၇. ပဉှာဝါရော

ပစ္စယစတုက္ကံ

ဟေတုပစ္စယော

၅၁. ဟေတု စေဝ သဟေတုကော စ ကုသလော ဓမ္မော ဟေတုဿ စေဝ သဟေတုကဿ စ ကုသလဿ ဓမ္မဿ ဟေတုပစ္စယေန ပစ္စယော (သံခိတ္တံ).

၅၂. ဟေတုယာ တီဏိ၊ အာရမ္မဏေ နဝ၊ အဓိပတိယာ နဝ၊ အနန္တရေ နဝ၊ သမနန္တရေ နဝ၊ သဟဇာတေ နဝ၊ အညမညေ နဝ၊ နိဿယေ နဝ၊ ဥပနိဿယေ နဝ၊ အာသေဝနေ နဝ၊ ကမ္မေ တီဏိ၊ အာဟာရေ တီဏိ။ပေ။ အဝိဂတေ နဝ (သံခိတ္တံ).

ပစ္စနီယုဒ္ဓါရော

၅၃. ဟေတု စေဝ သဟေတုကော စ ကုသလော ဓမ္မော ဟေတုဿ စေဝ သဟေတုကဿ စ ကုသလဿ ဓမ္မဿ အာရမ္မဏပစ္စယေန ပစ္စယော။ သဟဇာတပစ္စယေန ပစ္စယော။ ဥပနိဿယပစ္စယေန ပစ္စယော (သံခိတ္တံ).

၅၄. နဟေတုယာ နဝ၊ နအာရမ္မဏေ နဝ (သံခိတ္တံ).

ဟေတုပစ္စယာ နအာရမ္မဏေ တီဏိ (သံခိတ္တံ).

နဟေတုပစ္စယာ အာရမ္မဏေ နဝ (သံခိတ္တံ).

(ယထာ ကုသလတ္တိကေ ပဉှာဝါရဿ အနုလောမမ္ပိ ပစ္စနီယမ္ပိ အနုလောမပစ္စနီယမ္ပိ ပစ္စနီယာနုလောမမ္ပိ ဂဏိတံ၊ ဧဝံ ဂဏေတဗ္ဗံ.)