၁. ဝိဘင်္ဂဝါရော

ဟေတုပစ္စယော

၂၄၅. ရူပါဝစရော ဓမ္မော ရူပါဝစရဿ ဓမ္မဿ ဟေတုပစ္စယေန ပစ္စယော – ရူပါဝစရာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (မူလံ ကာတဗ္ဗံ.) ရူပါဝစရာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (မူလံ ကာတဗ္ဗံ.) ရူပါဝစရာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၃)

နရူပါဝစရော ဓမ္မော နရူပါဝစရဿ ဓမ္မဿ ဟေတုပစ္စယေန ပစ္စယော – နရူပါဝစရာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

အာရမ္မဏပစ္စယော

၂၄၆. ရူပါဝစရော ဓမ္မော ရူပါဝစရဿ ဓမ္မဿ အာရမ္မဏပစ္စယေန ပစ္စယော – စေတောပရိယဉာဏေန ရူပါဝစရစိတ္တသမင်္ဂိဿ စိတ္တံ ဇာနာတိ၊ ရူပါဝစရာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော. ရူပါဝစရော ဓမ္မော နရူပါဝစရဿ ဓမ္မဿ အာရမ္မဏပစ္စယေန ပစ္စယော – ပဌမံ ဈာနံ ပစ္စဝေက္ခတိ။ပေ။ စတုတ္ထံ ဈာနံ ပစ္စဝေက္ခတိ၊ ဒိဗ္ဗံ စက္ခုံ ပစ္စဝေက္ခတိ၊ ဒိဗ္ဗံ သောတဓာတုံ။ပေ။ ဣဒ္ဓိဝိဓဉာဏံ။ပေ။ စေတောပရိယဉာဏံ။ပေ။ ပုဗ္ဗေနိဝါသာနုဿတိဉာဏံ။ပေ။ ယထာကမ္မူပဂဉာဏံ။ပေ။ အနာဂတံသဉာဏံ ပစ္စဝေက္ခတိ၊ ရူပါဝစရေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ. (၂)

၂၄၇. နရူပါဝစရော ဓမ္မော နရူပါဝစရဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဒေါမနဿံ ဥပ္ပဇ္ဇတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ ပစ္စဝေက္ခန္တိ၊ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အရိယာ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ။ပေ။ စက္ခုံ။ပေ။ ဝတ္ထုံ နရူပါဝစရေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ အာရမ္မဏပစ္စယေန ပစ္စယော. (၁)

နရူပါဝစရော ဓမ္မော ရူပါဝစရဿ ဓမ္မဿ အာရမ္မဏပစ္စယေန ပစ္စယော – ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန နရူပါဝစရစိတ္တသမင်္ဂိဿ စိတ္တံ ဇာနာတိ၊ နရူပါဝစရာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော. (၂)

အဓိပတိပစ္စယော

၂၄၈. ရူပါဝစရော ဓမ္မော ရူပါဝစရဿ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – ရူပါဝစရာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. ရူပါဝစရော ဓမ္မော နရူပါဝစရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ပဌမံ ဈာနံ ဂရုံ ကတွာ ပစ္စဝေက္ခတိ၊ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ပေ။ စတုတ္ထံ ဈာနံ။ပေ။ ဒိဗ္ဗံ စက္ခုံ။ပေ။ ဒိဗ္ဗံ သောတဓာတုံ။ပေ။ ဣဒ္ဓိဝိဓဉာဏံ။ပေ။ စေတောပရိယဉာဏံ။ပေ။ ပုဗ္ဗေနိဝါသာနုဿတိဉာဏံ။ပေ။ ယထာကမ္မူပဂဉာဏံ။ပေ။ အနာဂတံသဉာဏံ ဂရုံ ကတွာ ပစ္စဝေက္ခတိ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ ရူပါဝစရေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – ရူပါဝစရာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော. ရူပါဝစရော ဓမ္မော ရူပါဝစရဿ စ နရူပါဝစရဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – ရူပါဝစရာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

၂၄၉. နရူပါဝစရော ဓမ္မော နရူပါဝစရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ ဂရုံ ကတွာ ပစ္စဝေက္ခတိ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ။ပေ။ ဖလံ။ပေ။ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ မဂ္ဂဿ၊ ဖလဿ အဓိပတိပစ္စယေန ပစ္စယော၊ စက္ခုံ။ပေ။ ဝတ္ထုံ နရူပါဝစရေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ အာကာသာနဉ္စာယတနံ ဂရုံ ကတွာ ပစ္စဝေက္ခတိ။ပေ။ နေဝသညာနာသညာယတနံ ဂရုံ ကတွာ ပစ္စဝေက္ခတိ. သဟဇာတာဓိပတိ – နရူပါဝစရာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

