၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁၆. ဂန္ထဝိပ္ပယုတ္တံ ကုသလံ ဓမ္မံ ပဋိစ္စ ဂန္ထဝိပ္ပယုတ္တော ကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၁၇. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၁၈. ဂန္ထသမ္ပယုတ္တံ အကုသလံ ဓမ္မံ ပဋိစ္စ ဂန္ထသမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဂန္ထဝိပ္ပယုတ္တံ အကုသလံ ဓမ္မံ ပဋိစ္စ ဂန္ထဝိပ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ။ ဒွေ.

ဂန္ထသမ္ပယုတ္တံ အကုသလဉ္စ ဂန္ထဝိပ္ပယုတ္တံ အကုသလဉ္စ ဓမ္မံ ပဋိစ္စ ဂန္ထသမ္ပယုတ္တော အကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၉. ဟေတုယာ ဆ၊ အာရမ္မဏေ ဆ၊ အဓိပတိယာ ပဉ္စ။ပေ။ အဝိဂတေ ဆ (သံခိတ္တံ).

နဟေတုယာ ဧကံ၊ နအဓိပတိယာ ဆ၊ နပုရေဇာတေ ဆ။ပေ။ နကမ္မေ စတ္တာရိ၊ နဝိပ္ပယုတ္တေ ဆ (သံခိတ္တံ).

(သဟဇာတဝါရောပိ။ပေ။ သမ္ပယုတ္တဝါရောပိ ဝိတ္ထာရေတဗ္ဗာ.)

၂၀. ဂန္ထသမ္ပယုတ္တော အကုသလော ဓမ္မော ဂန္ထသမ္ပယုတ္တဿ အကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).

၂၁. ဟေတုယာ ဆ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သဟဇာတေ ဆ။ပေ။ နိဿယေ ဆ၊ ဥပနိဿယေ နဝ၊ အာသေဝနေ နဝ၊ ကမ္မေ စတ္တာရိ။ပေ။ မဂ္ဂေ စတ္တာရိ၊ သမ္ပယုတ္တေ ဆ။ပေ။ အဝိဂတေ ဆ (သံခိတ္တံ).

၂၂. ဂန္ထဝိပ္ပယုတ္တံ အဗျာကတံ ဓမ္မံ ပဋိစ္စ ဂန္ထဝိပ္ပယုတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၂၃. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)