၁-၇. ပဋိစ္စဝါရာဒိ

ပစ္စယစတုက္ကံ

ဟေတုပစ္စယော

၂၈. ကုသလံ ကာမာဝစရံ ဓမ္မံ ပဋိစ္စ ကုသလော ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ. ကုသလံ ကာမာဝစရံ ဓမ္မံ ပဋိစ္စ အဗျာကတော ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ. ကုသလံ ကာမာဝစရံ ဓမ္မံ ပဋိစ္စ ကုသလော ကာမာဝစရော စ အဗျာကတော ကာမာဝစရော စ ဓမ္မာ ဥပ္ပဇ္ဇန္တိ ဟေတုပစ္စယာ. (၃)

အကုသလံ ကာမာဝစရံ ဓမ္မံ ပဋိစ္စ အကုသလော ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ ကာမာဝစရံ ဓမ္မံ ပဋိစ္စ အဗျာကတော ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ ကာမာဝစရဉ္စ အဗျာကတံ ကာမာဝစရဉ္စ ဓမ္မံ ပဋိစ္စ အဗျာကတော ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ ကာမာဝစရဉ္စ အဗျာကတံ ကာမာဝစရဉ္စ ဓမ္မံ ပဋိစ္စ အဗျာကတော ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

၂၉. ဟေတုယာ နဝ၊ အာရမ္မဏေ တီဏိ။ပေ။ အဝိဂတေ နဝ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၃၀. ကုသလော ကာမာဝစရော ဓမ္မော ကုသလဿ ကာမာဝစရဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော ကာမာဝစရော ဓမ္မော ကုသလဿ ကာမာဝစရဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော ကာမာဝစရော ဓမ္မော အဗျာကတဿ ကာမာဝစရဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၃၁. ဟေတုယာ သတ္တ၊ အာရမ္မဏေ နဝ၊ အဓိပတိယာ နဝ။ပေ။ အဝိဂတေ တေရသ (သံခိတ္တံ. ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ).

နကာမာဝစရပဒံ

ဟေတု-အာရမ္မဏပစ္စယာ

၃၂. ကုသလံ နကာမာဝစရံ ဓမ္မံ ပဋိစ္စ ကုသလော နကာမာဝစရော ဓမ္မော ဥပ္ပဇ္ဇတိ ဟေတုပစ္စယာ. (၁)

အဗျာကတံ နကာမာဝစရံ ဓမ္မံ ပဋိစ္စ အဗျာကတော နကာမာဝစရော ဓမ္မော ဥပ္ပဇ္ဇတိ ဟေတုပစ္စယာ. (၁) (သံခိတ္တံ.)

ဟေတုယာ ဒွေ၊ အာရမ္မဏေ ဒွေ။ပေ။ အဝိဂတေ ဒွေ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၃၃. ကုသလော နကာမာဝစရော ဓမ္မော ကုသလဿ နကာမာဝစရဿ ဓမ္မဿ ဟေတုပစ္စယေန ပစ္စယော. (၁)

အဗျာကတော နကာမာဝစရော ဓမ္မော အဗျာကတဿ နကာမာဝစရဿ ဓမ္မဿ ဟေတုပစ္စယေန ပစ္စယော. (၁)

ကုသလော နကာမာဝစရော ဓမ္မော ကုသလဿ နကာမာဝစရဿ ဓမ္မဿ အာရမ္မဏပစ္စယေန ပစ္စယော. ကုသလော နကာမာဝစရော ဓမ္မော အဗျာကတဿ နကာမာဝစရဿ ဓမ္မဿ အာရမ္မဏပစ္စယေန ပစ္စယော. (၂)

အဗျာကတော နကာမာဝစရော ဓမ္မော အဗျာကတဿ နကာမာဝစရဿ ဓမ္မဿ အာရမ္မဏပစ္စယေန ပစ္စယော. အဗျာကတော နကာမာဝစရော ဓမ္မော ကုသလဿ နကာမာဝစရဿ ဓမ္မဿ အာရမ္မဏပစ္စယေန ပစ္စယော. (၂)

၃၄. ဟေတုယာ ဒွေ၊ အာရမ္မဏေ စတ္တာရိ၊ အဓိပတိယာ တီဏိ။ပေ။ အဝိဂတေ ဒွေ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)