အနန္တရပစ္စယာဒိ

၂၅၀. ရူပါဝစရော ဓမ္မော ရူပါဝစရဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ရူပါဝစရာ ခန္ဓာ ပစ္ဆိမာနံ ပစ္ဆိမာနံ ရူပါဝစရာနံ ခန္ဓာနံ အနန္တရပစ္စယေန ပစ္စယော. ရူပါဝစရော ဓမ္မော နရူပါဝစရဿ ဓမ္မဿ အနန္တရပစ္စယေန ပစ္စယော – ရူပါဝစရံ စုတိစိတ္တံ နရူပါဝစရဿ ဥပပတ္တိစိတ္တဿ အနန္တရပစ္စယေန ပစ္စယော၊ ရူပါဝစရံ ဘဝင်္ဂံ အာဝဇ္ဇနာယ။ ရူပါဝစရာ ခန္ဓာ နရူပါဝစရဿ ဝုဋ္ဌာနဿ အနန္တရပစ္စယေန ပစ္စယော. (၂)

၂၅၁. နရူပါဝစရော ဓမ္မော နရူပါဝစရဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ နရူပါဝစရာ ခန္ဓာ ပစ္ဆိမာနံ ပစ္ဆိမာနံ နရူပါဝစရာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ပေ။ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော. နရူပါဝစရော ဓမ္မော ရူပါဝစရဿ ဓမ္မဿ အနန္တရပစ္စယေန ပစ္စယော – နရူပါဝစရံ စုတိစိတ္တံ ရူပါဝစရဿ ဥပပတ္တိစိတ္တဿ အနန္တရပစ္စယေန ပစ္စယော၊ နရူပါဝစရာ ခန္ဓာ ရူပါဝစရဿ ဝုဋ္ဌာနဿ အနန္တရပစ္စယေန ပစ္စယော၊ ပဌမဿ ဈာနဿ ပရိကမ္မံ ပဌမဿ ဈာနဿ အနန္တရပစ္စယေန ပစ္စယော။ပေ။ စတုတ္ထဿ ဈာနဿ။ပေ။ ဒိဗ္ဗဿ စက္ခုဿ။ပေ။ ဒိဗ္ဗာယ သောတဓာတုယာ။ပေ။ ဣဒ္ဓိဝိဓဉာဏဿ။ပေ။ စေတောပရိယဉာဏဿ။ပေ။ ပုဗ္ဗေနိဝါသာနုဿတိဉာဏဿ။ပေ။ ယထာကမ္မူပဂဉာဏဿ။ပေ။ အနာဂတံသဉာဏဿ၊ ပရိကမ္မံ အနာဂတံသဉာဏဿ အနန္တရပစ္စယေန ပစ္စယော. (၂)

သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ သတ္တ။ အညမညပစ္စယေန ပစ္စယော။ ဆ။ နိဿယပစ္စယေန ပစ္စယော။ သတ္တ.

ဥပနိဿယပစ္စယော

၂၅၂. ရူပါဝစရော ဓမ္မော ရူပါဝစရဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ရူပါဝစရံ သဒ္ဓံ ဥပနိဿာယ ရူပါဝစရံ ဈာနံ ဥပ္ပါဒေတိ၊ အဘိညံ။ပေ။ သမာပတ္တိံ ဥပ္ပါဒေတိ၊ ရူပါဝစရံ သီလံ။ပေ။ ပညံ ဥပနိဿာယ ရူပါဝစရံ ဈာနံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ ရူပါဝစရာ သဒ္ဓါ။ပေ။ ပညာ ရူပါဝစရာယ သဒ္ဓါယ။ပေ။ ပညာယ ဥပနိဿယပစ္စယေန ပစ္စယော၊ ပဌမံ ဈာနံ ဒုတိယဿ ဈာနဿ ဥပနိဿယပစ္စယေန ပစ္စယော၊ ဒုတိယံ ဈာနံ တတိယဿ ဈာနဿ။ပေ။ တတိယံ ဈာနံ စတုတ္ထဿ ဈာနဿ ဥပနိဿယပစ္စယေန ပစ္စယော. (၁)

