၁. ဝိဘင်္ဂဝါရော

ဟေတုပစ္စယော

၂၀၆. ကာမာဝစရော ဓမ္မော ကာမာဝစရဿ ဓမ္မဿ ဟေတုပစ္စယေန ပစ္စယော – ကာမာဝစရာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၁)

နကာမာဝစရော ဓမ္မော နကာမာဝစရဿ ဓမ္မဿ ဟေတုပစ္စယေန ပစ္စယော – နကာမာဝစရာ ဟေတူ သမ္ပယုတ္တကာနံ ခန္ဓာနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. နကာမာဝစရော ဓမ္မော ကာမာဝစရဿ ဓမ္မဿ ဟေတုပစ္စယေန ပစ္စယော – နကာမာဝစရာ ဟေတူ စိတ္တသမုဋ္ဌာနာနံ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (မူလံ ကာတဗ္ဗံ.) နကာမာဝစရာ ဟေတူ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော၊ ပဋိသန္ဓိက္ခဏေ။ပေ။. (၃)

အာရမ္မဏပစ္စယော

၂၀၇. ကာမာဝစရော ဓမ္မော ကာမာဝစရဿ ဓမ္မဿ အာရမ္မဏပစ္စယေန ပစ္စယော – ဒါနံ ဒတွာ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ။ပေ။ ဒေါမနဿံ ဥပ္ပဇ္ဇတိ၊ အရိယာ ဂေါတြဘုံ ပစ္စဝေက္ခန္တိ၊ ဝေါဒါနံ ပစ္စဝေက္ခန္တိ၊ ပဟီနေ ကိလေသေ။ပေ။ ဝိက္ခမ္ဘိတေ ကိလေသေ။ပေ။ ပုဗ္ဗေ သုစိဏ္ဏာနိ။ပေ။ စက္ခုံ။ပေ။ ဝတ္ထုံ ကာမာဝစရေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ အာရမ္မဏပစ္စယေန ပစ္စယော. (၁)

ကာမာဝစရော ဓမ္မော နကာမာဝစရဿ ဓမ္မဿ အာရမ္မဏပစ္စယေန ပစ္စယော – ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ၊ စေတောပရိယဉာဏေန ကာမာဝစရစိတ္တသမင်္ဂိဿ စိတ္တံ ဇာနာတိ၊ ကာမာဝစရာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော. (၂)

၂၀၈. နကာမာဝစရော ဓမ္မော နကာမာဝစရဿ ဓမ္မဿ အာရမ္မဏပစ္စယေန ပစ္စယော – နိဗ္ဗာနံ မဂ္ဂဿ၊ ဖလဿ အာရမ္မဏပစ္စယေန ပစ္စယော၊ စေတောပရိယဉာဏေန နကာမာဝစရစိတ္တသမင်္ဂိဿ စိတ္တံ ဇာနာတိ၊ အာကာသာနဉ္စာယတနံ ဝိညာဏဉ္စာယတနဿ။ပေ။ အာကိဉ္စညာယတနံ နေဝသညာနာသညာယတနဿ။ပေ။ နကာမာဝစရာ ခန္ဓာ ဣဒ္ဓိဝိဓဉာဏဿ၊ စေတောပရိယဉာဏဿ၊ ပုဗ္ဗေနိဝါသာနုဿတိဉာဏဿ၊ ယထာကမ္မူပဂဉာဏဿ၊ အနာဂတံသဉာဏဿ အာရမ္မဏပစ္စယေန ပစ္စယော. (၁)

နကာမာဝစရော ဓမ္မော ကာမာဝစရဿ ဓမ္မဿ အာရမ္မဏပစ္စယေန ပစ္စယော – ဈာနာ ဝုဋ္ဌဟိတွာ ဈာနံ ပစ္စဝေက္ခတိ အဿာဒေတိ အဘိနန္ဒတိ၊ တံ အာရဗ္ဘ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ။ပေ။ အရိယာ မဂ္ဂါ ဝုဋ္ဌဟိတွာ မဂ္ဂံ ပစ္စဝေက္ခန္တိ၊ ဖလံ။ပေ။ နိဗ္ဗာနံ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ၊ အာဝဇ္ဇနာယ အာရမ္မဏပစ္စယေန ပစ္စယော၊ အာကာသာနဉ္စာယတနံ ပစ္စဝေက္ခတိ၊ ဝိညာဏဉ္စာယတနံ ပစ္စဝေက္ခတိ၊ အာကိဉ္စညာယတနံ ပစ္စဝေက္ခတိ၊ နေဝသညာနာသညာယတနံ ပစ္စဝေက္ခတိ၊ ဒိဗ္ဗံ စက္ခုံ ပစ္စဝေက္ခတိ၊ ဒိဗ္ဗံ သောတဓာတုံ ပစ္စဝေက္ခတိ၊ ဣဒ္ဓိဝိဓဉာဏံ ပစ္စဝေက္ခတိ၊ စေတောပရိယဉာဏံ။ပေ။ ပုဗ္ဗေနိဝါသာနုဿတိဉာဏံ။ပေ။ ယထာကမ္မူပဂဉာဏံ။ပေ။ အနာဂတံသဉာဏံ ပစ္စဝေက္ခတိ၊ နကာမာဝစရေ ခန္ဓေ အနိစ္စတော။ပေ။ ဒေါမနဿံ ဥပ္ပဇ္ဇတိ. (၂)

အဓိပတိပစ္စယော

၂၀၉. ကာမာဝစရော ဓမ္မော ကာမာဝစရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဒါနံ။ပေ။ သီလံ။ပေ။ ဥပေါသထကမ္မံ။ပေ။ ပုဗ္ဗေ သုစိဏ္ဏာနိ ဂရုံ ကတွာ ပစ္စဝေက္ခတိ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ သေက္ခာ ဂေါတြဘုံ ဂရုံ ကတွာ ပစ္စဝေက္ခန္တိ၊ ဝေါဒါနံ ဂရုံ ကတွာ ပစ္စဝေက္ခန္တိ၊ စက္ခုံ။ပေ။ ဝတ္ထုံ ကာမာဝစရေ ခန္ဓေ ဂရုံ ကတွာ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – ကာမာဝစရာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၁)

၂၁၀. နကာမာဝစရော ဓမ္မော နကာမာဝစရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – နိဗ္ဗာနံ မဂ္ဂဿ၊ ဖလဿ အဓိပတိပစ္စယေန ပစ္စယော. သဟဇာတာဓိပတိ – နကာမာဝစရာဓိပတိ သမ္ပယုတ္တကာနံ ခန္ဓာနံ အဓိပတိပစ္စယေန ပစ္စယော. နကာမာဝစရော ဓမ္မော ကာမာဝစရဿ ဓမ္မဿ အဓိပတိပစ္စယေန ပစ္စယော – အာရမ္မဏာဓိပတိ၊ သဟဇာတာဓိပတိ. အာရမ္မဏာဓိပတိ – ဈာနာ ဝုဋ္ဌဟိတွာ ဈာနံ ဂရုံ ကတွာ ပစ္စဝေက္ခတိ အဿာဒေတိ အဘိနန္ဒတိ၊ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ၊ အရိယာ မဂ္ဂါ ဝုဋ္ဌဟိတွာ မဂ္ဂံ ဂရုံ ကတွာ ပစ္စဝေက္ခန္တိ၊ ဖလံ။ပေ။ နိဗ္ဗာနံ ဂရုံ ကတွာ ပစ္စဝေက္ခန္တိ၊ နိဗ္ဗာနံ ဂေါတြဘုဿ၊ ဝေါဒါနဿ အဓိပတိပစ္စယေန ပစ္စယော၊ အာကာသာနဉ္စာယတနံ ဂရုံ ကတွာ ပစ္စဝေက္ခတိ ဝိညာဏဉ္စာယတနံ။ပေ။ အာကိဉ္စညာယတနံ။ပေ။ နေဝသညာနာသညာယတနံ ဂရုံ ကတွာ ပစ္စဝေက္ခတိ၊ ဒိဗ္ဗံ စက္ခုံ။ပေ။ ဒိဗ္ဗံ သောတဓာတုံ။ပေ။ ဣဒ္ဓိဝိဓဉာဏံ။ပေ။ အနာဂတံသဉာဏံ ဂရုံ ကတွာ ပစ္စဝေက္ခတိ၊ နကာမာဝစရေ ခန္ဓေ ဂရုံ ကတွာ အဿာဒေတိ အဘိနန္ဒတိ တံ ဂရုံ ကတွာ ရာဂေါ ဥပ္ပဇ္ဇတိ၊ ဒိဋ္ဌိ ဥပ္ပဇ္ဇတိ. သဟဇာတာဓိပတိ – နကာမာဝစရာဓိပတိ စိတ္တသမုဋ္ဌာနာနံ ရူပါနံ အဓိပတိပစ္စယေန ပစ္စယော၊ နကာမာဝစရော ဓမ္မော ကာမာဝစရဿ စ နကာမာဝစရဿ စ ဓမ္မဿ အဓိပတိပစ္စယေန ပစ္စယော. သဟဇာတာဓိပတိ – နကာမာဝစရာဓိပတိ သမ္ပယုတ္တကာနံ ခန္ဓာနံ စိတ္တသမုဋ္ဌာနာနဉ္စ ရူပါနံ အဓိပတိပစ္စယေန ပစ္စယော. (၃)

