၁. ဝိဘင်္ဂဝါရော

နဟေတုပစ္စယော

၈၄. ကိလေသဉ္စေဝ သံကိလိဋ္ဌဉ္စ ဓမ္မံ ပဋိစ္စ ကိလေသော စေဝ သံကိလိဋ္ဌော စ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆံ ပဋိစ္စ ဝိစိကိစ္ဆာသဟဂတော မောဟော၊ ဥဒ္ဓစ္စံ ပဋိစ္စ ဥဒ္ဓစ္စသဟဂတော မောဟော. (၁)

သံကိလိဋ္ဌဉ္စေဝ နော စ ကိလေသံ ဓမ္မံ ပဋိစ္စ ကိလေသော စေဝ သံကိလိဋ္ဌော စ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

ကိလေသဉ္စေဝ သံကိလိဋ္ဌဉ္စ သံကိလိဋ္ဌဉ္စေဝ နော စ ကိလေသဉ္စ ဓမ္မံ ပဋိစ္စ ကိလေသော စေဝ သံကိလိဋ္ဌော စ ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝိစိကိစ္ဆဉ္စ ဥဒ္ဓစ္စဉ္စ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)