၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၃၇. သညောဇနဉ္စေဝ သညောဇနသမ္ပယုတ္တဉ္စ အကုသလံ ဓမ္မံ ပဋိစ္စ သညောဇနော စေဝ သညောဇနသမ္ပယုတ္တော စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သညောဇနသမ္ပယုတ္တဉ္စေဝ နော စ သညောဇနံ အကုသလံ ဓမ္မံ ပဋိစ္စ သညောဇနသမ္ပယုတ္တော စေဝ နော စ သညောဇနော အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သညောဇနဉ္စေဝ သညောဇနသမ္ပယုတ္တံ အကုသလဉ္စ သညောဇနသမ္ပယုတ္တဉ္စေဝ နော စ သညောဇနံ အကုသလဉ္စ ဓမ္မံ ပဋိစ္စ သညောဇနော စေဝ သညောဇနသမ္ပယုတ္တော စ အကုသလော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

၃၈. ဟေတုယာ နဝ၊ အာရမ္မဏေ နဝ၊ အဓိပတိယာ နဝ။ပေ။ အဝိဂတေ နဝ (သံခိတ္တံ).

နဟေတုယာ တီဏိ၊ နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဝိပ္ပယုတ္တေ နဝ (သံခိတ္တံ).

(သဟဇာတဝါရောပိ။ သမ္ပယုတ္တဝါရောပိ ပဋိစ္စဝါရသဒိသာ ဝိတ္ထာရေတဗ္ဗာ.)

၃၉. သညောဇနော စေဝ သညောဇနသမ္ပယုတ္တော စ အကုသလော ဓမ္မော သညောဇနဿ စေဝ သညောဇနသမ္ပယုတ္တဿ စ အကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).

၄၀. ဟေတုယာ တီဏိ၊ အာရမ္မဏေ နဝ၊ အဓိပတိယာ နဝ။ပေ။ ဥပနိဿယေ အာသေဝနေ နဝ၊ ကမ္မေ အာဟာရေ ဣန္ဒြိယေ ဈာနေ တီဏိ၊ မဂ္ဂေ သမ္ပယုတ္တေ နဝ။ပေ။ အဝိဂတေ နဝ (သံခိတ္တံ).

၄၁. နဟေတုယာ နဝ၊ နအာရမ္မဏေ နဝ၊ နအဓိပတိယာ နဝ (သံခိတ္တံ).

ဟေတုပစ္စယာ နအာရမ္မဏေ တီဏိ (သံခိတ္တံ).

နဟေတုပစ္စယာ အာရမ္မဏေ နဝ (သံခိတ္တံ).

(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)