အနန္တရပစ္စယာဒိ

၂၁၁. ကာမာဝစရော ဓမ္မော ကာမာဝစရဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ ကာမာဝစရာ ခန္ဓာ ပစ္ဆိမာနံ ပစ္ဆိမာနံ ကာမာဝစရာနံ ခန္ဓာနံ အနန္တရပစ္စယေန ပစ္စယော၊ အနုလောမံ ဂေါတြဘုဿ။ အနုလောမံ ဝေါဒါနဿ။ အာဝဇ္ဇနာ ကာမာဝစရာနံ ခန္ဓာနံ အနန္တရပစ္စယေန ပစ္စယော.

ကာမာဝစရော ဓမ္မော နကာမာဝစရဿ ဓမ္မဿ အနန္တရပစ္စယေန ပစ္စယော – ကာမာဝစရံ စုတိစိတ္တံ နကာမာဝစရဿ ဥပပတ္တိစိတ္တဿ။ အာဝဇ္ဇနာ နကာမာဝစရာနံ ခန္ဓာနံ အနန္တရပစ္စယေန ပစ္စယော၊ ကာမာဝစရာ ခန္ဓာ နကာမာဝစရဿ ဝုဋ္ဌာနဿ အနန္တရပစ္စယေန ပစ္စယော၊ ပဌမဿ ဈာနဿ ပရိကမ္မံ ပဌမဿ ဈာနဿ အနန္တရပစ္စယေန ပစ္စယော။ပေ။ စတုတ္ထဿ ဈာနဿ။ပေ။ နေဝသညာနာသညာယတနဿ ပရိကမ္မံ။ပေ။ ဒိဗ္ဗဿ စက္ခုဿ။ပေ။ ဒိဗ္ဗာယ သောတဓာတုယာ။ပေ။ ဣဒ္ဓိဝိဓဉာဏဿ။ပေ။ စေတောပရိယဉာဏဿ။ပေ။ ပုဗ္ဗေနိဝါသာနုဿတိဉာဏဿ။ပေ။ ယထာကမ္မူပဂဉာဏဿ။ပေ။ အနာဂတံသဉာဏဿ ပရိကမ္မံ အနာဂတံသဉာဏဿ အနန္တရပစ္စယေန ပစ္စယော၊ ဂေါတြဘု မဂ္ဂဿ။ ဝေါဒါနံ မဂ္ဂဿ။ အနုလောမံ ဖလသမာပတ္တိယာ အနန္တရပစ္စယေန ပစ္စယော. (၂)

