၁. ဝိဘင်္ဂဝါရော

ဟေတုပစ္စယော

၅၁. သံကိလိဋ္ဌော ဓမ္မော သံကိလိဋ္ဌဿ ဓမ္မဿ ဟေတုပစ္စယေန ပစ္စယော – သံကိလိဋ္ဌာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော. (၁)

သံကိလိဋ္ဌော ဓမ္မော အသံကိလိဋ္ဌဿ ဓမ္မဿ ဟေတုပစ္စယေန ပစ္စယော – သံကိလိဋ္ဌာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော. (၂)

သံကိလိဋ္ဌော ဓမ္မော သံကိလိဋ္ဌဿ စ အသံကိလိဋ္ဌဿ စ ဓမ္မဿ ဟေတုပစ္စယေန ပစ္စယော – သံကိလိဋ္ဌာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော. (၃)

အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ ဟေတုပစ္စယေန ပစ္စယော – အသံကိလိဋ္ဌာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အာရမ္မဏပစ္စယော

၅၂. သံကိလိဋ္ဌော ဓမ္မော သံကိလိဋ္ဌဿ ဓမ္မဿ အာရမ္မဏပစ္စယေန ပစ္စယော – ရာဂံ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဝိစိကိစ္ဆာ။ပေ။ ဥဒ္ဓစ္စ။ပေ။ ဒေါမနဿံ ဥပ္ပဇ္ဇတိ၊ ဒိဋ္ဌိံ အဿာဒေတိ။ပေ။ (ကုသလတ္တိကသဒိသံ)၊ ဝိစိကိစ္ဆံ အာရဗ္ဘ။ပေ။ ဥဒ္ဓစ္စံ အာရဗ္ဘ။ပေ။ ဒေါမနဿံ ဥပ္ပဇ္ဇတိ၊ ဒိဋ္ဌိ။ပေ။ ဝိစိကိစ္ဆာ။ပေ။ ဥဒ္ဓစ္စံ ဥပ္ပဇ္ဇတိ. (၁)

သံကိလိဋ္ဌော ဓမ္မော အသံကိလိဋ္ဌဿ ဓမ္မဿ အာရမ္မဏပစ္စယေန ပစ္စယော – အရိယာ ပဟီနေ ကိလေသေ ပစ္စဝေက္ခန္တိ၊ ဝိက္ခမ္ဘိတေ ကိလေသေ။ပေ။ ပုဗ္ဗေ သမုဒါစိဏ္ဏေ။ပေ။ သံကိလိဋ္ဌေ ခန္ဓေ အနိစ္စတော။ပေ။ ဝိပဿတိ၊ စေတောပရိယဉာဏေန သံကိလိဋ္ဌစိတ္တသမင်္ဂိဿ စိတ္တံ ဇာနာတိ၊ သံကိလိဋ္ဌာ ခန္ဓာ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၂)

၅၃. အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ။ပေ။ ဈာနာ ဝုဋ္ဌဟိတွာ ဈာနံ ပစ္စဝေက္ခတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ။ပေ။ အာဝဇ္ဇနာယ အာရမ္မဏပစ္စယေန ပစ္စယော၊ စက္ခုံ။ပေ။ ဝတ္ထုံ အသံကိလိဋ္ဌေ ခန္ဓေ အနိစ္စတော။ပေ။ ဝိပဿတိ၊ ဒိဗ္ဗေန စက္ခုနာ ရူပံ ပဿတိ။ပေ။ အနာဂတံသဉာဏဿ၊ အာဝဇ္ဇနာယ အာရမ္မဏပစ္စယေန ပစ္စယော. (၁)

အသံကိလိဋ္ဌော ဓမ္မော သံကိလိဋ္ဌဿ ဓမ္မဿ အာရမ္မဏပစ္စယေန ပစ္စယော – ဒါနံ။ပေ။ သီလံ။ပေ။ ဈာနာ ဝုဋ္ဌဟိတွာ။ပေ။ စက္ခုံ။ပေ။ ဝတ္ထုံ အသံကိလိဋ္ဌေ ခန္ဓေ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဒေါမနဿံ ဥပ္ပဇ္ဇတိ. (၂)

အဓိပတိပစ္စယော

၅၄. သံကိလိဋ္ဌော ဓမ္မော သံကိလိဋ္ဌဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ရာဂံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ဒိဋ္ဌိံ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – သံကိလိဋ္ဌာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. (၁)