ရူပါဝစရော ဓမ္မော နရူပါဝစရဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ရူပါဝစရံ သဒ္ဓံ ဥပနိဿာယ ဒါနံ ဒေတိ၊ သီလံ။ပေ။ ဥပေါသထကမ္မံ ကရောတိ၊ ရူပါဝစရံ ဈာနံ။ပေ။ ဝိပဿနံ။ပေ။ မဂ္ဂံ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ ရူပါဝစရံ သီလံ။ပေ။ ပညံ ဥပနိဿာယ ဒါနံ ဒေတိ။ပေ။ မာနံ ဇပ္ပေတိ၊ ဒိဋ္ဌိံ ဂဏှာတိ၊ ရူပါဝစရာ သဒ္ဓါ။ပေ။ ပညာ နရူပါဝစရာယ သဒ္ဓါယ။ပေ။ ပညာယ။ ရာဂဿ။ပေ။ ပတ္ထနာယ။ ကာယိကဿ သုခဿ။ ကာယိကဿ ဒုက္ခဿ။ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၂)

၂၅၃. နရူပါဝစရော ဓမ္မော နရူပါဝစရဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – နရူပါဝစရံ သဒ္ဓံ ဥပနိဿာယ ဒါနံ။ပေ။ သီလံ။ပေ။ ဥပေါသထကမ္မံ ကရောတိ၊ နရူပါဝစရံ ဈာနံ။ပေ။ ဝိပဿနံ။ပေ။ မဂ္ဂံ။ပေ။ သမာပတ္တိံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ နရူပါဝစရံ သီလံ။ပေ။ ပညံ၊ ရာဂံ။ပေ။ ဘောဇနံ၊ သေနာသနံ ဥပနိဿာယ ဒါနံ ဒေတိ။ပေ။ ပါဏံ ဟနတိ။ပေ။ သံဃံ ဘိန္ဒတိ၊ နရူပါဝစရာ သဒ္ဓါ။ပေ။ ပညာ။ ရာဂေါ။ပေ။ သေနာသနံ နရူပါဝစရာယ သဒ္ဓါယ။ပေ။ ပညာယ။ ရာဂဿ။ပေ။ ပတ္ထနာယ။ ကာယိကဿ သုခဿ။ ကာယိကဿ ဒုက္ခဿ။ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော. (၁)

နရူပါဝစရော ဓမ္မော ရူပါဝစရဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – နရူပါဝစရံ သဒ္ဓံ ဥပနိဿာယ ရူပါဝစရံ ဈာနံ။ပေ။ အဘိညံ ။ပေ။ သမာပတ္တိံ ဥပ္ပါဒေတိ၊ နရူပါဝစရံ သီလံ။ပေ။ သေနာသနံ ဥပနိဿာယ ရူပါဝစရံ ဈာနံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ နရူပါဝစရာ သဒ္ဓါ။ပေ။ သေနာသနံ ရူပါဝစရာယ သဒ္ဓါယ။ပေ။ ပညာယ ဥပနိဿယပစ္စယေန ပစ္စယော၊ ပဌမဿ ဈာနဿ ပရိကမ္မံ ပဌမဿ ဈာနဿ ဥပနိဿယပစ္စယေန ပစ္စယော။ပေ။ စတုတ္ထဿ ဈာနဿ။ပေ။ ဒိဗ္ဗဿ စက္ခုဿ ပရိကမ္မံ။ပေ။ ဒိဗ္ဗာယ သောတဓာတုယာ။ပေ။ ဣဒ္ဓိဝိဓဉာဏဿ။ပေ။ စေတောပရိယဉာဏဿ။ပေ။ ပုဗ္ဗေနိဝါသာနုဿတိဉာဏဿ။ပေ။ ယထာကမ္မူပဂဉာဏဿ။ပေ။ အနာဂတံသဉာဏဿ ပရိကမ္မံ အနာဂတံသဉာဏဿ ဥပနိဿယပစ္စယေန ပစ္စယော. (၂)

ပုရေဇာတပစ္စယာဒိ

၂၅၄. နရူပါဝစရော ဓမ္မော နရူပါဝစရဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ ပုရေဇာတပစ္စယေန ပစ္စယော. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ ပုရေဇာတပစ္စယေန ပစ္စယော၊ ဝတ္ထု နရူပါဝစရာနံ ခန္ဓာနံ ပုရေဇာတပစ္စယေန ပစ္စယော. နရူပါဝစရော ဓမ္မော ရူပါဝစရဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ဝတ္ထုပုရေဇာတံ – ဝတ္ထု ရူပါဝစရာနံ ခန္ဓာနံ ပုရေဇာတပစ္စယေန ပစ္စယော. (၂)

ပစ္ဆာဇာတပစ္စယေန ပစ္စယော။ ဒွေ။ အာသေဝနပစ္စယေန ပစ္စယော။ တီဏိ.

