၁-၄. ပစ္စယာနုလောမာဒိ

ဟေတုပစ္စယော

၁၈၃. ဥပေက္ခာသဟဂတံ ဓမ္မံ ပစ္စယာ ဥပေက္ခာသဟဂတော ဓမ္မော ဥပ္ပဇ္ဇတိ ဟေတုပစ္စယာ – ဥပေက္ခာသဟဂတံ ဧကံ ခန္ဓံ ပစ္စယာ ဒွေ ခန္ဓာ၊ ဒွေ ခန္ဓေ။ပေ။ ပဋိသန္ဓိက္ခဏေ။ပေ။ (ယထာ သဝိတက္ကဒုကသဒိသံ ပစ္စယဝါရေ နာနာကရဏံ. ‘‘ဥပေက္ခ’’န္တိ နဝပိ ပဉှာ ကာတဗ္ဗာ၊ ပဋိသန္ဓိပဝတ္တိပိ ဝတ္ထုပိ.)

ဟေတုယာ နဝ၊ အာရမ္မဏေ နဝ။ပေ။ ပုရေဇာတေ နဝ၊ အာသေဝနေ နဝ (သဗ္ဗတ္ထ နဝ)၊ အဝိဂတေ နဝ.

အနုလောမံ.

၁၈၄. ဥပေက္ခာသဟဂတံ ဓမ္မံ ပစ္စယာ ဥပေက္ခာသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဥပေက္ခာသဟဂတံ ဧကံ ခန္ဓံ ပစ္စယာ ဒွေ ခန္ဓာ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပစ္စယာ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (ဧဝံ နဝပိ ပဉှာ ပဝတ္တိပဋိသန္ဓိယော ယထာ သဝိတက္ကဒုကဿ ဧဝံ ကာတဗ္ဗာ. တီဏိယေဝ မောဟော၊ ပဝတ္တေ ဝတ္ထုပိ ကာတဗ္ဗာ.)

နဟေတုယာ နဝ၊ နအာရမ္မဏေ တီဏိ၊ နအဓိပတိယာ နဝ၊ နအနန္တရေ တီဏိ၊ နသမနန္တရေ တီဏိ၊ နဥပနိဿယေ တီဏိ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဧကံ၊ နမဂ္ဂေ နဝ၊ နသမ္ပယုတ္တေ တီဏိ၊ နဝိပ္ပယုတ္တေ ဆ၊ နောနတ္ထိယာ တီဏိ၊ နောဝိဂတေ တီဏိ.

ပစ္စနီယံ.