၁. ဝိဘင်္ဂဝါရော

ဟေတုပစ္စယော

၂၇၃. အရူပါဝစရံ ဓမ္မံ ပစ္စယာ အရူပါဝစရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

နအရူပါဝစရံ ဓမ္မံ ပစ္စယာ နအရူပါဝစရော ဓမ္မော ဥပ္ပဇ္ဇတိ ဟေတုပစ္စယာ – နအရူပါဝစရံ ဧကံ ခန္ဓံ။ပေ။ (ယာဝ အဇ္ဈတ္တိကာ မဟာဘူတာ) ဝတ္ထုံ ပစ္စယာ နအရူပါဝစရာ ခန္ဓာ. နအရူပါဝစရံ ဓမ္မံ ပစ္စယာ အရူပါဝစရော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ အရူပါဝစရာ ခန္ဓာ. နအရူပါဝစရံ ဓမ္မံ ပစ္စယာ အရူပါဝစရော စ နအရူပါဝစရော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ အရူပါဝစရာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ. (၃)

၂၇၄. အရူပါဝစရဉ္စ နအရူပါဝစရဉ္စ ဓမ္မံ ပစ္စယာ အရူပါဝစရော ဓမ္မော ဥပ္ပဇ္ဇတိ ဟေတုပစ္စယာ – အရူပါဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။. အရူပါဝစရဉ္စ နအရူပါဝစရဉ္စ ဓမ္မံ ပစ္စယာ နအရူပါဝစရော ဓမ္မော ဥပ္ပဇ္ဇတိ ဟေတုပစ္စယာ – အရူပါဝစရေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. အရူပါဝစရဉ္စ နအရူပါဝစရဉ္စ ဓမ္မံ ပစ္စယာ အရူပါဝစရော စ နအရူပါဝစရော စ ဓမ္မာ ဥပ္ပဇ္ဇန္တိ ဟေတုပစ္စယာ – အရူပါဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ အရူပါဝစရေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ. (၃)