ကမ္မပစ္စယာဒိ

၂၅၅. ရူပါဝစရော ဓမ္မော ရူပါဝစရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ရူပါဝစရာ စေတနာ သမ္ပယုတ္တကာနံ ခန္ဓာနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – ရူပါဝစရာ စေတနာ ဝိပါကာနံ ရူပါဝစရာနံ ခန္ဓာနံ ကမ္မပစ္စယေန ပစ္စယော. ရူပါဝစရော ဓမ္မော နရူပါဝစရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ရူပါဝစရာ စေတနာ စိတ္တသမုဋ္ဌာနာနံ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – ရူပါဝစရာ စေတနာ ကဋတ္တာရူပါနံ ကမ္မပစ္စယေန ပစ္စယော. ရူပါဝစရော ဓမ္မော ရူပါဝစရဿ စ နရူပါဝစရဿ စ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – ရူပါဝစရာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – ရူပါဝစရာ စေတနာ ဝိပါကာနံ ရူပါဝစရာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော. (၃)

နရူပါဝစရော ဓမ္မော နရူပါဝစရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ. သဟဇာတာ – နရူပါဝစရာ စေတနာ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ကမ္မပစ္စယေန ပစ္စယော၊ ပဋိသန္ဓိက္ခဏေ။ပေ။. နာနာက္ခဏိကာ – နရူပါဝစရာ စေတနာ ဝိပါကာနံ နရူပါဝစရာနံ ခန္ဓာနံ ကဋတ္တာ စ ရူပါနံ ကမ္မပစ္စယေန ပစ္စယော။. (၁)

ဝိပါကပစ္စယေန ပစ္စယော။ စတ္တာရိ။ အာဟာရပစ္စယေန ပစ္စယော။ စတ္တာရိ။ ဣန္ဒြိယပစ္စယေန ပစ္စယော။ စတ္တာရိ။ ဈာနပစ္စယေန ပစ္စယော။ စတ္တာရိ။ မဂ္ဂပစ္စယေန ပစ္စယော။ စတ္တာရိ။ သမ္ပယုတ္တပစ္စယေန ပစ္စယော။ ဒွေ.

ဝိပ္ပယုတ္တပစ္စယော

၂၅၆. ရူပါဝစရော ဓမ္မော နရူပါဝစရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ (သံခိတ္တံ). (၁)

နရူပါဝစရော ဓမ္မော နရူပါဝစရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). နရူပါဝစရော ဓမ္မော ရူပါဝစရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု ရူပါဝစရာနံ ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု ရူပါဝစရာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)

အတ္ထိပစ္စယာဒိ

၂၅၇. ရူပါဝစရော ဓမ္မော ရူပါဝစရဿ ဓမ္မဿ အတ္ထိပစ္စယေန ပစ္စယော (ပဋိစ္စသဒိသံ). ရူပါဝစရော ဓမ္မော နရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ. ရူပါဝစရော ဓမ္မော ရူပါဝစရဿ စ နရူပါဝစရဿ စ ဓမ္မဿ အတ္ထိပစ္စယေန ပစ္စယော (ပဋိစ္စသဒိသံ). (၃)

နရူပါဝစရော ဓမ္မော နရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). နရူပါဝစရော ဓမ္မော ရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု ရူပါဝစရာနံ ခန္ဓာနံ အတ္ထိပစ္စယေန ပစ္စယော. ပုရေဇာတံ – ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ ဝတ္ထု ရူပါဝစရာနံ ခန္ဓာနံ အတ္ထိပစ္စယေန ပစ္စယော. (၂)

၂၅၈. ရူပါဝစရော စ နရူပါဝစရော စ ဓမ္မာ ရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – ရူပါဝစရော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ ပဋိသန္ဓိက္ခဏေ။ပေ။. ရူပါဝစရော စ နရူပါဝစရော စ ဓမ္မာ နရူပါဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – ရူပါဝစရာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ။ပေ။. ပစ္ဆာဇာတာ – ရူပါဝစရာ ခန္ဓာ စ ကဗဠီကာရော အာဟာရော စ ပုရေဇာတဿ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – ရူပါဝစရာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. (၂)

နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော.