၁. ဝိဘင်္ဂဝါရော

ဟေတုပစ္စယော

၇၅. ကိလေသော စေဝ သံကိလေသိကော စ ဓမ္မော ကိလေသဿ စေဝ သံကိလေသိကဿ စ ဓမ္မဿ ဟေတုပစ္စယေန ပစ္စယော – ကိလေသာ စေဝ သံကိလေသိကာ စ ဟေတူ သမ္ပယုတ္တကာနံ ကိလေသာနံ ဟေတုပစ္စယေန ပစ္စယော (ဧဝံ စတ္တာရိ၊ ကိလေသဒုကသဒိသံ.) (၄)

အာရမ္မဏပစ္စယော

၇၆. ကိလေသော စေဝ သံကိလေသိကော စ ဓမ္မော ကိလေသဿ စေဝ သံကိလေသိကဿ စ ဓမ္မဿ အာရမ္မဏပစ္စယေန ပစ္စယော – ကိလေသေ အာရဗ္ဘ ကိလေသာ ဥပ္ပဇ္ဇန္တိ. (မူလံ ကာတဗ္ဗံ.) ကိလေသေ အာရဗ္ဘ သံကိလေသိကာ စေဝ နော စ ကိလေသာ ခန္ဓာ ဥပ္ပဇ္ဇန္တိ. (မူလံ ကာတဗ္ဗံ.) ကိလေသေ အာရဗ္ဘ ကိလေသာ စ သမ္ပယုတ္တကာ စ ခန္ဓာ ဥပ္ပဇ္ဇန္တိ. (၃)

၇၇. သံကိလေသိကော စေဝ နော စ ကိလေသော ဓမ္မော သံကိလေသိကဿ စေဝ နော စ ကိလေသဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ။ပေ။ ဥဒ္ဓစ္စံ ဥပ္ပဇ္ဇတိ၊ ဈာနေ ပရိဟီနေ ဝိပ္ပဋိသာရိဿ ဒေါမနဿံ ဥပ္ပဇ္ဇတိ၊ အရိယာ ဂေါတြဘုံ ပစ္စဝေက္ခန္တိ၊ ဝေါဒါနံ ပစ္စဝေက္ခန္တိ၊ စက္ခုံ။ပေ။ ဝတ္ထုံ သံကိလေသိကေ စေဝ နော စ ကိလေသေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ဒိဗ္ဗေန စက္ခုနာ ရူပံ ပဿတိ။ပေ။ အာဝဇ္ဇနာယ အာရမ္မဏပစ္စယေန ပစ္စယော (ဣတရေ ဒွေ ကိလေသဒုကသဒိသာ၊ ဃဋနာရမ္မဏာပိ ကိလေသဒုကသဒိသာ).

အဓိပတိပစ္စယော

၇၈. ကိလေသော စေဝ သံကိလေသိကော စ ဓမ္မော ကိလေသဿ စေဝ သံကိလေသိကဿ စ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ။ တီဏိ.

သံကိလေသိကော စေဝ နော စ ကိလေသော ဓမ္မော သံကိလေသိကဿ စေဝ နော စ ကိလေသဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ။ပေ။ ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ သေက္ခာ ဂေါတြဘုံ ဂရုံ ကတွာ ပစ္စဝေက္ခန္တိ၊ ဝေါဒါနံ ဂရုံ ကတွာ ပစ္စဝေက္ခန္တိ၊ စက္ခုံ။ပေ။ ဝတ္ထုံ သံကိလေသိကေ စေဝ နော စ ကိလေသေ ခန္ဓေ ဂရုံ ကတွာ သံကိလေသိကာ စေဝ နော စ ကိလေသာ ခန္ဓာ ဥပ္ပဇ္ဇန္တိ. သဟဇာတာဓိပတိ – သံကိလေသိကာ စေဝ နော စ ကိလေသာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (ဣတရေ ဒွေပိ ကိလေသဒုကသဒိသာ. ဃဋနာဓိပတိပိ.)

အနန္တရပစ္စယာဒိ

၇၉. ကိလေသော စေဝ သံကိလေသိကော စ ဓမ္မော ကိလေသဿ စေဝ သံကိလေသိကဿ စ ဓမ္မဿ အနန္တရပစ္စယေန ပစ္စယော။ တီဏိ (ကိလေသဒုကသဒိသာ).

သံကိလေသိကော စေဝ နော စ ကိလေသော ဓမ္မော သံကိလေသိကဿ စေဝ နော စ ကိလေသဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သံကိလေသိကာ စေဝ နော စ ကိလေသာ ခန္ဓာ ပစ္ဆိမာနံ ပစ္ဆိမာနံ သံကိလေသိကာနဉ္စေဝ နော စ ကိလေသာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ အနုလောမံ ဝေါဒါနဿ။ အာဝဇ္ဇနာ သံကိလေသိကာနဉ္စေဝ နော စ ကိလေသာနံ ခန္ဓာနံ အနန္တရပစ္စယေန ပစ္စယော.

(ဣတရေ ဒွေ အနန္တရာ ကိလေသဒုကသဒိသာ၊ နိန္နာနာကရဏာ. ဃဋနာနန္တရမ္ပိ သဗ္ဗေ ပစ္စယာ ကိလေသဒုကသဒိသာ၊ နိန္နာနာကရဏာ. ဥပနိဿယေ လောကုတ္တရံ နတ္ထိ၊ ဣဒံ ဒုကံ ကိလေသဒုကသဒိသံ၊ နိန္နာနာကရဏံ.)

ကိလေသသံကိလေသိကဒုကံ နိဋ္ဌိတံ.