၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၁၀. သညောဇနိယံ ကုသလံ ဓမ္မံ ပဋိစ္စ သညောဇနိယော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁)

အသညောဇနိယံ ကုသလံ ဓမ္မံ ပဋိစ္စ အသညောဇနိယော ကုသလော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၁. ဟေတုယာ ဒွေ၊ အာရမ္မဏေ ဒွေ (သံခိတ္တံ).

(ယထာ စူဠန္တရဒုကေ လောကိယဒုကဂမနံ၊ ဧဝံ ဣမမ္ပိ ဉာတဗ္ဗံ. သဟဇာတဝါရောပိ။ပေ။ ပဉှာဝါရောပိ ဝိတ္ထာရေတဗ္ဗာ.)

၁၂. သညောဇနိယံ အကုသလံ ဓမ္မံ ပဋိစ္စ သညောဇနိယော အကုသလော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၁၃. ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

အဗျာကတပဒံ

ဟေတုပစ္စယော

၁၄. သညောဇနိယံ အဗျာကတံ ဓမ္မံ ပဋိစ္စ သညောဇနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

အသညောဇနိယံ အဗျာကတံ ဓမ္မံ ပဋိစ္စ အသညောဇနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. အသညောဇနိယံ အဗျာကတံ ဓမ္မံ ပဋိစ္စ သညောဇနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. အသညောဇနိယံ အဗျာကတံ ဓမ္မံ ပဋိစ္စ သညောဇနိယော အဗျာကတော စ အသညောဇနိယော အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

သညောဇနိယံ အဗျာကတဉ္စ အသညောဇနိယံ အဗျာကတဉ္စ ဓမ္မံ ပဋိစ္စ သညောဇနိယော အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

၁၅. ဟေတုယာ ပဉ္စ၊ အာရမ္မဏေ ဒွေ၊ အဓိပတိယာ ပဉ္စ။ပေ။ အဝိဂတေ ပဉ္စ (သံခိတ္တံ).

စူဠန္တရဒုကေ လောကိယဒုကသဒိသံ. (သဟဇာတဝါရောပိ။ပေ။ သမ္ပယုတ္တဝါရောပိ ဝိတ္ထာရေတဗ္ဗာ.)