၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၃၅. ကုသလံ ရူပါဝစရံ ဓမ္မံ ပဋိစ္စ ကုသလော ရူပါဝစရော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ ရူပါဝစရံ ဓမ္မံ ပဋိစ္စ အဗျာကတော ရူပါဝစရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ။ပေ။ အဝိဂတေ ဒွေ (သံခိတ္တံ).

(သဟဇာတဝါရမ္ပိ။ပေ။ ပဉှာဝါရမ္ပိ ဝိတ္ထာရေတဗ္ဗံ.)

၃၆. ကုသလံ နရူပါဝစရံ ဓမ္မံ ပဋိစ္စ ကုသလော နရူပါဝစရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အကုသလံ နရူပါဝစရံ ဓမ္မံ ပဋိစ္စ အကုသလော နရူပါဝစရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ နရူပါဝစရံ ဓမ္မံ ပဋိစ္စ အဗျာကတော နရူပါဝစရော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ နရူပါဝစရဉ္စ အဗျာကတံ နရူပါဝစရဉ္စ ဓမ္မံ ပဋိစ္စ အဗျာကတော နရူပါဝစရော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ နရူပါဝစရဉ္စ အဗျာကတံ နရူပါဝစရဉ္စ ဓမ္မံ ပဋိစ္စ အဗျာကတော နရူပါဝစရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၃၇. ဟေတုယာ နဝ၊ အာရမ္မဏေ တီဏိ။ပေ။ အဝိဂတေ နဝ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၃၈. ကုသလော နရူပါဝစရော ဓမ္မော ကုသလဿ နရူပါဝစရဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော နရူပါဝစရော ဓမ္မော အကုသလဿ နရူပါဝစရဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော နရူပါဝစရော ဓမ္မော အဗျာကတဿ နရူပါဝစရဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၃၉. ဟေတုယာ သတ္တ၊ အာရမ္မဏေ နဝ။ပေ။ အဝိဂတေ တေရသ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).