၁-၇. ပဋိစ္စဝါရာဒိ
ပစ္စယစတုက္ကံ
ဟေတုပစ္စယော
၁၀. ဂန္ထနိယံ ကုသလံ ဓမ္မံ ပဋိစ္စ ဂန္ထနိယော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)
အဂန္ထနိယံ ကုသလံ ဓမ္မံ ပဋိစ္စ အဂန္ထနိယော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)
၁၁. ဟေတုယာ ဒွေ၊ အာရမ္မဏေ ဒွေ။ပေ။ အဝိဂတေ ဒွေ (သံခိတ္တံ၊ လောကိယလောကုတ္တရဂမနသဒိသံ).
(သဟဇာတဝါရောပိ။ပေ။ ပဉှာဝါရောပိ ဝိတ္ထာရေတဗ္ဗာ.)
၁၂. ဂန္ထနိယံ အကုသလံ ဓမ္မံ ပဋိစ္စ ဂန္ထနိယော အကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).
၁၃. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).
(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)
၁၄. ဂန္ထနိယံ အဗျာကတံ ဓမ္မံ ပဋိစ္စ ဂန္ထနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)
အဂန္ထနိယံ အဗျာကတံ ဓမ္မံ ပဋိစ္စ အဂန္ထနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ။ တီဏိ. (၃)
ဂန္ထနိယံ အဗျာကတဉ္စ အဂန္ထနိယံ အဗျာကတဉ္စ ဓမ္မံ ပဋိစ္စ ဂန္ထနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)
၁၅. ဟေတုယာ ပဉ္စ၊ အာရမ္မဏေ ဒွေ။ပေ။ အဝိဂတေ ပဉ္စ (သံခိတ္တံ၊ လောကိယလောကုတ္တရဂမနသဒိသံ).
(သဟဇာတဝါရောပိ။ပေ။ ပဉှာဝါရောပိ ဝိတ္ထာရေတဗ္ဗာ.)