သံကိလိဋ္ဌော ဓမ္မော အသံကိလိဋ္ဌဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – သံကိလိဋ္ဌာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. (၂)

သံကိလိဋ္ဌော ဓမ္မော သံကိလိဋ္ဌဿ စ အသံကိလိဋ္ဌဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – သံကိလိဋ္ဌာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၅၅. အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ။ပေ။ ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ။ပေ။ နိဗ္ဗာနံ ဖလဿ အဓိပတိပစ္စယေန ပစ္စယော. သဟဇာတာဓိပတိ – အသံကိလိဋ္ဌာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

အသံကိလိဋ္ဌော ဓမ္မော သံကိလိဋ္ဌဿ ဓမ္မဿ အဓိပတိပစ္စယေန ပစ္စယော. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ။ပေ။ ဈာနာ ဝုဋ္ဌဟိတွာ။ပေ။ စက္ခုံ။ပေ။ ဝတ္ထုံ အသံကိလိဋ္ဌေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. (၂)

အနန္တရပစ္စယာဒိ

၅၆. သံကိလိဋ္ဌော ဓမ္မော သံကိလိဋ္ဌဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ သံကိလိဋ္ဌာ ခန္ဓာ ပစ္ဆိမာနံ ပစ္ဆိမာနံ သံကိလိဋ္ဌာနံ ခန္ဓာနံ အနန္တရပစ္စယေန ပစ္စယော. (၁)

သံကိလိဋ္ဌော ဓမ္မော အသံကိလိဋ္ဌဿ ဓမ္မဿ အနန္တရပစ္စယေန ပစ္စယော – သံကိလိဋ္ဌာ ခန္ဓာ ဝုဋ္ဌာနဿ အနန္တရပစ္စယေန ပစ္စယော. (၂)

၅၇. အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ အသံကိလိဋ္ဌာ ခန္ဓာ ပစ္ဆိမာနံ ပစ္ဆိမာနံ အသံကိလိဋ္ဌာနံ ခန္ဓာနံ။ပေ။ ဖလသမာပတ္တိယာ အနန္တရပစ္စယေန ပစ္စယော. (၁)

အသံကိလိဋ္ဌော ဓမ္မော သံကိလိဋ္ဌဿ ဓမ္မဿ အနန္တရပစ္စယေန ပစ္စယော – အာဝဇ္ဇနာ သံကိလိဋ္ဌာနံ ခန္ဓာနံ အနန္တရပစ္စယေန ပစ္စယော. (၂)

သမနန္တရပစ္စယေန ပစ္စယော။ စတ္တာရိ။ သဟဇာတပစ္စယေန ပစ္စယော။ ပဉ္စ။ အညမညပစ္စယေန ပစ္စယော။ ဒွေ။ နိဿယပစ္စယေန ပစ္စယော။ သတ္တ.

ဥပနိဿယပစ္စယော

၅၈. သံကိလိဋ္ဌော ဓမ္မော သံကိလိဋ္ဌဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ရာဂံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ၊ ဒေါသံ။ပေ။ ပတ္ထနံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ၊ ရာဂေါ။ပေ။ ပတ္ထနာ ရာဂဿ။ပေ။ ပတ္ထနာယ ဥပနိဿယပစ္စယေန ပစ္စယော. (၁)

သံကိလိဋ္ဌော ဓမ္မော အသံကိလိဋ္ဌဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ရာဂံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ ဒေါသံ။ပေ။ ပတ္ထနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ ရာဂေါ။ပေ။ ပတ္ထနာ သဒ္ဓါယ။ပေ။ ပညာယ ကာယိကဿ သုခဿ။ ကာယိကဿ ဒုက္ခဿ။ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၂)

၅၉. အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ သီလံ။ပေ။ ပညံ၊ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ ဒါနံ ဒေတိ။ပေ။ သမာပတ္တိံ ဥပ္ပါဒေတိ၊ သဒ္ဓါ။ပေ။ သေနာသနံ သဒ္ဓါယ။ပေ။ ဖလသမာပတ္တိယာ ဥပနိဿယပစ္စယေန ပစ္စယော. (၁)

