၇. ပဉှာဝါရော

၂၅. သညောဇနသမ္ပယုတ္တော အကုသလော ဓမ္မော သညောဇနသမ္ပယုတ္တဿ အကုသလဿ ဓမ္မဿ ဟေတုပစ္စယေန ပစ္စယော. (၁)

သညောဇနဝိပ္ပယုတ္တော အကုသလော ဓမ္မော သညောဇနသမ္ပယုတ္တဿ အကုသလဿ ဓမ္မဿ ဟေတုပစ္စယေန ပစ္စယော. (၁)

သညောဇနသမ္ပယုတ္တော အကုသလော ဓမ္မော သညောဇနသမ္ပယုတ္တဿ အကုသလဿ ဓမ္မဿ အာရမ္မဏပစ္စယေန ပစ္စယော။ နဝ.

သညောဇနသမ္ပယုတ္တော အကုသလော ဓမ္မော သညောဇနသမ္ပယုတ္တဿ အကုသလဿ ဓမ္မဿ အဓိပတိပစ္စယေန ပစ္စယော. (၁) (သံခိတ္တံ.)

၂၆. အဓိပတိယာ ဧကံ၊ အနန္တရေ သမနန္တရေ နဝ၊ သဟဇာတေ ပဉ္စ၊ ဥပနိဿယေ အာသေဝနေ နဝ၊ ကမ္မေ တီဏိ၊ မဂ္ဂေ တီဏိ၊ သမ္ပယုတ္တေ ပဉ္စ၊ အတ္ထိယာ ပဉ္စ. (သံခိတ္တံ.)

၂၇. သညောဇနဝိပ္ပယုတ္တံ အဗျာကတံ ဓမ္မံ ပဋိစ္စ သညောဇနဝိပ္ပယုတ္တော အဗျာကတော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)