၁. ပဋိစ္စဝါရော

ဟေတုပစ္စယော

၇၄. ကိလေသဉ္စေဝ သံကိလေသိကဉ္စ ဓမ္မံ ပဋိစ္စ ကိလေသော စေဝ သံကိလေသိကော စ ဓမ္မော ဥပ္ပဇ္ဇတိ ဟေတုပစ္စယာ – လောဘံ ပဋိစ္စ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ (စက္ကံ). (၁)

ကိလေသဉ္စေဝ သံကိလေသိကဉ္စ ဓမ္မံ ပဋိစ္စ သံကိလေသိကော စေဝ နော စ ကိလေသော ဓမ္မော ဥပ္ပဇ္ဇတိ ဟေတုပစ္စယာ – ကိလေသေ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၂)

ကိလေသဉ္စေဝ သံကိလေသိကဉ္စ ဓမ္မံ ပဋိစ္စ ကိလေသော စေဝ သံကိလေသိကော စ သံကိလေသိကော စေဝ နော စ ကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – လောဘံ ပဋိစ္စ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ သမ္ပယုတ္တကာ စ ခန္ဓာ စိတ္တသမုဋ္ဌာနဉ္စ ရူပံ. (၃)