ပဋိစ္စ နအပ္ပစ္စယော နအကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
သပ္ပစ္စယံ အဗျာကတံ ဓမ္မံ ပစ္စယာ နအပ္ပစ္စယော နအဗျာကတော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ။ပေ။ (သံခိတ္တံ သပ္ပစ္စယသဒိသံ).
၉-၁၀-၁. သနိဒဿနာဒိဒုကာနိ-ကုသလတ္တိကံ
၃၇. အနိဒဿနံ ကုသလံ ဓမ္မံ ပဋိစ္စ နအနိဒဿနော နကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ. (အကုသလံ ကုသလသဒိသံ.)
အနိဒဿနံ အဗျာကတံ ဓမ္မံ ပစ္စယာ နသနိဒဿနော နအဗျာကတော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
အပ္ပဋိဃံ ကုသလံ ဓမ္မံ ပဋိစ္စ နအပ္ပဋိဃော နကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
အပ္ပဋိဃံ အကုသလံ ဓမ္မံ ပဋိစ္စ နအပ္ပဋိဃော နအကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ တီဏိ.
အဗျာကတော ဧကံ.
၁၁-၁. ရူပီဒုက-ကုသလတ္တိကံ
၃၈. အရူပိံ ကုသလံ ဓမ္မံ ပဋိစ္စ နအရူပီ နကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
အရူပိံ အကုသလံ ဓမ္မံ ပဋိစ္စ နအရူပီ နအကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
ရူပိံ အဗျာကတံ ဓမ္မံ ပစ္စယာ နရူပီ နအဗျာကတော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
၁၂-၁. လောကိယဒုက-ကုသလတ္တိကံ
၃၉. လောကိယံ ကုသလံ ဓမ္မံ ပဋိစ္စ နလောကုတ္တရော နကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ ဒွေ.
လောကိယံ အကုသလံ ဓမ္မံ ပဋိစ္စ နလောကုတ္တရော နအကုသလော ဓမ္မော ဥပ္ပဇ္ဇတိ ဟေတုပစ္စယာ. ဟေတုယာ ဧကံ.
လောကိယံ အဗျာကတံ ဓမ္မံ ပစ္စယာ နလောကိယော နအဗျာကတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ ဒွေ.
၁၃-၁. ကေနစိဝိညေယျဒုက-ကုသလတ္တိကံ
၄၀. ကေနစိ ဝိညေယျံ ကုသလံ ဓမ္မံ ပဋိစ္စ နကေနစိ ဝိညေယျော နကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ နဝ.
ကေနစိ ဝိညေယျံ အကုသလံ ဓမ္မံ ပဋိစ္စ နကေနစိ ဝိညေယျော နအကုသလော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ နဝ.
ကေနစိ ဝိညေယျံ အဗျာကတံ ဓမ္မံ ပစ္စယာ နကေနစိ ဝိညေယျော နအဗျာကတော ဓမ္မော ဥပ္ပဇ္ဇတိ ဟေတုပစ္စယာ။ ဟေတုယာ နဝ.
စူဠန္တရဒုကံ နိဋ္ဌိတံ.