၂၁၂. နကာမာဝစရော ဓမ္မော နကာမာဝစရဿ ဓမ္မဿ အနန္တရပစ္စယေန ပစ္စယော – ပုရိမာ ပုရိမာ နကာမာဝစရာ ခန္ဓာ ပစ္ဆိမာနံ ပစ္ဆိမာနံ နကာမာဝစရာနံ ခန္ဓာနံ အနန္တရပစ္စယေန ပစ္စယော၊ မဂ္ဂေါ ဖလဿ၊ ဖလံ ဖလဿ၊ နိရောဓာ ဝုဋ္ဌဟန္တဿ၊ နေဝသညာနာသညာယတနံ ဖလသမာပတ္တိယာ အနန္တရပစ္စယေန ပစ္စယော. နကာမာဝစရော ဓမ္မော ကာမာဝစရဿ ဓမ္မဿ အနန္တရပစ္စယေန ပစ္စယော – နကာမာဝစရံ စုတိစိတ္တံ ကာမာဝစရဿ ဥပပတ္တိစိတ္တဿ၊ နကာမာဝစရံ ဘဝင်္ဂံ အာဝဇ္ဇနာယ၊ နကာမာဝစရာ ခန္ဓာ ကာမာဝစရဿ ဝုဋ္ဌာနဿ အနန္တရပစ္စယေန ပစ္စယော။. (၂)

သမနန္တရပစ္စယေန ပစ္စယော။ သဟဇာတပစ္စယေန ပစ္စယော။ သတ္တ။ အညမညပစ္စယေန ပစ္စယော။ ဆ။ နိဿယပစ္စယေန ပစ္စယော။ သတ္တ.

ဥပနိဿယပစ္စယော

၂၁၃. ကာမာဝစရော ဓမ္မော ကာမာဝစရဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ကာမာဝစရံ သဒ္ဓံ ဥပနိဿာယ ဒါနံ ဒေတိ။ပေ။ သီလံ။ပေ။ ဥပေါသထကမ္မံ။ပေ။ ဝိပဿနံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ ကာမာဝစရံ သီလံ။ပေ။ ပညံ။ ရာဂံ။ပေ။ ပတ္ထနံ။ ကာယိကံ သုခံ။ ကာယိကံ ဒုက္ခံ။ ဥတုံ။ ဘောဇနံ။ သေနာသနံ ဥပနိဿာယ ဒါနံ ဒေတိ။ပေ။ ဝိပဿနံ ဥပ္ပါဒေတိ၊ ပါဏံ ဟနတိ။ပေ။ သံဃံ ဘိန္ဒတိ၊ ကာမာဝစရာ သဒ္ဓါ။ပေ။ သေနာသနံ ကာမာဝစရာယ သဒ္ဓါယ။ပေ။ ပတ္ထနာယ။ ကာယိကဿ သုခဿ။ ကာယိကဿ ဒုက္ခဿ ဥပနိဿယပစ္စယေန ပစ္စယော. (၁)

ကာမာဝစရော ဓမ္မော နကာမာဝစရဿ ဓမ္မဿ ဥပနိဿယပစ္စယေန ပစ္စယော – အနန္တရူပနိဿယော၊ ပကတူပနိဿယော။ပေ။. ပကတူပနိဿယော – ကာမာဝစရံ သဒ္ဓံ ဥပနိဿာယ နကာမာဝစရံ ဈာနံ ဥပ္ပါဒေတိ၊ မဂ္ဂံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ ကာမာဝစရံ သီလံ။ပေ။ သေနာသနံ ဥပနိဿာယ နကာမာဝစရံ ဈာနံ ဥပ္ပါဒေတိ၊ မဂ္ဂံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ ကာမာဝစရာ သဒ္ဓါ။ပေ။ သေနာသနံ နကာမာဝစရာယ သဒ္ဓါယ။ပေ။ ပညာယ။ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော၊ ပဌမဿ ဈာနဿ ပရိကမ္မံ ပဌမဿ ဈာနဿ။ပေ။ စတုတ္ထဿ ဈာနဿ။ပေ။ အာကာသာနဉ္စာယတနဿ။ပေ။ ပဌမဿ မဂ္ဂဿ။ပေ။ စတုတ္ထဿ မဂ္ဂဿ ပရိကမ္မံ စတုတ္ထဿ မဂ္ဂဿ ဥပနိဿယပစ္စယေန ပစ္စယော. (၂)

