၁-၄. ပစ္စယာနုလောမာဒိ

ဟေတုပစ္စယော

၂၀၅. ကာမာဝစရံ ဓမ္မံ သံသဋ္ဌော ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ – ကာမာဝစရံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

နကာမာဝစရံ ဓမ္မံ သံသဋ္ဌော နကာမာဝစရော ဓမ္မော ဥပ္ပဇ္ဇတိ ဟေတုပစ္စယာ – နကာမာဝစရံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။. (၁)

ဟေတုယာ ဒွေ၊ အာရမ္မဏေ ဒွေ၊ အဓိပတိယာ ဒွေ (သဗ္ဗတ္ထ ဒွေ)၊ အဝိဂတေ ဒွေ.

အနုလောမံ.

ကာမာဝစရံ ဓမ္မံ သံသဋ္ဌော ကာမာဝစရော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ကာမာဝစရံ ဧကံ ခန္ဓံ သံသဋ္ဌာ တယော ခန္ဓာ။ပေ။ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ သံသဋ္ဌော ဝိစိကိစ္ဆာသဟဂတော ဥဒ္ဓစ္စသဟဂတော မောဟော.

နဟေတုယာ ဧကံ၊ နအဓိပတိယာ ဒွေ၊ နပုရေဇာတေ ဒွေ၊ နပစ္ဆာဇာတေ ဒွေ၊ နအာသေဝနေ ဒွေ၊ နကမ္မေ ဒွေ၊ နဝိပါကေ ဒွေ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ ဒွေ.

ပစ္စနီယံ.