၁-၇. ပဋိစ္စဝါရာဒိ
ပစ္စယစတုက္ကံ
၆၀. အကုသလံ သရဏံ ဓမ္မံ ပဋိစ္စ အကုသလော သရဏော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).
ဟေတုယာ ဧကံ။ပေ။ အဝိဂတေ ဧကံ (သံခိတ္တံ).
(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)
၆၁. ကုသလံ အရဏံ ဓမ္မံ ပဋိစ္စ ကုသလော အရဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.
အဗျာကတံ အရဏံ ဓမ္မံ ပဋိစ္စ အဗျာကတော အရဏော ဓမ္မော ဥပ္ပဇ္ဇတိ ဟေတုပစ္စယာ. (၁)
ကုသလံ အရဏဉ္စ အဗျာကတံ အရဏဉ္စ ဓမ္မံ ပဋိစ္စ အဗျာကတော အရဏော ဓမ္မော ဥပ္ပဇ္ဇတိ ဟေတုပစ္စယာ. (၁)
ကုသလံ အရဏံ ဓမ္မံ ပဋိစ္စ ကုသလော အရဏော ဓမ္မော ဥပ္ပဇ္ဇတိ အာရမ္မဏပစ္စယာ. (၁)
အဗျာကတံ အရဏံ ဓမ္မံ ပဋိစ္စ အဗျာကတော အရဏော ဓမ္မော ဥပ္ပဇ္ဇတိ အာရမ္မဏပစ္စယာ. (၁) (သံခိတ္တံ.)
၆၂. ဟေတုယာ ပဉ္စ၊ အာရမ္မဏေ ဒွေ။ပေ။ အဝိဂတေ ပဉ္စ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).
၆၃. ကုသလော အရဏော ဓမ္မော ကုသလဿ အရဏဿ ဓမ္မဿ ဟေတုပစ္စယေန ပစ္စယော။ တီဏိ.
အဗျာကတော အရဏော ဓမ္မော အဗျာကတဿ အရဏဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)
၆၄. ဟေတုယာ စတ္တာရိ၊ အာရမ္မဏေ စတ္တာရိ။ပေ။ အဝိဂတေ သတ္တ (သံခိတ္တံ).
(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)
ကုသလတ္တိကပိဋ္ဌိဒုကံ နိဋ္ဌိတံ.