၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၄၁. ကုသလံ ပရိယာပန္နံ ဓမ္မံ ပဋိစ္စ ကုသလော ပရိယာပန္နော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အကုသလံ ပရိယာပန္နံ ဓမ္မံ ပဋိစ္စ အကုသလော ပရိယာပန္နော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ ပရိယာပန္နံ ဓမ္မံ ပဋိစ္စ အဗျာကတော ပရိယာပန္နော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ ပရိယာပန္နဉ္စ အဗျာကတံ ပရိယာပန္နဉ္စ ဓမ္မံ ပဋိစ္စ အဗျာကတော ပရိယာပန္နော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ ပရိယာပန္နဉ္စ အဗျာကတံ ပရိယာပန္နဉ္စ ဓမ္မံ ပဋိစ္စ အဗျာကတော ပရိယာပန္နော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၄၂. ဟေတုယာ နဝ၊ အာရမ္မဏေ တီဏိ။ပေ။ ဝိပါကေ ဧကံ။ပေ။ အဝိဂတေ နဝ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၄၃. ကုသလော ပရိယာပန္နော ဓမ္မော ကုသလဿ ပရိယာပန္နဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော ပရိယာပန္နော ဓမ္မော အကုသလဿ ပရိယာပန္နဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော ပရိယာပန္နော ဓမ္မော အဗျာကတဿ ပရိယာပန္နဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၄၄. ဟေတုယာ သတ္တ၊ အာရမ္မဏေ နဝ၊ အဓိပတိယာ နဝ။ပေ။ အဝိဂတေ တေရသ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).

အပရိယာပန္နပဒံ

ဟေတု-အာရမ္မဏပစ္စယာ

၄၅. ကုသလံ အပရိယာပန္နံ ဓမ္မံ ပဋိစ္စ ကုသလော အပရိယာပန္နော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ အပရိယာပန္နံ ဓမ္မံ ပဋိစ္စ အဗျာကတော အပရိယာပန္နော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ၊ အာရမ္မဏေ ဒွေ။ပေ။ အဝိဂတေ ဒွေ (သံခိတ္တံ.) (သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၄၆. ကုသလော အပရိယာပန္နော ဓမ္မော ကုသလဿ အပရိယာပန္နဿ ဓမ္မဿ ဟေတုပစ္စယေန ပစ္စယော. (၁)

အဗျာကတော အပရိယာပန္နော ဓမ္မော အဗျာကတဿ အပရိယာပန္နဿ ဓမ္မဿ ဟေတုပစ္စယေန ပစ္စယော. (၁)

အဗျာကတော အပရိယာပန္နော ဓမ္မော အဗျာကတဿ အပရိယာပန္နဿ ဓမ္မဿ အာရမ္မဏပစ္စယေန ပစ္စယော. အဗျာကတော အပရိယာပန္နော ဓမ္မော ကုသလဿ အပရိယာပန္နဿ ဓမ္မဿ အာရမ္မဏပစ္စယေန ပစ္စယော. (၂)

၄၇. ဟေတုယာ ဒွေ၊ အာရမ္မဏေ ဒွေ၊ အဓိပတိယာ တီဏိ၊ အနန္တရေ ဒွေ။ပေ။ ဥပနိဿယေ စတ္တာရိ။ပေ။ အဝိဂတေ ဒွေ. (သံခိတ္တံ.)

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)