၁. ဝိဘင်္ဂဝါရော

ဟေတုပစ္စယော

၄၄. သံကိလိဋ္ဌံ ဓမ္မံ ပစ္စယာ သံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသံ).

အသံကိလိဋ္ဌံ ဓမ္မံ ပစ္စယာ အသံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ – အသံကိလိဋ္ဌံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (ယာဝ အဇ္ဈတ္တိကာ မဟာဘူတာ) ဝတ္ထုံ ပစ္စယာ အသံကိလိဋ္ဌာ ခန္ဓာ. (၁)

အသံကိလိဋ္ဌံ ဓမ္မံ ပစ္စယာ သံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ သံကိလိဋ္ဌာ ခန္ဓာ. (၂)

အသံကိလိဋ္ဌံ ဓမ္မံ ပစ္စယာ သံကိလိဋ္ဌော စ အသံကိလိဋ္ဌော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ သံကိလိဋ္ဌာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ. (၃)

၄၅. သံကိလိဋ္ဌဉ္စ အသံကိလိဋ္ဌဉ္စ ဓမ္မံ ပစ္စယာ သံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ – သံကိလိဋ္ဌံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။. (၁)

သံကိလိဋ္ဌဉ္စ အသံကိလိဋ္ဌဉ္စ ဓမ္မံ ပစ္စယာ အသံကိလိဋ္ဌော ဓမ္မော ဥပ္ပဇ္ဇတိ ဟေတုပစ္စယာ – သံကိလိဋ္ဌေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၂)

သံကိလိဋ္ဌဉ္စ အသံကိလိဋ္ဌဉ္စ ဓမ္မံ ပစ္စယာ သံကိလိဋ္ဌော စ အသံကိလိဋ္ဌော စ ဓမ္မာ ဥပ္ပဇ္ဇန္တိ ဟေတုပစ္စယာ – သံကိလိဋ္ဌံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ သံကိလိဋ္ဌေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ (သံခိတ္တံ). (၃)