၁. ဝိဘင်္ဂဝါရော

နဟေတုပစ္စယော

၁၄၄. သပ္ပီတိကံ ဓမ္မံ ပဋိစ္စ သပ္ပီတိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ သပ္ပီတိကံ ဧကံ ခန္ဓံ ပဋိစ္စ တယော ခန္ဓာ။ပေ။ ဒွေ ခန္ဓေ။ပေ။. သပ္ပီတိကံ ဓမ္မံ ပဋိစ္စ အပ္ပီတိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ သပ္ပီတိကေ ခန္ဓေ ပဋိစ္စ ပီတိ စ စိတ္တသမုဋ္ဌာနဉ္စ ရူပံ. သပ္ပီတိကံ ဓမ္မံ ပဋိစ္စ သပ္ပီတိကော စ အပ္ပီတိကော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ သပ္ပီတိကံ ဧကံ ခန္ဓံ ပဋိစ္စ တယော ခန္ဓာ ပီတိ စ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။. (၃)

အပ္ပီတိကံ ဓမ္မံ ပဋိစ္စ အပ္ပီတိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ အပ္ပီတိကံ ဧကံ ခန္ဓံ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ။ပေ။ ပီတိံ ပဋိစ္စ စိတ္တသမုဋ္ဌာနံ ရူပံ၊ အဟေတုကပဋိသန္ဓိက္ခဏေ အပ္ပီတိကံ ဧကံ ခန္ဓံ ပဋိစ္စ တယော ခန္ဓာ ကဋတ္တာ စ ရူပံ။ပေ။ ဒွေ ခန္ဓေ ပဋိစ္စ ဒွေ ခန္ဓာ ကဋတ္တာ စ ရူပံ၊ ခန္ဓေ ပဋိစ္စ ဝတ္ထု၊ ဝတ္ထုံ ပဋိစ္စ ခန္ဓာ၊ ဧကံ မဟာဘူတံ။ပေ။ (ယာဝ အသညသတ္တာပိ) ဝိစိကိစ္ဆာသဟဂတေ ဥဒ္ဓစ္စသဟဂတေ ခန္ဓေ ပဋိစ္စ ဝိစိကိစ္ဆာသဟဂတော ဥဒ္ဓစ္စသဟဂတော မောဟော. အပ္ပီတိကံ ဓမ္မံ ပဋိစ္စ သပ္ပီတိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ ပီတိံ ပဋိစ္စ သပ္ပီတိကာ ခန္ဓာ. (မူလံ ကာတဗ္ဗံ.) ပီတိံ ပဋိစ္စ သပ္ပီတိကာ ခန္ဓာ စိတ္တသမုဋ္ဌာနဉ္စ ရူပံ. (၃)

၁၄၅. သပ္ပီတိကဉ္စ အပ္ပီတိကဉ္စ ဓမ္မံ ပဋိစ္စ သပ္ပီတိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကံ သပ္ပီတိကံ ဧကံ ခန္ဓဉ္စ ပီတိဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။. သပ္ပီတိကဉ္စ အပ္ပီတိကဉ္စ ဓမ္မံ ပဋိစ္စ အပ္ပီတိကော ဓမ္မော ဥပ္ပဇ္ဇတိ နဟေတုပစ္စယာ – အဟေတုကေ သပ္ပီတိကေ ခန္ဓေ စ ပီတိဉ္စ ပဋိစ္စ စိတ္တသမုဋ္ဌာနံ ရူပံ၊ အဟေတုကေ သပ္ပီတိကေ ခန္ဓေ စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. သပ္ပီတိကဉ္စ အပ္ပီတိကဉ္စ ဓမ္မံ ပဋိစ္စ သပ္ပီတိကော စ အပ္ပီတိကော စ ဓမ္မာ ဥပ္ပဇ္ဇန္တိ နဟေတုပစ္စယာ – အဟေတုကံ သပ္ပီတိကံ ဧကံ ခန္ဓဉ္စ ပီတိဉ္စ ပဋိစ္စ တယော ခန္ဓာ စိတ္တသမုဋ္ဌာနဉ္စ ရူပံ။ပေ။ ဒွေ ခန္ဓေ စ။ပေ။ အဟေတုကံ သပ္ပီတိကံ ဧကံ ခန္ဓဉ္စ ပီတိဉ္စ ပဋိစ္စ တယော ခန္ဓာ။ပေ။ ဒွေ ခန္ဓေ စ။ပေ။ အဟေတုကေ သပ္ပီတိကေ ခန္ဓေ စ ပီတိဉ္စ မဟာဘူတေ စ ပဋိစ္စ စိတ္တသမုဋ္ဌာနံ ရူပံ. (၃)