၁-၄. ပစ္စယာနုလောမာဒိ

ဟေတုပစ္စယော

၁၆၈. သုခသဟဂတံ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ ဟေတုပစ္စယာ – သုခသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ ပဋိစ္စ ဧကော ခန္ဓော၊ ပဋိသန္ဓိက္ခဏေ။ပေ။. သုခသဟဂတံ ဓမ္မံ ပဋိစ္စ နသုခသဟဂတော ဓမ္မော ဥပ္ပဇ္ဇတိ ဟေတုပစ္စယာ – သုခသဟဂတေ ခန္ဓေ ပဋိစ္စ သုခံ စိတ္တသမုဋ္ဌာနဉ္စ ရူပံ. (ဧဝံ သုခသဟဂတဒုကံ ဝိတ္ထာရေတဗ္ဗံ၊ ယထာ သပ္ပီတိကဒုကဿ အနုလောမပဋိစ္စဝါရော.)

ဟေတုယာ နဝ၊ အာရမ္မဏေ နဝ။ပေ။ ပုရေဇာတေ ဆ၊ အာသေဝနေ ဆ၊ ကမ္မေ နဝ။ပေ။ အဝိဂတေ နဝ.

အနုလောမံ.

၁၆၉. သုခသဟဂတံ ဓမ္မံ ပဋိစ္စ သုခသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ သုခသဟဂတံ ဧကံ ခန္ဓံ ပဋိစ္စ ဒွေ ခန္ဓာ၊ ဒွေ ခန္ဓေ။ပေ။ (မူလံ ကာတဗ္ဗံ.) အဟေတုကေ သုခသဟဂတေ ခန္ဓေ ပဋိစ္စ သုခဉ္စ စိတ္တသမုဋ္ဌာနဉ္စ ရူပံ. သုခသဟဂတံ ဓမ္မံ ပဋိစ္စ သုခသဟဂတော စ နသုခသဟဂတော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ သုခသဟဂတံ ဧကံ ခန္ဓံ ပဋိစ္စ ဒွေ ခန္ဓာ သုခဉ္စ စိတ္တသမုဋ္ဌာနဉ္စ ရူပံ၊ ဒွေ ခန္ဓေ။ပေ။. (၃)

နသုခသဟဂတံ ဓမ္မံ ပဋိစ္စ နသုခသဟဂတော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ နသုခသဟဂတံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ အဟေတုကံ သုခံ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ နသုခသဟဂတံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ ။ပေ။ ဒွေ ခန္ဓေ။ပေ။ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။. (ယာဝ အသညသတ္တာ) ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. (ယထာ သပ္ပီတိကေ နဟေတုပစ္စယသဒိသံ၊ နိန္နာနံ သဗ္ဗတ္ထမေဝ နဝ ပဉှာ.)

နဟေတုယာ နဝ၊ နအာရမ္မဏေ တီဏိ။ပေ။ နဥပနိဿယေ တီဏိ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ စတ္တာရိ၊ နဝိပါကေ နဝ၊ နအာဟာရေ ဧကံ၊ နဣန္ဒြိယေ ဧကံ၊ နဈာနေ ဆ၊ နမဂ္ဂေ နဝ၊ နသမ္ပယုတ္တေ တီဏိ၊ နဝိပ္ပယုတ္တေ ဆ၊ နောနတ္ထိယာ တီဏိ၊ နောဝိဂတေ တီဏိ.

ပစ္စနီယံ.

(ဧဝံ ဣတရေ ဒွေ ဂဏနာပိ သဟဇာတဝါရောပိ ပဋိစ္စဝါရသဒိသာ. ပစ္စယဝါရေ ပဝတ္တိပိ ပဋိသန္ဓိပိ ဝိတ္ထာရေတဗ္ဗာ၊ ယထာ သပ္ပီတိကဒုကပစ္စယဝါရပစ္စနီယေပိ ပဝတ္တေ ဝတ္ထု စ ဝိတ္ထာရေတဗ္ဗံ၊ ယထာ သပ္ပီတိကဒုကေ ဧကောယေဝ မောဟော၊ ဧဝံ ဣတရေ ဒွေ ဂဏနာပိ နိဿယဝါရောပိ သံသဋ္ဌဝါရောပိ သမ္ပယုတ္တဝါရောပိ ယထာ သပ္ပီတိကဒုကံ၊ ဧဝံ ကာတဗ္ဗံ.)