၁-၇. ပဋိစ္စဝါရာဒိ

၉၈. အာစယဂါမိံ သရဏံ ဓမ္မံ ပဋိစ္စ အာစယဂါမီ သရဏော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၉၉. အာစယဂါမိံ အရဏံ ဓမ္မံ ပဋိစ္စ အာစယဂါမီ အရဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အပစယဂါမိံ အရဏံ ဓမ္မံ ပဋိစ္စ အပစယဂါမီ အရဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

နေဝါစယဂါမိနာပစယဂါမိံ အရဏံ ဓမ္မံ ပဋိစ္စ နေဝါစယဂါမိနာပစယဂါမီ အရဏော ဓမ္မော ဥပ္ပဇ္ဇတိ ဟေတုပစ္စယာ. (၁)

အာစယဂါမိံ အရဏဉ္စ နေဝါစယဂါမိနာပစယဂါမိံ အရဏဉ္စ ဓမ္မံ ပဋိစ္စ နေဝါစယဂါမိနာပစယဂါမီ အရဏော ဓမ္မော ဥပ္ပဇ္ဇတိ ဟေတုပစ္စယာ. (၁)

အပစယဂါမိံ အရဏဉ္စ နေဝါစယဂါမိနာပစယဂါမိံ အရဏဉ္စ ဓမ္မံ ပဋိစ္စ နေဝါစယဂါမိနာပစယဂါမီ အရဏော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၁၀၀. ဟေတုယာ နဝ၊ အာရမ္မဏေ တီဏိ၊ အဓိပတိယာ နဝ။ပေ။ အဝိဂတေ နဝ (သံခိတ္တံ). (သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၁၀၁. အာစယဂါမီ အရဏော ဓမ္မော အာစယဂါမိဿ အရဏဿ ဓမ္မဿ ဟေတုပစ္စယေန ပစ္စယော။ တီဏိ.

အပစယဂါမီ အရဏော ဓမ္မော အပစယဂါမိဿ အရဏဿ ဓမ္မဿ ဟေတုပစ္စယေန ပစ္စယော။ တီဏိ.

နေဝါစယဂါမိနာပစယဂါမီ အရဏော ဓမ္မော နေဝါစယဂါမိနာပစယဂါမိဿ အရဏဿ ဓမ္မဿ ဟေတုပစ္စယေန ပစ္စယော. (၁)

အာစယဂါမီ အရဏော ဓမ္မော အာစယဂါမိဿ အရဏဿ ဓမ္မဿ အာရမ္မဏပစ္စယေန ပစ္စယော (သံခိတ္တံ).

၁၀၂. ဟေတုယာ သတ္တ၊ အာရမ္မဏေ သတ္တ၊ အဓိပတိယာ ဒသ၊ အနန္တရေ ဆ။ပေ။ အဝိဂတေ တေရသ. (သံခိတ္တံ.)

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)