အသံကိလိဋ္ဌော ဓမ္မော သံကိလိဋ္ဌဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – သဒ္ဓံ ဥပနိဿာယ မာနံ ဇပ္ပေတိ၊ ဒိဋ္ဌိံ ဂဏှာတိ၊ သီလံ။ပေ။ ပညံ။ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ ပါဏံ ဟနတိ။ပေ။ သံဃံ ဘိန္ဒတိ၊ သဒ္ဓါ။ပေ။ သေနာသနံ ရာဂဿ။ပေ။ ပတ္ထနာယ ဥပနိဿယပစ္စယေန ပစ္စယော. (၂)

ပုရေဇာတပစ္စယော

၆၀. အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ (သံခိတ္တံ). အသံကိလိဋ္ဌော ဓမ္မော သံကိလိဋ္ဌဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ (သံခိတ္တံ). (၂)

ပစ္ဆာဇာတာသေဝနပစ္စယာ

၆၁. သံကိလိဋ္ဌော ဓမ္မော အသံကိလိဋ္ဌဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ). အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ ပစ္ဆာဇာတပစ္စယေန ပစ္စယော (သံခိတ္တံ). ။အာသေဝနပစ္စယေန ပစ္စယော။ ဒွေ.

ကမ္မပစ္စယော

၆၂. သံကိလိဋ္ဌော ဓမ္မော သံကိလိဋ္ဌဿ ဓမ္မဿ ကမ္မပစ္စယေန ပစ္စယော – သံကိလိဋ္ဌာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော. (၁)

သံကိလိဋ္ဌော ဓမ္မော အသံကိလိဋ္ဌဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – သံကိလိဋ္ဌာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော. နာနာက္ခဏိကာ – သံကိလိဋ္ဌာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (မူလံ ကာတဗ္ဗံ.) သံကိလိဋ္ဌာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော. (၃)

အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – အသံကိလိဋ္ဌာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – အသံကိလိဋ္ဌာ စေတနာ ဝိပါကာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၁)

ဝိပါကပစ္စယာဒိ

၆၃. အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ ဝိပါကပစ္စယေန ပစ္စယော။ ဧကံ.

သံကိလိဋ္ဌော ဓမ္မော သံကိလိဋ္ဌဿ ဓမ္မဿ အာဟာရပစ္စယေန ပစ္စယော။ ဣန္ဒြိယပစ္စယေန ပစ္စယော။ ဈာနပစ္စယေန ပစ္စယော။ မဂ္ဂပစ္စယေန ပစ္စယော။ သမ္ပယုတ္တပစ္စယေန ပစ္စယော.

ဝိပ္ပယုတ္တပစ္စယော

၆၄. သံကိလိဋ္ဌော ဓမ္မော အသံကိလိဋ္ဌဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). (၁)

အသံကိလိဋ္ဌော ဓမ္မော သံကိလိဋ္ဌဿ ဓမ္မဿ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု သံကိလိဋ္ဌာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)

အတ္ထိပစ္စယာဒိ

၆၅. သံကိလိဋ္ဌော ဓမ္မော သံကိလိဋ္ဌဿ ဓမ္မဿ အတ္ထိပစ္စယေန ပစ္စယော ။ ဧကံ (ပဋိစ္စဝါရသဒိသံ). သံကိလိဋ္ဌော ဓမ္မော အသံကိလိဋ္ဌဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). သံကိလိဋ္ဌော ဓမ္မော သံကိလိဋ္ဌဿ စ အသံကိလိဋ္ဌဿ စ ဓမ္မဿ အတ္ထိပစ္စယေန ပစ္စယော (ပဋိစ္စသဒိသံ). (၃)

အသံကိလိဋ္ဌော ဓမ္မော အသံကိလိဋ္ဌဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). အသံကိလိဋ္ဌော ဓမ္မော သံကိလိဋ္ဌဿ ဓမ္မဿ အတ္ထိပစ္စယေန ပစ္စယော – ပုရေဇာတံ (သံခိတ္တံ). (၂)

၆၆. သံကိလိဋ္ဌော စ အသံကိလိဋ္ဌော စ ဓမ္မာ သံကိလိဋ္ဌဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – သံကိလိဋ္ဌော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ (သံခိတ္တံ). (၁)

သံကိလိဋ္ဌော စ အသံကိလိဋ္ဌော စ ဓမ္မာ အသံကိလိဋ္ဌဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – သံကိလိဋ္ဌာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော. ပစ္ဆာဇာတာ – သံကိလိဋ္ဌာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – သံကိလိဋ္ဌာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.