၁-၇. ပဋိစ္စဝါရာဒိ

၉၁. ပီတိသဟဂတံ သရဏံ ဓမ္မံ ပဋိစ္စ ပီတိသဟဂတော သရဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

သုခသဟဂတံ သရဏံ ဓမ္မံ ပဋိစ္စ သုခသဟဂတော သရဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

ဥပေက္ခာသဟဂတံ သရဏံ ဓမ္မံ ပဋိစ္စ ဥပေက္ခာသဟဂတော သရဏော ဓမ္မော ဥပ္ပဇ္ဇတိ ဟေတုပစ္စယာ. (၁)

ပီတိသဟဂတံ သရဏဉ္စ သုခသဟဂတံ သရဏဉ္စ ဓမ္မံ ပဋိစ္စ ပီတိသဟဂတော သရဏော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (သံခိတ္တံ).

ဟေတုယာ ဒသ။ပေ။ အဝိဂတေ ဒသ (သံခိတ္တံ).

(သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ.)

၉၂. ပီတိသဟဂတော သရဏော ဓမ္မော ပီတိသဟဂတဿ သရဏဿ ဓမ္မဿ ဟေတုပစ္စယေန ပစ္စယော။ တီဏိ.

သုခသဟဂတော သရဏော ဓမ္မော သုခသဟဂတဿ သရဏဿ ဓမ္မဿ ဟေတုပစ္စယေန ပစ္စယော။ တီဏိ.

ဥပေက္ခာသဟဂတော သရဏော ဓမ္မော ဥပေက္ခာသဟဂတဿ သရဏဿ ဓမ္မဿ ဟေတုပစ္စယေန ပစ္စယော. (၁)

ပီတိသဟဂတော သရဏော စ သုခသဟဂတော သရဏော စ ဓမ္မာ ပီတိသဟဂတဿ သရဏဿ ဓမ္မဿ ဟေတုပစ္စယေန ပစ္စယော။ တီဏိ (သံခိတ္တံ).

၉၃. ဟေတုယာ ဒသ၊ အာရမ္မဏေ သောဠသ။ပေ။ အဝိဂတေ ဒသ (သံခိတ္တံ). (ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).

၉၄. ပီတိသဟဂတံ အရဏံ ဓမ္မံ ပဋိစ္စ ပီတိသဟဂတော အရဏော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဒသ။ပေ။ အဝိဂတေ ဒသ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ တတ္တကာဝ ပဉှာ.)