၃. ပစ္စယဝါရော

၁-၄. ပစ္စယစတုက္ကံ

၃၄၇. သရဏံ ဓမ္မံ ပစ္စယာ သရဏော ဓမ္မော ဥပ္ပဇ္ဇတိ ဟေတုပစ္စယာ – သရဏံ ဧကံ ခန္ဓံ ပစ္စယာ တယော ခန္ဓာ။ပေ။ ဒွေ ခန္ဓေ။ပေ။ (ယထာ အရူပါဝစရဒုကဿ ပစ္စယဝါရောပိ ဧဝံ ကာတဗ္ဗော).

ဟေတုယာ နဝ၊ အာရမ္မဏေ စတ္တာရိ၊ အဓိပတိယာ နဝ။ပေ။ အဝိဂတေ နဝ.

အနုလောမံ.

၃၄၈. သရဏံ ဓမ္မံ ပစ္စယာ သရဏော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

အရဏံ ဓမ္မံ ပစ္စယာ အရဏော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အရဏံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ (ယာဝ အသညသတ္တာ) စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ ခန္ဓာ. အရဏံ ဓမ္မံ ပစ္စယာ သရဏော ဓမ္မော ဥပ္ပဇ္ဇတိ နဟေတုပစ္စယာ – ဝတ္ထုံ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၂)

သရဏဉ္စ အရဏဉ္စ ဓမ္မံ ပစ္စယာ သရဏော ဓမ္မော ဥပ္ပဇ္ဇတိ နဟေတုပစ္စယာ – ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

နဟေတုယာ စတ္တာရိ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ၊ နသမနန္တရေ တီဏိ၊ နအညမညေ တီဏိ၊ နဥပနိဿယေ တီဏိ၊ နပုရေဇာတေ စတ္တာရိ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ တီဏိ၊ နဝိပ္ပယုတ္တေ ဒွေ၊ နောနတ္ထိယာ တီဏိ၊ နောဝိဂတေ တီဏိ.

ပစ္စနီယံ.