၃. အဗျာကတပဒံ

ဟေတုပစ္စယော

၁၆. သာသဝံ အဗျာကတံ ဓမ္မံ ပဋိစ္စ သာသဝေါ အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁)

အနာသဝံ အဗျာကတံ ဓမ္မံ ပဋိစ္စ အနာသဝေါ အဗျာကတော ဓမ္မော ဥပ္ပဇ္ဇတိ ဟေတုပစ္စယာ. အနာသဝံ အဗျာကတံ ဓမ္မံ ပဋိစ္စ သာသဝေါ အဗျာကတော ဓမ္မော ဥပ္ပဇ္ဇတိ ဟေတုပစ္စယာ. အနာသဝံ အဗျာကတံ ဓမ္မံ ပဋိစ္စ သာသဝေါ အဗျာကတော စ အနာသဝေါ အဗျာကတော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

သာသဝံ အဗျာကတဉ္စ အနာသဝံ အဗျာကတဉ္စ ဓမ္မံ ပဋိစ္စ သာသဝေါ အဗျာကတော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၇. ဟေတုယာ ပဉ္စ၊ အာရမ္မဏေ ဒွေ၊ အဓိပတိယာ ပဉ္စ။ပေ။ အာသေဝနေ ဧကံ။ပေ။ ဝိပါကေ ပဉ္စ။ပေ။ အဝိဂတေ ပဉ္စ (သံခိတ္တံ).

နဟေတုယာ ဧကံ၊ နအာရမ္မဏေ တီဏိ၊ နအဓိပတိယာ ဒွေ၊ နပုရေဇာတေ စတ္တာရိ၊ နပစ္ဆာဇာတေ နအာသေဝနေ ပဉ္စ၊ နကမ္မေ။ပေ။ နမဂ္ဂေ ဧကံ။ပေ။ နဝိပ္ပယုတ္တေ ဒွေ။ပေ။ နောဝိဂတေ တီဏိ (သံခိတ္တံ).

(သဟဇာတဝါရောပိ။ပေ။ သမ္ပယုတ္တဝါရောပိ သဗ္ဗတ္ထ ဝိတ္ထာရေတဗ္ဗော.)