၂၁၄. နကာမာဝစရော ဓမ္မော နကာမာဝစရဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – နကာမာဝစရံ သဒ္ဓံ ဥပနိဿာယ ဈာနံ ဥပ္ပါဒေတိ၊ မဂ္ဂံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ နကာမာဝစရံ သီလံ ။ပေ။ ပညံ ဥပနိဿာယ နကာမာဝစရံ ဈာနံ ဥပ္ပါဒေတိ။ပေ။ မဂ္ဂံ။ပေ။ အဘိညံ။ပေ။ သမာပတ္တိံ ဥပ္ပါဒေတိ၊ နကာမာဝစရာ သဒ္ဓါ။ပေ။ ပညာ နကာမာဝစရာယ သဒ္ဓါယ။ပေ။ ပညာယ၊ မဂ္ဂဿ၊ ဖလသမာပတ္တိယာ ဥပနိဿယပစ္စယေန ပစ္စယော၊ ပဌမံ ဈာနံ ဒုတိယဿ ဈာနဿ ဥပနိဿယပစ္စယေန ပစ္စယော။ပေ။ တတိယံ ဈာနံ။ပေ။ စတုတ္ထံ ဈာနံ။ပေ။ အာကာသာနဉ္စာယတနံ ဝိညာဏဉ္စာယတနဿ ။ပေ။ အာကိဉ္စညာယတနံ နေဝသညာနာသညာယတနဿ ဥပနိဿယပစ္စယေန ပစ္စယော၊ ပဌမော မဂ္ဂေါ ဒုတိယဿ မဂ္ဂဿ။ပေ။ ဒုတိယော မဂ္ဂေါ တတိယဿ မဂ္ဂဿ။ပေ။ တတိယော မဂ္ဂေါ စတုတ္ထဿ မဂ္ဂဿ ဥပနိဿယပစ္စယေန ပစ္စယော၊ မဂ္ဂေါ ဖလသမာပတ္တိယာ ဥပနိဿယပစ္စယေန ပစ္စယော. (၁)

နကာမာဝစရော ဓမ္မော ကာမာဝစရဿ ဓမ္မဿ ဥပနိဿယပစ္စယေန ပစ္စယော – အာရမ္မဏူပနိဿယော၊ အနန္တရူပနိဿယော၊ ပကတူပနိဿယော။ပေ။. ပကတူပနိဿယော – နကာမာဝစရံ သဒ္ဓံ ဥပနိဿာယ ဒါနံ ဒေတိ၊ သီလံ။ပေ။ ဥပေါသထကမ္မံ။ပေ။ ဝိပဿနံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ နကာမာဝစရံ သီလံ။ပေ။ ပညံ ဥပနိဿာယ ဒါနံ ဒေတိ၊ သီလံ။ပေ။ ဥပေါသထကမ္မံ။ပေ။ ဝိပဿနံ ဥပ္ပါဒေတိ၊ မာနံ ဇပ္ပေတိ၊ ဒိဋ္ဌိံ ဂဏှာတိ၊ နကာမာဝစရာ သဒ္ဓါ။ပေ။ ပညာ ကာမာဝစရာယ သဒ္ဓါယ။ပေ။ ပညာယ၊ ရာဂဿ။ပေ။ ပတ္ထနာယ ကာယိကဿ သုခဿ၊ ကာယိကဿ ဒုက္ခဿ ဥပနိဿယပစ္စယေန ပစ္စယော၊ အရိယာ မဂ္ဂံ ဥပနိဿာယ သင်္ခါရေ အနိစ္စတော။ပေ။ ဝိပဿန္တိ၊ မဂ္ဂေါ အရိယာနံ အတ္ထပဋိသမ္ဘိဒါယ။ ဓမ္မပဋိသမ္ဘိဒါယ။ နိရုတ္တိပဋိသမ္ဘိဒါယ။ ပဋိဘာနပဋိသမ္ဘိဒါယ။ ဌာနာဌာနကောသလ္လဿ ဥပနိဿယပစ္စယေန ပစ္စယော၊ ဖလသမာပတ္တိ ကာယိကဿ သုခဿ ဥပနိဿယပစ္စယေန ပစ္စယော. (၂)

