၁. ဝိဘင်္ဂဝါရော

ဟေတုပစ္စယော

၁. ကိလေသံ ဓမ္မံ ပဋိစ္စ ကိလေသော ဓမ္မော ဥပ္ပဇ္ဇတိ ဟေတုပစ္စယာ – လောဘံ ပဋိစ္စ မောဟော ဒိဋ္ဌိ ထိနံ [ထီနံ (သီ. သျာ.)] ဥဒ္ဓစ္စံ အဟိရိကံ အနောတ္တပ္ပံ၊ လောဘံ ပဋိစ္စ မောဟော ဒိဋ္ဌိ ဥဒ္ဓစ္စံ အဟိရိကံ အနောတ္တပ္ပံ၊ လောဘံ ပဋိစ္စ မောဟော မာနော ထိနံ ဥဒ္ဓစ္စံ အဟိရိကံ အနောတ္တပ္ပံ၊ လောဘံ ပဋိစ္စ မောဟော မာနော ဥဒ္ဓစ္စံ အဟိရိကံ အနောတ္တပ္ပံ၊ လောဘံ ပဋိစ္စ မောဟော ထိနံ ဥဒ္ဓစ္စံ အဟိရိကံ အနောတ္တပ္ပံ၊ လောဘံ ပဋိစ္စ မောဟော ဥဒ္ဓစ္စံ အဟိရိကံ အနောတ္တပ္ပံ၊ ဒေါသံ ပဋိစ္စ မောဟော ထိနံ ဥဒ္ဓစ္စံ အဟိရိကံ အနောတ္တပ္ပံ၊ ဒေါသံ ပဋိစ္စ မောဟော ဥဒ္ဓစ္စံ အဟိရိကံ အနောတ္တပ္ပံ၊ ဝိစိကိစ္ဆံ ပဋိစ္စ မောဟော ဥဒ္ဓစ္စံ အဟိရိကံ အနောတ္တပ္ပံ၊ ဥဒ္ဓစ္စံ ပဋိစ္စ မောဟော အဟိရိကံ အနောတ္တပ္ပံ. (၁)

ကိလေသံ ဓမ္မံ ပဋိစ္စ နောကိလေသော ဓမ္မော ဥပ္ပဇ္ဇတိ ဟေတုပစ္စယာ – ကိလေသံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ. (၂)

ကိလေသံ ဓမ္မံ ပဋိစ္စ ကိလေသော စ နောကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – လောဘံ ပဋိစ္စ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ သမ္ပယုတ္တကာ စ ခန္ဓာ စိတ္တသမုဋ္ဌာနဉ္စ ရူပံ (စက္ကံ). (၃)

၂. နောကိလေသံ ဓမ္မံ ပဋိစ္စ နောကိလေသော ဓမ္မော ဥပ္ပဇ္ဇတိ ဟေတုပစ္စယာ – နောကိလေသံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။. (၁)

နောကိလေသံ ဓမ္မံ ပဋိစ္စ ကိလေသော ဓမ္မော ဥပ္ပဇ္ဇတိ ဟေတုပစ္စယာ – နောကိလေသေ ခန္ဓေ ပဋိစ္စ ကိလေသာ. (၂)

နောကိလေသံ ဓမ္မံ ပဋိစ္စ ကိလေသော စ နောကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – နောကိလေသံ ဧကံ ခန္ဓံ ပဋိစ္စ တယော ခန္ဓာ ကိလေသာ စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

၃. ကိလေသဉ္စ နောကိလေသဉ္စ ဓမ္မံ ပဋိစ္စ ကိလေသော ဓမ္မော ဥပ္ပဇ္ဇတိ ဟေတုပစ္စယာ – လောဘဉ္စ သမ္ပယုတ္တကေ စ ခန္ဓေ ပဋိစ္စ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ (စက္ကံ). (၁)

ကိလေသဉ္စ နောကိလေသဉ္စ ဓမ္မံ ပဋိစ္စ နောကိလေသော ဓမ္မော ဥပ္ပဇ္ဇတိ ဟေတုပစ္စယာ – နောကိလေသံ ဧကံ ခန္ဓဉ္စ ကိလေသေ စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ ကိလေသေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၂)

ကိလေသဉ္စ နောကိလေသဉ္စ ဓမ္မံ ပဋိစ္စ ကိလေသော စ နောကိလေသော စ ဓမ္မာ ဥပ္ပဇ္ဇန္တိ ဟေတုပစ္စယာ – နောကိလေသံ ဧကံ ခန္ဓဉ္စ လောဘဉ္စ ပဋိစ္စ တယော ခန္ဓာ မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ (စက္ကံ၊ သံခိတ္တံ). (၃)