၁. ဝိဘင်္ဂဝါရော

နဟေတုပစ္စယော

၄၇. သံကိလိဋ္ဌံ ဓမ္မံ ပစ္စယာ သံကိလိဋ္ဌော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အသံကိလိဋ္ဌံ ဓမ္မံ ပစ္စယာ အသံကိလိဋ္ဌော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အသံကိလိဋ္ဌံ။ပေ။ (ယာဝ အသညသတ္တာ) စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ အသံကိလိဋ္ဌာ ခန္ဓာ. (၁)

အသံကိလိဋ္ဌံ ဓမ္မံ ပစ္စယာ သံကိလိဋ္ဌော ဓမ္မော ဥပ္ပဇ္ဇတိ နဟေတုပစ္စယာ – ဝတ္ထုံ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

သံကိလိဋ္ဌဉ္စ အသံကိလိဋ္ဌဉ္စ ဓမ္မံ ပစ္စယာ သံကိလိဋ္ဌော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)