ပုရေဇာတပစ္စယာဒိ

၂၁၅. ကာမာဝစရော ဓမ္မော ကာမာဝစရဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – စက္ခုံ။ပေ။ ဝတ္ထုံ အနိစ္စတော။ပေ။ ဒေါမနဿံ ဥပ္ပဇ္ဇတိ၊ ရူပါယတနံ စက္ခုဝိညာဏဿ။ပေ။ ဖောဋ္ဌဗ္ဗာယတနံ ကာယဝိညာဏဿ ။ပေ။. ဝတ္ထုပုရေဇာတံ – စက္ခာယတနံ စက္ခုဝိညာဏဿ။ပေ။ ကာယာယတနံ ကာယဝိညာဏဿ။ပေ။ ဝတ္ထု ကာမာဝစရာနံ ခန္ဓာနံ ပုရေဇာတပစ္စယေန ပစ္စယော. ကာမာဝစရော ဓမ္မော နကာမာဝစရဿ ဓမ္မဿ ပုရေဇာတပစ္စယေန ပစ္စယော – အာရမ္မဏပုရေဇာတံ၊ ဝတ္ထုပုရေဇာတံ. အာရမ္မဏပုရေဇာတံ – ဒိဗ္ဗေန စက္ခုနာ ရူပံ ပဿတိ၊ ဒိဗ္ဗာယ သောတဓာတုယာ သဒ္ဒံ သုဏာတိ. ဝတ္ထုပုရေဇာတံ – ဝတ္ထု နကာမာဝစရာနံ ခန္ဓာနံ ပုရေဇာတပစ္စယေန ပစ္စယော. (၂)

ပစ္ဆာဇာတပစ္စယေန ပစ္စယော။ ဒွေ။ အာသေဝနပစ္စယေန ပစ္စယော။ တီဏိ.

ကမ္မပစ္စယာဒိ

၂၁၆. ကာမာဝစရော ဓမ္မော ကာမာဝစရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ (သံခိတ္တံ).

နကာမာဝစရော ဓမ္မော နကာမာဝစရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ (သံခိတ္တံ). နကာမာဝစရော ဓမ္မော ကာမာဝစရဿ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ (သံခိတ္တံ). နကာမာဝစရော ဓမ္မော ကာမာဝစရဿ စ နကာမာဝစရဿ စ ဓမ္မဿ ကမ္မပစ္စယေန ပစ္စယော – သဟဇာတာ၊ နာနာက္ခဏိကာ (သံခိတ္တံ). (၃)

ဝိပါကပစ္စယေန ပစ္စယော။ စတ္တာရိ။ အာဟာရပစ္စယေန ပစ္စယော။ စတ္တာရိ။ ဣန္ဒြိယပစ္စယေန ပစ္စယော။ စတ္တာရိ။ ဈာနပစ္စယေန ပစ္စယော။ စတ္တာရိ။ မဂ္ဂပစ္စယေန ပစ္စယော။ စတ္တာရိ။ သမ္ပယုတ္တပစ္စယေန ပစ္စယော။ ဒွေ.

