၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၈၇. သဝိတက္ကသဝိစာရံ သရဏံ ဓမ္မံ ပဋိစ္စ သဝိတက္ကသဝိစာရော သရဏော ဓမ္မော ဥပ္ပဇ္ဇတိ ဟေတုပစ္စယာ. သဝိတက္ကသဝိစာရံ သရဏံ ဓမ္မံ ပဋိစ္စ အဝိတက္ကဝိစာရမတ္တော သရဏော ဓမ္မော ဥပ္ပဇ္ဇတိ ဟေတုပစ္စယာ. သဝိတက္ကသဝိစာရံ သရဏံ ဓမ္မံ ပဋိစ္စ သဝိတက္ကသဝိစာရော သရဏော စ အဝိတက္ကဝိစာရမတ္တော သရဏော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အဝိတက္ကဝိစာရမတ္တံ သရဏံ ဓမ္မံ ပဋိစ္စ သဝိတက္ကသဝိစာရော သရဏော ဓမ္မော ဥပ္ပဇ္ဇတိ ဟေတုပစ္စယာ. (၁)

သဝိတက္ကသဝိစာရံ သရဏဉ္စ အဝိတက္ကဝိစာရမတ္တံ သရဏဉ္စ ဓမ္မံ ပဋိစ္စ သဝိတက္ကသဝိစာရော သရဏော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၈၈. ဟေတုယာ ပဉ္စ။ပေ။ အဝိဂတေ ပဉ္စ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဝိတ္ထာရော.)

၈၉. သဝိတက္ကသဝိစာရံ အရဏံ ဓမ္မံ ပဋိစ္စ သဝိတက္ကသဝိစာရော အရဏော ဓမ္မော ဥပ္ပဇ္ဇတိ ဟေတုပစ္စယာ။ သတ္တ.

အဝိတက္ကဝိစာရမတ္တံ အရဏံ ဓမ္မံ ပဋိစ္စ အဝိတက္ကဝိစာရမတ္တော အရဏော ဓမ္မော ဥပ္ပဇ္ဇတိ ဟေတုပစ္စယာ ။ ပဉ္စ.

အဝိတက္ကအဝိစာရံ အရဏံ ဓမ္မံ ပဋိစ္စ အဝိတက္ကအဝိစာရော အရဏော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

၉၀. ဟေတုယာ သတ္တတိံသ။ပေ။ အဝိဂတေ သတ္တတိံသ (သံခိတ္တံ). (သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ).