၁. ဝိဘင်္ဂဝါရော

နဟေတုပစ္စယော

၄၂. သံကိလိဋ္ဌံ ဓမ္မံ ပဋိစ္စ သံကိလိဋ္ဌော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အသံကိလိဋ္ဌံ ဓမ္မံ ပဋိစ္စ အသံကိလိဋ္ဌော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အသံကိလိဋ္ဌံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ (ယာဝ အသညသတ္တာ). (၁)