၁-၄. ပစ္စယာနုလောမာဒိ

ဟေတုပစ္စယော

၄၉. သံကိလိဋ္ဌံ ဓမ္မံ သံသဋ္ဌော သံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ – သံကိလိဋ္ဌံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ ။ပေ။. (၁)

အသံကိလိဋ္ဌံ ဓမ္မံ သံသဋ္ဌော အသံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ – အသံကိလိဋ္ဌံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

ဟေတုယာ ဒွေ၊ အာရမ္မဏေ ဒွေ၊ အဓိပတိယာ ဒွေ (သဗ္ဗတ္ထ ဒွေ)၊ ဝိပါကေ ဧကံ။ပေ။ အဝိဂတေ ဒွေ.

အနုလောမံ.

၅၀. သံကိလိဋ္ဌံ ဓမ္မံ သံသဋ္ဌော သံကိလိဋ္ဌော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အသံကိလိဋ္ဌံ ဓမ္မံ သံသဋ္ဌော အသံကိလိဋ္ဌော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အသံကိလိဋ္ဌံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။. (၁)

နဟေတုယာ ဒွေ၊ နအဓိပတိယာ ဒွေ၊ နပုရေဇာတေ ဒွေ၊ နပစ္ဆာဇာတေ ဒွေ၊ နအာသေဝနေ ဒွေ၊ နကမ္မေ ဒွေ၊ နဝိပါကေ ဒွေ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ ဒွေ.

ပစ္စနီယံ.