၁. ဝိဘင်္ဂဝါရော

နဟေတုပစ္စယော

၂၄၀. နရူပါဝစရံ ဓမ္မံ ပစ္စယာ နရူပါဝစရော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နရူပါဝစရံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ (ယာဝ အသညသတ္တာ) စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ နရူပါဝစရာ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁) (သံခိတ္တံ.)

နအဓိပတိပစ္စယော

၂၄၁. ရူပါဝစရံ ဓမ္မံ ပစ္စယာ ရူပါဝစရော ဓမ္မော ဥပ္ပဇ္ဇတိ နအဓိပတိပစ္စယာ။ တီဏိ (ပဋိစ္စဝါရသဒိသံ).

နရူပါဝစရံ ဓမ္မံ ပစ္စယာ နရူပါဝစရော ဓမ္မော ဥပ္ပဇ္ဇတိ နအဓိပတိပစ္စယာ (ပဋိစ္စဝါရသဒိသံ). နရူပါဝစရံ ဓမ္မံ ပစ္စယာ ရူပါဝစရော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ ရူပါဝစရာဓိပတိ၊ ဝတ္ထုံ ပစ္စယာ ဝိပါကာ ရူပါဝစရာ ခန္ဓာ၊ ပဋိသန္ဓိက္ခဏေ။ပေ။. နရူပါဝစရံ ဓမ္မံ ပစ္စယာ ရူပါဝစရော စ နရူပါဝစရော စ ဓမ္မာ ဥပ္ပဇ္ဇန္တိ နအဓိပတိပစ္စယာ – ဝတ္ထုံ ပစ္စယာ ဝိပါကာ ရူပါဝစရာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၃)

၂၄၂. ရူပါဝစရဉ္စ နရူပါဝစရဉ္စ ဓမ္မံ ပစ္စယာ ရူပါဝစရော ဓမ္မော ဥပ္ပဇ္ဇတိ နအဓိပတိပစ္စယာ – ရူပါဝစရေ ခန္ဓေ စ ဝတ္ထုဉ္စ ပစ္စယာ ရူပါဝစရာဓိပတိ၊ ဝိပါကံ ရူပါဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ပဋိသန္ဓိက္ခဏေ ရူပါဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။. ရူပါဝစရဉ္စ နရူပါဝစရဉ္စ ဓမ္မံ ပစ္စယာ နရူပါဝစရော ဓမ္မော ဥပ္ပဇ္ဇတိ နအဓိပတိပစ္စယာ – ဝိပါကေ ရူပါဝစရေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. ရူပါဝစရဉ္စ နရူပါဝစရဉ္စ ဓမ္မံ ပစ္စယာ ရူပါဝစရော စ နရူပါဝစရော စ ဓမ္မာ ဥပ္ပဇ္ဇန္တိ နအဓိပတိပစ္စယာ – ဝိပါကံ ရူပါဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ဝိပါကေ ရူပါဝစရေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၃) (သံခိတ္တံ.)