၁. ဝိဘင်္ဂဝါရော

နဟေတုပစ္စယော

၁၇၉. ဥပေက္ခာသဟဂတံ ဓမ္မံ ပဋိစ္စ ဥပေက္ခာသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဥပေက္ခာသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. ဥပေက္ခာသဟဂတံ ဓမ္မံ ပဋိစ္စ နဥပေက္ခာသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ ဥပေက္ခာသဟဂတေ ခန္ဓေ ပဋိစ္စ ဥပေက္ခာ စိတ္တသမုဋ္ဌာနဉ္စ ရူပံ၊ အဟေတုကပဋိသန္ဓိက္ခဏေ။ပေ။. ဥပေက္ခာသဟဂတံ ဓမ္မံ ပဋိစ္စ ဥပေက္ခာသဟဂတော စ နဥပေက္ခာသဟဂတော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ ဥပေက္ခာသဟဂတံ ဧကံ ခန္ဓံ ပဋိစ္စ ဒွေ ခန္ဓာ ဥပေက္ခာ စ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ။ပေ။. (၃)

၁၈၀. နဥပေက္ခာသဟဂတံ ဓမ္မံ ပဋိစ္စ နဥပေက္ခာသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နဥပေက္ခာသဟဂတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကံ ဥပေက္ခံ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ။ပေ။ ဥပေက္ခံ ပဋိစ္စ ဝတ္ထု၊ ဝတ္ထုံ ပဋိစ္စ ဥပေက္ခာ၊ ဧကံ မဟာဘူတံ။ပေ။ (ယာဝ အသညသတ္တာ).

နဥပေက္ခာသဟဂတံ ဓမ္မံ ပဋိစ္စ ဥပေက္ခာသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဥပေက္ခံ ပဋိစ္စ သမ္ပယုတ္တကာ ခန္ဓာ၊ အဟေတုကပဋိသန္ဓိက္ခဏေ ဥပေက္ခံ ပဋိစ္စ သမ္ပယုတ္တကာ ခန္ဓာ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ ဥပေက္ခာသဟဂတာ ခန္ဓာ၊ ဝိစိကိစ္ဆာသဟဂတံ ဥဒ္ဓစ္စသဟဂတံ ဥပေက္ခံ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော.

နဥပေက္ခာသဟဂတံ ဓမ္မံ ပဋိစ္စ ဥပေက္ခာသဟဂတော စ နဥပေက္ခာသဟဂတော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ ဥပေက္ခံ ပဋိစ္စ သမ္ပယုတ္တကာ ခန္ဓာ စိတ္တသမုဋ္ဌာနဉ္စ ရူပံ၊ အဟေတုကံ ဥပေက္ခံ ပဋိစ္စ သမ္ပယုတ္တကာ ခန္ဓာ၊ မဟာဘူတေ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ ဥပေက္ခံ ပဋိစ္စ သမ္ပယုတ္တကာ ခန္ဓာ ကဋတ္တာ စ ရူပံ၊ အဟေတုကပဋိသန္ဓိက္ခဏေ ဥပေက္ခံ ပဋိစ္စ သမ္ပယုတ္တကာ ခန္ဓာ၊ မဟာဘူတေ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ ဥပေက္ခာသဟဂတာ ခန္ဓာ၊ မဟာဘူတေ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ ဝတ္ထုံ ပဋိစ္စ ဥပေက္ခာ စ သမ္ပယုတ္တကာ စ ခန္ဓာ. (၃)

၁၈၁. ဥပေက္ခာသဟဂတဉ္စ နဥပေက္ခာသဟဂတဉ္စ ဓမ္မံ ပဋိစ္စ ဥပေက္ခာသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ဥပေက္ခာသဟဂတံ ဧကံ ခန္ဓဉ္စ ဥပေက္ခဉ္စ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ ဥပေက္ခာသဟဂတံ ဧကံ ခန္ဓဉ္စ ဥပေက္ခဉ္စ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ ဥပေက္ခာသဟဂတံ ဧကံ ခန္ဓဉ္စ ဝတ္ထုဉ္စ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ စ ဥပေက္ခဉ္စ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော.

ဥပေက္ခာသဟဂတဉ္စ နဥပေက္ခာသဟဂတဉ္စ ဓမ္မံ ပဋိစ္စ နဥပေက္ခာသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ ဥပေက္ခာသဟဂတေ ခန္ဓေ စ ဥပေက္ခဉ္စ ပဋိစ္စ စိတ္တသမုဋ္ဌာနံ ရူပံ၊ အဟေတုကေ ဥပေက္ခာသဟဂတေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ ဥပေက္ခာသဟဂတေ ခန္ဓေ စ ဥပေက္ခဉ္စ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ ဥပေက္ခာသဟဂတေ ခန္ဓေ စ မဟာဘူတေ စ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ ဥပေက္ခာသဟဂတေ ခန္ဓေ စ ဝတ္ထုဉ္စ ပဋိစ္စ ဥပေက္ခာ.

ဥပေက္ခာသဟဂတဉ္စ နဥပေက္ခာသဟဂတဉ္စ ဓမ္မံ ပဋိစ္စ ဥပေက္ခာသဟဂတော စ နဥပေက္ခာသဟဂတော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ ဥပေက္ခာသဟဂတံ ဧကံ ခန္ဓဉ္စ ဥပေက္ခဉ္စ ပဋိစ္စ ဒွေ ခန္ဓာ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။ အဟေတုကံ ဥပေက္ခာသဟဂတံ ဧကံ ခန္ဓဉ္စ ဥပေက္ခဉ္စ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကေ ဥပေက္ခာသဟဂတေ ခန္ဓေ စ ဥပေက္ခဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ ဥပေက္ခာသဟဂတံ ဧကံ ခန္ဓဉ္စ ဥပေက္ခဉ္စ ပဋိစ္စ ဒွေ ခန္ဓာ ကဋတ္တာ စ ရူပံ၊ ဒွေ ခန္ဓေ။ပေ။ အဟေတုကပဋိသန္ဓိက္ခဏေ ဥပေက္ခာသဟဂတံ ဧကံ ခန္ဓဉ္စ ဥပေက္ခဉ္စ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ အဟေတုကေ ဥပေက္ခာသဟဂတေ ခန္ဓေ စ ဥပေက္ခဉ္စ မဟာဘူတေ စ ပဋိစ္စ ကဋတ္တာရူပံ၊ အဟေတုကပဋိသန္ဓိက္ခဏေ ဥပေက္ခာသဟဂတံ ဧကံ ခန္ဓဉ္စ ဝတ္ထုဉ္စ ပဋိစ္စ ဒွေ ခန္ဓာ ဥပေက္ခာ စ၊ ဒွေ ခန္ဓေ။ပေ။ (သံခိတ္တံ). (၃)