ဝိပ္ပယုတ္တပစ္စယော

၂၁၇. ကာမာဝစရော ဓမ္မော ကာမာဝစရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ (သံခိတ္တံ). ကာမာဝစရော ဓမ္မော နကာမာဝစရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ (သံခိတ္တံ) ပဋိသန္ဓိက္ခဏေ ဝတ္ထု နကာမာဝစရာနံ ခန္ဓာနံ ဝိပ္ပယုတ္တပစ္စယေန ပစ္စယော. ပုရေဇာတံ – ဝတ္ထု နကာမာဝစရာနံ ခန္ဓာနံ ဝိပ္ပယုတ္တပစ္စယေန ပစ္စယော. (၂)

နကာမာဝစရော ဓမ္မော ကာမာဝစရဿ ဓမ္မဿ ဝိပ္ပယုတ္တပစ္စယေန ပစ္စယော – သဟဇာတံ၊ ပစ္ဆာဇာတံ. သဟဇာတာ – နကာမာဝစရာ ခန္ဓာ စိတ္တသမုဋ္ဌာနာနံ ရူပါနံ ဝိပ္ပယုတ္တပစ္စယေန ပစ္စယော၊ ပဋိသန္ဓိက္ခဏေ။ပေ။. ပစ္ဆာဇာတာ – နကာမာဝစရာ ခန္ဓာ ပုရေဇာတဿ ဣမဿ ကာယဿ ဝိပ္ပယုတ္တပစ္စယေန ပစ္စယော. (၁)

အတ္ထိပစ္စယာဒိ

၂၁၈. ကာမာဝစရော ဓမ္မော ကာမာဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ (သံခိတ္တံ). ကာမာဝစရော ဓမ္မော နကာမာဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတံ – ပဋိသန္ဓိက္ခဏေ ဝတ္ထု နကာမာဝစရာနံ ခန္ဓာနံ အတ္ထိပစ္စယေန ပစ္စယော. ပုရေဇာတံ – ဒိဗ္ဗေန စက္ခုနာ ရူပံ ပဿတိ။ပေ။ (ပုရေဇာတသဒိသံ). (၂)

နကာမာဝစရော ဓမ္မော နကာမာဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ (သံခိတ္တံ). နကာမာဝစရော ဓမ္မော ကာမာဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ (ဝိပ္ပယုတ္တသဒိသံ). နကာမာဝစရော ဓမ္မော ကာမာဝစရဿ စ နကာမာဝစရဿ စ ဓမ္မဿ အတ္ထိပစ္စယေန ပစ္စယော (ပဋိစ္စသဒိသံ). (၃)

၂၁၉. ကာမာဝစရော စ နကာမာဝစရော စ ဓမ္မာ ကာမာဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပစ္ဆာဇာတံ၊ အာဟာရံ၊ ဣန္ဒြိယံ. သဟဇာတာ – နကာမာဝစရာ ခန္ဓာ စ မဟာဘူတာ စ စိတ္တသမုဋ္ဌာနာနံ ရူပါနံ အတ္ထိပစ္စယေန ပစ္စယော၊ ပဋိသန္ဓိက္ခဏေ။ပေ။. ပစ္ဆာဇာတာ – နကာမာဝစရာ ခန္ဓာ စ ကဗဠီကာရော အာဟာရော စ ဣမဿ ကာယဿ အတ္ထိပစ္စယေန ပစ္စယော. ပစ္ဆာဇာတာ – နကာမာဝစရာ ခန္ဓာ စ ရူပဇီဝိတိန္ဒြိယဉ္စ ကဋတ္တာရူပါနံ အတ္ထိပစ္စယေန ပစ္စယော. ကာမာဝစရော စ နကာမာဝစရော စ ဓမ္မာ နကာမာဝစရဿ ဓမ္မဿ အတ္ထိပစ္စယေန ပစ္စယော – သဟဇာတံ၊ ပုရေဇာတံ. သဟဇာတော – နကာမာဝစရော ဧကော ခန္ဓော စ ဝတ္ထု စ တိဏ္ဏန္နံ ခန္ဓာနံ အတ္ထိပစ္စယေန ပစ္စယော။ပေ။ ဒွေ ခန္ဓာ စ။ပေ။ ပဋိသန္ဓိက္ခဏေ။ပေ။. နတ္ထိပစ္စယေန ပစ္စယော။ ဝိဂတပစ္စယေန ပစ္စယော။ အဝိဂတပစ္စယေန ပစ္စယော. (၂)