၁. ဝိဘင်္ဂဝါရော

ဟေတုပစ္စယော

၃၀၆. နိယျာနိကံ ဓမ္မံ ပစ္စယာ နိယျာနိကော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

အနိယျာနိကံ ဓမ္မံ ပစ္စယာ အနိယျာနိကော ဓမ္မော ဥပ္ပဇ္ဇတိ ဟေတုပစ္စယာ – အနိယျာနိကံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ (ယာဝ အဇ္ဈတ္တိကာ မဟာဘူတာ) ဝတ္ထုံ ပစ္စယာ အနိယျာနိကာ ခန္ဓာ. အနိယျာနိကံ ဓမ္မံ ပစ္စယာ နိယျာနိကော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ နိယျာနိကာ ခန္ဓာ. အနိယျာနိကံ ဓမ္မံ ပစ္စယာ နိယျာနိကော စ အနိယျာနိကော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ နိယျာနိကာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ. (၃)

၃၀၇. နိယျာနိကဉ္စ အနိယျာနိကဉ္စ ဓမ္မံ ပစ္စယာ နိယျာနိကော ဓမ္မော ဥပ္ပဇ္ဇတိ ဟေတုပစ္စယာ – နိယျာနိကံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။. နိယျာနိကဉ္စ အနိယျာနိကဉ္စ ဓမ္မံ ပစ္စယာ အနိယျာနိကော ဓမ္မော ဥပ္ပဇ္ဇတိ ဟေတုပစ္စယာ – နိယျာနိကေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. နိယျာနိကဉ္စ အနိယျာနိကဉ္စ ဓမ္မံ ပစ္စယာ နိယျာနိကော စ အနိယျာနိကော စ ဓမ္မာ ဥပ္ပဇ္ဇန္တိ ဟေတုပစ္စယာ – နိယျာနိကံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ နိယျာနိကေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၃)