၅. သံသဋ္ဌဝါရော

၁-၄. ပစ္စယာနုလောမာဒိ

၁၅. ကိလေသံ ဓမ္မံ သံသဋ္ဌော ကိလေသော ဓမ္မော ဥပ္ပဇ္ဇတိ ဟေတုပစ္စယာ – လောဘံ သံသဋ္ဌော မောဟော ဒိဋ္ဌိ ထိနံ ဥဒ္ဓစ္စံ အဟိရိကံ အနောတ္တပ္ပံ. (စက္ကံ. ဧဝံ နဝ ပဉှာ ကာတဗ္ဗာ.)

ဟေတုယာ နဝ၊ အာရမ္မဏေ နဝ (သဗ္ဗတ္ထ နဝ)၊ ဝိပါကေ ဧကံ။ပေ။ အဝိဂတေ နဝ.

အနုလောမံ.

ကိလေသံ ဓမ္မံ သံသဋ္ဌော ကိလေသော ဓမ္မော ဥပ္ပဇ္ဇတိ နဟေတုပစ္စယာ (ဧဝံ နဟေတုပဉှာ စတ္တာရိ ကာတဗ္ဗာ.)

နဟေတုယာ စတ္တာရိ၊ နအဓိပတိယာ နဝ၊ နပုရေဇာတေ နဝ၊ နပစ္ဆာဇာတေ နဝ၊ နအာသေဝနေ နဝ၊ နကမ္မေ တီဏိ၊ နဝိပါကေ နဝ၊ နဈာနေ ဧကံ၊ နမဂ္ဂေ ဧကံ၊ နဝိပ္ပယုတ္တေ နဝ.

ပစ္စနီယံ.