၁. ဝိဘင်္ဂဝါရော

ဟေတုပစ္စယော

၈၀. ကိလေသဉ္စေဝ သံကိလိဋ္ဌဉ္စ ဓမ္မံ ပဋိစ္စ ကိလေသော စေဝ သံကိလိဋ္ဌော စ ဓမ္မော ဥပ္ပဇ္ဇတိ ဟေတုပစ္စယာ – လောဘံ ပဋိစ္စ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ (စက္ကံ). (၁)

ကိလေသဉ္စေဝ သံကိလိဋ္ဌဉ္စ ဓမ္မံ ပဋိစ္စ သံကိလိဋ္ဌော စေဝ နော စ ကိလေသော ဓမ္မော ဥပ္ပဇ္ဇတိ ဟေတုပစ္စယာ – ကိလေသေ ပဋိစ္စ သမ္ပယုတ္တကာ ခန္ဓာ. (၂)

ကိလေသဉ္စေဝ သံကိလိဋ္ဌဉ္စ ဓမ္မံ ပဋိစ္စ ကိလေသော စေဝ သံကိလိဋ္ဌော စ သံကိလိဋ္ဌော စေဝ နော စ ကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – လောဘံ ပဋိစ္စ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ သမ္ပယုတ္တကာ စ ခန္ဓာ (စက္ကံ). (၃)

၈၁. သံကိလိဋ္ဌဉ္စေဝ နော စ ကိလေသံ ဓမ္မံ ပဋိစ္စ သံကိလိဋ္ဌော စေဝ နော စ ကိလေသော ဓမ္မော ဥပ္ပဇ္ဇတိ ဟေတုပစ္စယာ – သံကိလိဋ္ဌဉ္စေဝ နော စ ကိလေသံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. (၁)

သံကိလိဋ္ဌဉ္စေဝ နော စ ကိလေသံ ဓမ္မံ ပဋိစ္စ ကိလေသော စေဝ သံကိလိဋ္ဌော စ ဓမ္မော ဥပ္ပဇ္ဇတိ ဟေတုပစ္စယာ – သံကိလိဋ္ဌေ စေဝ နော စ ကိလေသေ ခန္ဓေ ပဋိစ္စ ကိလေသာ. (၂)

သံကိလိဋ္ဌဉ္စေဝ နော စ ကိလေသံ ဓမ္မံ ပဋိစ္စ ကိလေသော စေဝ သံကိလိဋ္ဌော စ သံကိလိဋ္ဌော စေဝ နော စ ကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – သံကိလိဋ္ဌဉ္စေဝ နော စ ကိလေသံ ဧကံ ခန္ဓံ ပဋိစ္စ တယော ခန္ဓာ ကိလေသာ စ။ပေ။ ဒွေ ခန္ဓေ။ပေ။. (၃)

၈၂. ကိလေသဉ္စေဝ သံကိလိဋ္ဌဉ္စ သံကိလိဋ္ဌဉ္စေဝ နော စ ကိလေသဉ္စ ဓမ္မံ ပဋိစ္စ ကိလေသော စေဝ သံကိလိဋ္ဌော စ ဓမ္မော ဥပ္ပဇ္ဇတိ ဟေတုပစ္စယာ – လောဘဉ္စ သမ္ပယုတ္တကေ စ ခန္ဓေ ပဋိစ္စ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ (စက္ကံ). (၁)

ကိလေသဉ္စေဝ သံကိလိဋ္ဌဉ္စ သံကိလိဋ္ဌဉ္စေဝ နော စ ကိလေသဉ္စ ဓမ္မံ ပဋိစ္စ သံကိလိဋ္ဌော စေဝ နော စ ကိလေသော ဓမ္မော ဥပ္ပဇ္ဇတိ ဟေတုပစ္စယာ – သံကိလိဋ္ဌဉ္စေဝ နော စ ကိလေသံ ဧကံ ခန္ဓဉ္စ ကိလေသေ စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။. (၂)

ကိလေသဉ္စေဝ သံကိလိဋ္ဌဉ္စ သံကိလိဋ္ဌဉ္စေဝ နော စ ကိလေသဉ္စ ဓမ္မံ ပဋိစ္စ ကိလေသော စေဝ သံကိလိဋ္ဌော စ သံကိလိဋ္ဌော စေဝ နော စ ကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – သံကိလိဋ္ဌဉ္စေဝ နော စ ကိလေသံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ။ပေ။ ဒွေ ခန္ဓေ စ။ပေ။ (စက္ကံ). (၃)