၁-၇. ပဋိစ္စဝါရာဒိ

ဟေတုပစ္စယော

၁. အကုသလံ ဒဿနေန ပဟာတဗ္ဗံ ဓမ္မံ ပဋိစ္စ အကုသလော ဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ (သံခိတ္တံ).

ဟေတုယာ ဧကံ၊ အာရမ္မဏေ ဧကံ။ပေ။ အဝိဂတေ ဧကံ (သံခိတ္တံ).

(သဟဇာတဝါရေပိ။ပေ။ ပဉှာဝါရေပိ သဗ္ဗတ္ထ ဧကံ.)

၂. ကုသလံ နဒဿနေန ပဟာတဗ္ဗံ ဓမ္မံ ပဋိစ္စ ကုသလော နဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အကုသလံ နဒဿနေန ပဟာတဗ္ဗံ ဓမ္မံ ပဋိစ္စ အကုသလော နဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ။ တီဏိ.

အဗျာကတံ နဒဿနေန ပဟာတဗ္ဗံ ဓမ္မံ ပဋိစ္စ အဗျာကတော နဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ. (၁)

ကုသလံ နဒဿနေန ပဟာတဗ္ဗဉ္စ အဗျာကတံ နဒဿနေန ပဟာတဗ္ဗဉ္စ ဓမ္မံ ပဋိစ္စ အဗျာကတော နဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ. (၁)

အကုသလံ နဒဿနေန ပဟာတဗ္ဗဉ္စ အဗျာကတံ နဒဿနေန ပဟာတဗ္ဗဉ္စ ဓမ္မံ ပဋိစ္စ အဗျာကတော နဒဿနေန ပဟာတဗ္ဗော ဓမ္မော ဥပ္ပဇ္ဇတိ ဟေတုပစ္စယာ. (၁)

၃. ဟေတုယာ နဝ၊ အာရမ္မဏေ တီဏိ။ပေ။ အဝိဂတေ နဝ (သံခိတ္တံ. သဟဇာတဝါရမ္ပိ။ပေ။ သမ္ပယုတ္တဝါရမ္ပိ ပဋိစ္စဝါရသဒိသံ).

၄. ကုသလော နဒဿနေန ပဟာတဗ္ဗော ဓမ္မော ကုသလဿ နဒဿနေန ပဟာတဗ္ဗဿ ဓမ္မဿ ဟေတုပစ္စယေန ပစ္စယော။ တီဏိ.

အကုသလော နဒဿနေန ပဟာတဗ္ဗော ဓမ္မော အကုသလဿ နဒဿနေန ပဟာတဗ္ဗဿ ဓမ္မဿ ဟေတုပစ္စယေန ပစ္စယော။ တီဏိ.

အဗျာကတော နဒဿနေန ပဟာတဗ္ဗော ဓမ္မော အဗျာကတဿ နဒဿနေန ပဟာတဗ္ဗဿ ဓမ္မဿ ဟေတုပစ္စယေန ပစ္စယော. (၁) (သံခိတ္တံ.)

၅. ဟေတုယာ သတ္တ၊ အာရမ္မဏေ နဝ၊ အဓိပတိယာ ဒသ၊ အနန္တရေ သတ္တ။ပေ။ အဝိဂတေ တေရသ (သံခိတ္တံ).

(ယထာ ကုသလတ္တိကေ ပဉှာဝါရံ၊ ဧဝံ ဝိတ္ထာရေတဗ္ဗံ.)