၁-၄. ပစ္စယာနုလောမာဒိ

ဟေတုပစ္စယော

၂၀၂. ကာမာဝစရံ ဓမ္မံ ပစ္စယာ ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ – ကာမာဝစရံ ဧကံ ခန္ဓံ ပစ္စယာ တယော ခန္ဓာ စိတ္တသမုဋ္ဌာနဉ္စ ရူပံ ။ပေ။ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (ယာဝ အဇ္ဈတ္တိကာ မဟာဘူတာ) ဝတ္ထုံ ပစ္စယာ ကာမာဝစရာ ခန္ဓာ. ကာမာဝစရံ ဓမ္မံ ပစ္စယာ နကာမာဝစရော ဓမ္မော ဥပ္ပဇ္ဇတိ ဟေတုပစ္စယာ – ဝတ္ထုံ ပစ္စယာ နကာမာဝစရာ ခန္ဓာ၊ ပဋိသန္ဓိက္ခဏေ။ပေ။. ကာမာဝစရံ ဓမ္မံ ပစ္စယာ ကာမာဝစရော စ နကာမာဝစရော စ ဓမ္မာ ဥပ္ပဇ္ဇန္တိ ဟေတုပစ္စယာ – ဝတ္ထုံ ပစ္စယာ နကာမာဝစရာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၃)

နကာမာဝစရံ ဓမ္မံ ပစ္စယာ နကာမာဝစရော ဓမ္မော ဥပ္ပဇ္ဇတိ ဟေတုပစ္စယာ။ တီဏိ (ပဋိစ္စသဒိသာ).

ကာမာဝစရဉ္စ နကာမာဝစရဉ္စ ဓမ္မံ ပစ္စယာ ကာမာဝစရော ဓမ္မော ဥပ္ပဇ္ဇတိ ဟေတုပစ္စယာ (ပဋိစ္စသဒိသာ). ကာမာဝစရဉ္စ နကာမာဝစရဉ္စ ဓမ္မံ ပစ္စယာ နကာမာဝစရော ဓမ္မော ဥပ္ပဇ္ဇတိ ဟေတုပစ္စယာ – နကာမာဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ပဋိသန္ဓိက္ခဏေ။ပေ။. ကာမာဝစရဉ္စ နကာမာဝစရဉ္စ ဓမ္မံ ပစ္စယာ ကာမာဝစရော စ နကာမာဝစရော စ ဓမ္မာ ဥပ္ပဇ္ဇန္တိ ဟေတုပစ္စယာ – နကာမာဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ နကာမာဝစရေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၃) (သံခိတ္တံ.)

ဟေတုယာ နဝ၊ အာရမ္မဏေ စတ္တာရိ၊ အဓိပတိယာ နဝ၊ အနန္တရေ စတ္တာရိ၊ သမနန္တရေ စတ္တာရိ၊ သဟဇာတေ နဝ၊ အညမညေ ဆ၊ နိဿယေ နဝ၊ ဥပနိဿယေ စတ္တာရိ၊ ပုရေဇာတေ စတ္တာရိ၊ အာသေဝနေ စတ္တာရိ၊ ကမ္မေ နဝ။ပေ။ အဝိဂတေ နဝ.

အနုလောမံ.

နဟေတုပစ္စယာဒိ

၂၀၃. ကာမာဝစရံ ဓမ္မံ ပစ္စယာ ကာမာဝစရော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ကာမာဝစရံ ဧကံ ခန္ဓံ ပစ္စယာ။ပေ။ အဟေတုကပဋိသန္ဓိက္ခဏေ။ပေ။ (ယာဝ အသညသတ္တာ) စက္ခာယတနံ ပစ္စယာ စက္ခုဝိညာဏံ။ပေ။ ကာယာယတနံ ပစ္စယာ ကာယဝိညာဏံ၊ ဝတ္ထုံ ပစ္စယာ အဟေတုကာ ကာမာဝစရာ ခန္ဓာ၊ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဝတ္ထုဉ္စ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (၁)

နအာရမ္မဏပစ္စယာ။ တီဏိ.

နအဓိပတိပစ္စယာဒိ

၂၀၄. ကာမာဝစရံ ဓမ္မံ ပစ္စယာ ကာမာဝစရော ဓမ္မော ဥပ္ပဇ္ဇတိ နအဓိပတိပစ္စယာ။ ဧကံ (ယာဝ အသညသတ္တာ). ကာမာဝစရံ ဓမ္မံ ပစ္စယာ နကာမာဝစရော ဓမ္မော ဥပ္ပဇ္ဇတိ နအဓိပတိပစ္စယာ – ဝတ္ထုံ ပစ္စယာ နကာမာဝစရာဓိပတိ၊ ဝတ္ထုံ ပစ္စယာ ဝိပါကာ နကာမာဝစရာ ခန္ဓာ၊ ပဋိသန္ဓိက္ခဏေ။ပေ။. ကာမာဝစရံ ဓမ္မံ ပစ္စယာ ကာမာဝစရော စ နကာမာဝစရော စ ဓမ္မာ ဥပ္ပဇ္ဇန္တိ နအဓိပတိပစ္စယာ – ဝတ္ထုံ ပစ္စယာ ဝိပါကာ နကာမာဝစရာ ခန္ဓာ၊ မဟာဘူတေ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၃)

နကာမာဝစရံ ဓမ္မံ ပစ္စယာ နကာမာဝစရော ဓမ္မော ဥပ္ပဇ္ဇတိ နအဓိပတိပစ္စယာ။ တီဏိ (ပဋိစ္စသဒိသာ).

ကာမာဝစရဉ္စ နကာမာဝစရဉ္စ ဓမ္မံ ပစ္စယာ ကာမာဝစရော ဓမ္မော ဥပ္ပဇ္ဇတိ နအဓိပတိပစ္စယာ (ပဋိစ္စသဒိသာ. မူလံ ကာတဗ္ဗံ.) နကာမာဝစရေ ခန္ဓေ စ ဝတ္ထုဉ္စ ပစ္စယာ နကာမာဝစရာဓိပတိ၊ ဝိပါကံ နကာမာဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ပဋိသန္ဓိက္ခဏေ။ပေ။. (မူလံ ကာတဗ္ဗံ.) ဝိပါကံ နကာမာဝစရံ ဧကံ ခန္ဓဉ္စ ဝတ္ထုဉ္စ ပစ္စယာ တယော ခန္ဓာ။ပေ။ ဒွေ ခန္ဓေ စ။ပေ။ ဝိပါကေ နကာမာဝစရေ ခန္ဓေ စ မဟာဘူတေ စ ပစ္စယာ စိတ္တသမုဋ္ဌာနံ ရူပံ၊ ပဋိသန္ဓိက္ခဏေ။ပေ။. (၃)

နဥပနိဿယပစ္စယာ။ တီဏိ။ နအာသေဝနပစ္စယာ (သုဒ္ဓကေ အရူပမိဿကေ စ ‘‘ဝိပါက’’န္တိ နိယာမေတဗ္ဗံ၊ ရူပမိဿကေ နတ္ထိ. သံခိတ္တံ).

သုဒ္ဓံ

နဟေတုယာ ဧကံ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ၊ နသမနန္တရေ တီဏိ၊ နဥပနိဿယေ တီဏိ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ ဧကံ၊ နသမ္ပယုတ္တေ တီဏိ၊ နဝိပ္ပယုတ္တေ ဒွေ၊ နောနတ္ထိယာ တီဏိ၊ နောဝိဂတေ တီဏိ.

ပစ္စနီယံ.