၁-၇. ပဋိစ္စဝါရာဒိ

၅၃. ကုသလံ သဥတ္တရံ ဓမ္မံ ပဋိစ္စ ကုသလော သဥတ္တရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အကုသလံ သဥတ္တရံ ဓမ္မံ ပဋိစ္စ အကုသလော သဥတ္တရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ သဥတ္တရံ ဓမ္မံ ပဋိစ္စ အဗျာကတော သဥတ္တရော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ သဥတ္တရဉ္စ အဗျာကတံ သဥတ္တရဉ္စ ဓမ္မံ ပဋိစ္စ အဗျာကတော သဥတ္တရော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ သဥတ္တရဉ္စ အဗျာကတံ သဥတ္တရဉ္စ ဓမ္မံ ပဋိစ္စ အဗျာကတော သဥတ္တရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၅၄. ဟေတုယာ နဝ၊ အာရမ္မဏေ တီဏိ။ပေ။ အဝိဂတေ နဝ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၅၅. ကုသလော သဥတ္တရော ဓမ္မော ကုသလဿ သဥတ္တရဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော သဥတ္တရော ဓမ္မော အကုသလဿ သဥတ္တရဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော သဥတ္တရော ဓမ္မော အဗျာကတဿ သဥတ္တရဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၅၆. ဟေတုယာ သတ္တ၊ အာရမ္မဏေ နဝ၊ အဓိပတိယာ နဝ။ပေ။ အဝိဂတေ တေရသ (သံခိတ္တံ).

၅၇. ကုသလံ အနုတ္တရံ ဓမ္မံ ပဋိစ္စ ကုသလော အနုတ္တရော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ အနုတ္တရံ ဓမ္မံ ပဋိစ္စ အဗျာကတော အနုတ္တရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ၊ အာရမ္မဏေ ဒွေ။ပေ။ အဝိဂတေ ဒွေ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၅၈. ကုသလော အနုတ္တရော ဓမ္မော ကုသလဿ အနုတ္တရဿ ဓမ္မဿ ဟေတုပစ္စယေန ပစ္စယော. (၁)

အဗျာကတော အနုတ္တရော ဓမ္မော အဗျာကတဿ အနုတ္တရဿ ဓမ္မဿ ဟေတုပစ္စယေန ပစ္စယော. (၁)

အဗျာကတော အနုတ္တရော ဓမ္မော အဗျာကတဿ အနုတ္တရဿ ဓမ္မဿ အာရမ္မဏပစ္စယေန ပစ္စယော. (၁)

အဗျာကတော အနုတ္တရော ဓမ္မော ကုသလဿ အနုတ္တရဿ ဓမ္မဿ အာရမ္မဏပစ္စယေန ပစ္စယော. (၁) (သံခိတ္တံ.)

၅၉. ဟေတုယာ ဒွေ၊ အာရမ္မဏေ ဒွေ၊ အဓိပတိယာ တီဏိ၊ အနန္တရေ ဒွေ။ပေ။ အဝိဂတေ ဒွေ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)